ਵਾਸ਼ਿੰਗਟਨ, 7 ਅਗਸਤ (ਪੋਸਟ ਬਿਊਰੋ)- ਅਮਰੀਕਾ ਵਿਚ ਨਸਲੀ ਵਿਤਕਰੇ ਦਾ ਕੇਸ ਸਾਹਮਣੇ ਆਇਆ ਹੈ। ਟੈਕਸਾਸ ਦੇ ਗੈਲਵੇਸਟੋਨ ਇਲਾਕੇ ਵਿਚ ਦੋ ਗੋਰੇ ਪੁਲਸ ਅਫਸਰਾਂ ਵੱਲੋਂ ਇਕ ਗੈਰ ਗੋਰੇ ਵਿਅਕਤੀ ਨੂੰ ਰੱਸੀ ਨਾਲ ਬੰਨ੍ਹ ਕੇ ਲਿਜਾਣ ਦੀ ਤਸਵੀਰ ਵਾਇਰਲ ਹੋਣ ਤੋਂ ਕਾਫੀ ਵੱਡਾ ਵਿਵਾਦ ਪੈਦਾ ਹੋ ਗਿਆ ਹੈ। ਟੈਕਸਾਸ ਪੁਲਸ ਦੇ ਪ੍ਰਮੁੱਖ ਨੇ ਆਪਣੇ ਪੁਲਸ ਅਧਿਕਾਰੀਆ ਦੀ ਇਸ ਹਰਕਤ ਦੇ ਲਈ ਮਾਫੀ ਮੰਗੀ ਹੈ।
ਇਸ ਬਾਰੇ ਟੈਕਸਾਸ ਦੇ ਤੱਟੀ ਸ਼ਹਿਰ ਗੈਲਵੇਸਟੋਨ ਦੇ ਪੁਲਸ ਪ੍ਰਮੁੱਖ ਵੇਰਨੌਨ ਹੇਲੇ ਨੇ ਦੱਸਿਆ ਕਿ ਸ਼ਨੀਵਾਰ ਨੂੰ ਡੋਨਾਲਡ ਨੀਲੇ ਨੂੰ ਅਣ-ਅਧਿਕਾਰਤ ਰੂਪ ਨਾਲ ਦਾਖਲ ਹੋਣ ਦੇ ਦੋਸ਼ ਵਿਚ ਗ੍ਰਿਫਤਾਰ ਕੀਤਾ ਗਿਆ ਸੀ। ਉਸ ਨੂੰ ਪੁਲਸ ਨੇ ਕਾਰ ਤੋਂ ਥਾਣੇ ਤੱਕ ਲਿਜਾਣਾ ਸੀ। ਕਿਉਂਕਿ ਉਸ ਸਮੇਂ ਘੁੜਸਵਾਰ ਪੁਲਸ ਹੀ ਸੀ, ਇਸ ਲਈ ਉਸ ਨੂੰ ਰੱਸੀ ਨਾਲ ਬੰਨ੍ਹ ਕੇ ਪੈਦਲ ਲਿਜਾਣਾ ਪਿਆ। ਉਸ ਨੇ ਸੋਮਵਾਰ ਨੂੰ ਫੇਸਬੁੱਕ ਪੋਸਟ ਵਿਚ ਲਿਖਿਆ, ‘ਭਾਵੇਂ ਇਹ ਨਿਰਧਾਰਤ ਪ੍ਰਕਿਰਿਆ ਹੈ ਤੇ ਕੁਝ ਮਾਮਲਿਆਂ ਵਿਚ ਸਹੀ ਹੈ, ਮੇਰਾ ਮੰਨਣਾ ਹੈ ਕਿ ਇਸ ਕੇਸ ਵਿਚ ਅਧਿਕਾਰੀਆਂ ਨੇ ਗਲਤ ਮੁਲੰਕਣ ਕੀਤਾ। ਸਭ ਤੋਂ ਪਹਿਲਾਂ ਮੈਂ ਨੀਲੇ ਨੂੰ ਹੋਈ ਬੇਲੋੜੀ ਸ਼ਰਮਿੰਦਗੀ ਲਈ ਮਾਫੀ ਮੰਗਦਾ ਹਾਂ।` ਹੇਲੇ ਨੇ ਐਲਾਨ ਕੀਤਾ ਕਿ ਨੀਤੀ ਨੂੰ ਬਦਲ ਦਿੱਤਾ ਗਿਆ ਹੈ ਤੇ ਭਵਿੱਖ ਵਿਚ ਇਹ ਤਰੀਕਾ ਨਹੀਂ ਅਪਣਾਇਆ ਜਾਵੇਗਾ।
ਹੇਲੇ ਦੇ ਇਸ ਬਿਆਨ ਪਿੱਛੋਂ ਲੋਕਾਂ ਦੀ ਨਾਰਾਜ਼ਗੀ ਹੋਰ ਵਧੀ ਹੈ। ਕੁਝ ਲੋਕਾਂ ਨੇ ਇਸ ਨੂੰ ਕਮਜ਼ੋਰ ਪ੍ਰਤੀਕਿਰਿਆ ਕਿਹਾ ਤੇ ਕੁਝ ਹੋਰ ਲੋਕਾਂ ਨੇ ਦੋਸ਼ੀ ਅਧਿਕਾਰੀਆਂ ਨੂੰ ਬਰਖਾਸਤ ਕਰਨ ਜਾਂ ਸਖਤ ਕਾਰਵਾਈ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਜਿਸ ਤਰ੍ਹਾਂ ਨੀਲੇ ਨੂੰ ਅਪਮਾਨਿਤ ਕੀਤਾ ਗਿਆ, ਉਸ ਨੇ ਦੇਸ਼ ਦੇ ਨਸਲਵਾਦੀ ਇਤਿਹਾਸ ਯਾਦ ਕਰਾਇਆ ਹੈ। ਨੈਸ਼ਨਲ ਐਸੋਸੀਏਸ਼ਨ ਫਾਰ ਦੀ ਐਡਵਾਂਸਡ ਆਫ ਕਲਰਡ ਪੀਪਲਜ਼ ਦੇ ਹਿਊਸਟਨ ਚੈਪਟਰ ਦੇ ਪ੍ਰਧਾਨ ਜੇਮਜ਼ ਡਗਲਸ ਨੇ ਹਿਊਸਟਨ ਕ੍ਰੋਨੀਕਲ ਨੂੰ ਕਿਹਾ ਕਿ ਇਹ 2019 ਨਹੀਂ, ਸਗੋਂ 1819 ਹੈ।