ਨਵੀਂ ਦਿੱਲੀ, 16 ਜੁਲਾਈ (ਪੋਸਟ ਬਿਊਰੋ)- ਨੇਪਾਲ ਵਿੱਚ ਭਾਰੀ ਮੀਂਹ ਨਾਲ ਉੱਤਰ ਬਿਹਾਰ ਅਤੇ ਆਸਾਮ ਦੀਆਂ ਸਭ ਨਦੀਆਂ ਨੱਕੋ-ਨੱਕ ਵਹਿ ਰਹੀਆਂ ਹਨ। ਨਦੀਆਂ ਦੇ ਵੱਧ ਰਹੇ ਪਾਣੀ ਦੇ ਪੱਧਰ ਦਾ ਪ੍ਰਭਾਵ ਕੰਢਿਆਂ 'ਤੇ ਦਿਸਣ ਲੱਗਾ ਹੈ। ਮਧੂਬਨੀ, ਪੂਰਬੀ ਚੰਪਾਰਨ ਤੇ ਸੀਤਾਮੜ੍ਹੀ ਵਿੱਚ ਸ਼ਨੀਵਾਰ ਦੇਰ ਰਾਤ ਤੋਂ ਐਤਵਾਰ ਤੱਕ ਛੇ ਕੰਢੇ ਟੁੱਟ ਗਏ। ਮੋਤੀਹਾਰੀ ਵਿੱਚ ਤਿਲਾਵੇ ਨਦੀ ਦਾ ਕੰਢਾ ਫੁਲਵਾਰ ਅਤੇ ਰੋਹਿਨੀਆ ਪਿੰਡ ਵਿਚਾਲੇ ਟੁੱਟ ਗਿਆ। ਹੜ੍ਹ ਕਾਰਨ ਦੇਸ਼ ਵਿੱਚ 100 ਲੋਕਾਂ ਦੀ ਮੌਤ ਹੋ ਗਈ ਹੈ। ਇਕੱਲੇ ਬਿਹਾਰ ਵਿੱਚ 46 ਲੋਕ ਮਾਰੇ ਗਏ ਤੇ ਕਈ ਲਾਪਤਾ ਦੱਸੇ ਜਾ ਰਹੇ ਹਨ।
ਇਸ ਦੌਰਾਨ ਕੋਸੀ ਥਰਾਜ ਤੋਂ ਪਾਣੀ ਛੱਡੇ ਜਾਣ ਤੋਂ ਬਾਅਦ ਸੁਪੋਲ, ਸਹਰਸਾ, ਮਧੇਪੁਰਾ, ਅਰਰੀਆ, ਕਿਸ਼ਨਗੰਜ, ਕਟਿਆਰ ਤੇ ਪੂਰਨੀਆ ਦੇ ਨਵੇਂ ਇਲਾਕਿਆਂ ਵਿੱਚ ਹੜ੍ਹ ਦਾ ਪਾਣੀ ਆ ਗਿਆ ਹੈ, ਸਭ ਤੋਂ ਵੱਧ ਨੁਕਸਾਨ ਅਰਰੀਆ ਅਤੇ ਕਿਸ਼ਨਗੰਜ ਵਿੱਚ ਹੋਇਆ ਹੈ। ਹੜ੍ਹ ਮਾਰੇ ਅੱਠ ਜ਼ਿਲ੍ਹਿਆਂ ਸ਼ਿਵਹਰ, ਸੀਤਾਮੜ੍ਹੀ, ਪੂਰਬੀ ਚੰਪਾਰਨ, ਮਧੂਬਨੀ, ਅਰਰੀਆ, ਕਿਸ਼ਨਗੰਜ, ਸੁਪੋਲ ਅਤੇ ਦਰਭੰਗਾ ਦੇ ਅਧਿਕਾਰੀਆਂ ਦੀਆਂ ਛੁੱਟੀਆਂ ਰੱਦ ਕਰ ਦਿੱਤੀਆਂ ਗਈਆਂ ਹਨ। ਹੜ੍ਹ ਦੇ ਕਾਰਨ ਨੁਕਸਾਨ ਗ੍ਰਸਤ ਪੇਂਡੂ ਸੜਕਾਂ ਬਾਰੇ ਗ੍ਰਾਮੀਣ ਕਾਰਜ ਵਿਭਾਗ ਨੇ ਨਿਰਦੇਸ਼ ਦਿੱਤਾ ਹੈ ਕਿ ਬਿਨਾਂ ਇਜਾਜ਼ਤ ਦੇ ਇੰਜੀਨੀਅਰ ਮੁੱਖ ਦਫਤਰ ਨਹੀਂ ਚੱਲਣਗੇ। ਸੂਬੇ ਦੇ ਅੱਠ ਜ਼ਿਲ੍ਹਿਆਂ ਦੀਆਂ 14 ਡਵੀਜ਼ਨਾਂ ਅਤੇ 287 ਪੰਚਾਇਤਾਂ ਵਿੱਚ 12 ਲੱਖ 25 ਹਜ਼ਾਰ 535 ਤੋਂ ਵੱਧ ਲੋਕ ਹੜ੍ਹ ਦਾ ਕਹਿਰ ਸਹਿ ਰਹੇ ਹਨ।