ਸੋਨਭਦਰ, 18 ਜੁਲਾਈ (ਪੋਸਟ ਬਿਊਰੋ)- ਯੂ ਪੀ ਦੇ ਸੋਨਭਦਰ ਜ਼ਿਲ੍ਹੇ ਦੇ ਸਪਹੀ ਪਿੰਡ ਵਿੱਚ ਜ਼ਮੀਨੀ ਝਗੜੇ ਵਿੱਚ ਤਿੰਨ ਔਰਤਾਂ ਸਣੇ ਨੌਂ ਜਣਿਆਂ ਨੂੰ ਗੋਲੀ ਮਾਰ ਕੇ ਮਾਰ ਦਿੱਤਾ ਗਿਆ ਹੈ ਅਤੇ 19 ਜਣੇ ਜ਼ਖਮੀ ਹੋਏ ਹਨ।
ਜ਼ਿਲ੍ਹਾ ਅਧਿਕਾਰੀ ਅੰਕਿਤ ਕੁਮਾਰ ਅਗਰਵਾਲ ਨੇ ਦੱਸਿਆ, ਗੋਲੀ ਲੱਗਣ ਨਾਲ ਨੌਂ ਜਣਿਆ ਦੀ ਮੌਤ ਹੋ ਗਈ ਅਤੇ 19 ਜ਼ਖਮੀ ਹੋ ਗਏ। ਪੁਲਸ ਦੇ ਮੁਤਾਬਕ ਸਪਾਹੀ ਪਿੰਡ ਦੇ ਸਰਪੰਚ ਯੱਗ ਦੱਤ ਤੇ ਉਸ ਦੇ ਸਮਰਥਕਾਂ ਨੇ ਜ਼ਮੀਨੀ ਝਗੜੇ ਵਿੱਚ ਦੂਜੀ ਧਿਰ 'ਤੇ ਅੰਨ੍ਹੇਵਾਹ ਗੋਲੀਆਂ ਚਲਾ ਦਿੱਤੀਆਂ, ਜਿਸ ਨਾਲ ਮੌਤਾਂ ਹੋਈਆਂ ਹਨ। ਇਸ ਕੇਸ ਵਿੱਚ ਦੋ ਜਣਿਆਂ ਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਡੀ ਜੀ ਪੀ, ਓ ਪੀ ਸਿੰਘ ਨੇ ਦੱਸਿਆ ਕਿ ਘੋਰਾਵਲ ਦੇ ਸਪਹੀ ਪਿੰਡ ਵਿੱਚ ਦੋ ਸਾਲ ਪਹਿਲਾਂ ਸਰਪੰਚ ਯਗ ਦੱਤ ਨੇ ਕਿਸੇ ਆਈ ਏ ਐੱਸ ਅਫਸਰ ਕੋਲੋਂ ਜ਼ਮੀਨ ਖਰੀਦੀ ਸੀ। ਉਸ 'ਤੇ ਕਬਜ਼ੇ ਦਾ ਰੌਲਾ ਸੀ। ਯਗ ਦੱਤ ਜ਼ਮੀਨ 'ਤੇ ਕਬਜ਼ੇ ਲਈ 10-12 ਟਰੈਕਟਰਾਂ 'ਤੇ ਆਪਣੇ ਸਾਥੀ ਲੈ ਕੇ ਪੁੱਜਾ ਸੀ। ਜ਼ਮੀਨ ਵਾਹੁਣ ਦੌਰਾਨ ਸਥਾਨਕ ਪੇਂਡੂਆਂ ਨੇ ਇਸ ਦਾ ਵਿਰੋਧ ਕੀਤਾ ਤਾਂ ਸਰਪੰਚ ਦੇ ਸਾਥੀਆਂ ਨੇ ਉਨ੍ਹਾਂ 'ਤੇ ਅੰਨ੍ਹੇਵਾਹ ਗੋਲੀਆਂ ਚਲਾ ਦਿੱਤੀਆਂ। ਇਸ ਘਟਨਾ ਲਈ ਸਰਪੰਚ ਦੇ ਭਤੀਜਿਆਂ ਗਿਰੀਜੇਸ਼ ਅਤੇ ਵਿਮਲੇਸ਼ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ, ਬਾਕੀਆਂ ਦੀ ਭਾਲ ਕੀਤੀ ਜਾ ਰਹੀ ਹੈ। ਡੀ ਜੀ ਪੀ ਨੇ ਕਿਹਾ ਕਿ ਪੁਲਸ ਨੇ ਇਸ ਕੇਸ ਵਿੱਚ ਸਰਪੰਚ ਨੂੰ ਪਹਿਲਾਂ ਵੀ ਪਾਬੰਦ ਕੀਤਾ ਸੀ ਅਤੇ ਉਸ ਦੀ ਸੰਪਤੀ ਕੁਰਕ ਕਰਨ ਦੀ ਕਾਰਵਾਈ ਚੱਲ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਲੋੜ ਪਈ ਤਾਂ ਜ਼ਮੀਨ ਵੇਚਣ ਵਾਲੇ ਆਈ ਏ ਐਸ ਅਧਿਕਾਰੀ ਵਿਰੁੱਧ ਵੀ ਕਾਰਵਾਈ ਕੀਤੀ ਜਾਵੇਗੀ। ਲਖਨਊ ਵਿੱਚ ਸਰਕਾਰੀ ਬੁਲਾਰੇ ਮੁਤਾਬਕ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਨੇ ਸੋਨਭਦਰ ਦੇ ਅਧਿਕਾਰੀਆਂ ਨੂੰ ਜ਼ਖਮੀਆਂ ਨੂੰ ਫੌਰੀ ਇਲਾਜ ਦੀਆਂ ਸਹੂਲਤਾਂ ਦੇਣ ਦੇ ਹੁਕਮ ਦਿੱਤੇ ਹਨ। ਉਨ੍ਹਾਂ ਡੀ ਜੀ ਪੀ ਨੂੰ ਖੁਦ ਇਸ ਮਾਮਲੇ 'ਤੇ ਨਜ਼ਰ ਰੱਖਣ ਅਤੇ ਦੋਸ਼ੀਆਂ ਵਿਰੁੱਧ ਸਖਤ ਕਾਰਵਾਈ ਕਰਨ ਦੇ ਹੁਕਮ ਦਿੱਤੇ ਹਨ।