ਵਾਸ਼ਿੰਗਟਨ, 10 ਅਕਤੂਬਰ (ਪੋਸਟ ਬਿਊਰੋ)- ਅਮਰੀਕੀ ਪੁਲਾੜ ਏਜੰਸੀ ਨਾਸਾ ਦੇ ਮੁਤਾਬਕ ਉਸ ਦੇ ਹੱਬਲ ਪੁਲਾੜੀ ਟੈਲੀਸਕੋਪ ਦੇ ਇੱਕ ਗਾਈਰੋਸਕੋਪ ਦੇ ਕੰਮ ਬੰਦ ਕਰਨ ਤੋਂ ਬਾਅਦ ਉਸ ਨੂੰ ਸੁਰੱਖਿਅਤ ਮੋਡ ਵਿੱਚ ਰੱਖ ਦਿੱਤਾ ਗਿਆ ਹੈ। ਨਾਸਾ ਪੰਜ ਅਕਤੂਬਰ ਤੋਂ ਸੁਰੱਖਿਅਤ ਮੋਡ 'ਤੇ ਰੱਖੇ ਗਏ ਪੁਲਾੜੀ ਗੱਡੀ ਦੇ ਵਿਗਿਆਨੀ ਕਾਰਜਾਂ ਨੂੰ ਮੁੜ ਤੋਂ ਸ਼ੁਰੂ ਕਰਨ ਦੇ ਲਈ ਯਤਨ ਕਰ ਰਹੀ ਹੈ।
ਨੈਸ਼ਨਲ ਏਅਰੋਨਾਟਿਕਸ ਐਂਡ ਸਪੇਸ ਐਡਮਨਿਸਟਰੇਸ਼ਨ (ਨਾਸਾ) ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਹੱਬਲ ਦੇ ਯੰਤਰ ਪੂਰੀ ਤਰ੍ਹਾਂ ਕੰਮ ਕਰ ਰਹੇ ਹਨ ਅਤੇ ਆਉਂਦੇ ਸਾਲਾਂ 'ਚ ਸਾਇੰਸ ਦੇ ਖੇਤਰ 'ਚ ਇਨ੍ਹਾਂ ਤੋਂ ਬਿਹਤਰ ਨਤੀਜੇ ਮਿਲਣ ਦੀ ਆਸ ਹੈ। ਸੁਰੱਖਿਅਤ ਮੋਡ ਟੈਲੀਸਕੋਪ ਨੂੰ ਇੱਕ ਸਥਿਰ ਸਥਿਤੀ ਵਿੱਚ ਉਦੋਂ ਤੱਕ ਰੱਖਦਾ ਹੈ, ਜਦੋਂ ਤੱਕ ਕਿ ਗਰਾਊਂਡ ਕੰਟਰੋਲ (ਨਿਗਰਾਨੀ ਕਰਨ ਵਾਲਾ ਯੰਤਰ ਜਾਂ ਮੁਲਾਜ਼ਮ) ਇਸ ਸਮੱਸਿਆ ਨੂੰ ਸੁਧਾਰ ਨਹੀਂ ਲੈਂਦਾ ਅਤੇ ਮਿਸ਼ਨ ਮੁੜ ਆਮ ਰੂਪ ਨਾਲ ਕੰਮ ਨਹੀਂ ਕਰਨ ਲੱਗਦਾ। ਵਾਧੂ ਗਾਈਰੋਸਕੋਪ ਦੇ ਨਾਲ ਬਣੇ ਹੱਬਲ 'ਚ 2009 ਵਿੱਚ ਸਰਵਸਿੰਗ ਮਿਸ਼ਨ-4 ਦੌਰਾਨ ਛੇ ਨਵੇਂ ਗਾਈਰੋਸਕੋਪ ਲਾਏ ਗਏ ਸਨ। ਹੱਬਲ ਆਮ ਤੌਰ ਉਤੇ ਵੱਧ ਕਾਰਜ ਸਮਰੱਥਾ ਲਈ ਤਿੰਨ ਗਾਈਰੋਸਕੋਪ ਦੀ ਵਰਤੋਂ ਕਰਦਾ ਹੈ, ਪਰ ਉਹ ਇੱਕ ਦੇ ਨਾਲ ਵੀ ਵਿਗਿਆਨਕ ਆਬਜ਼ਰਵੇਸ਼ਨ ਕਰਨਾ ਜਾਰੀ ਰੱਖ ਸਕਦਾ ਹੈ।