ਰਾਂਚੀ, 16 ਜੁਲਾਈ (ਪੋਸਟ ਬਿਊਰੋ)- ਸੋਸ਼ਲ ਸਾਈਟ ਉਤੇ ਇਕ ਧਰਮ ਦੇ ਖਿਲਾਫ ਇਤਰਾਜ਼ਯੋਗ ਟਿੱਪਣੀ ਕਰਨ ਦੇ ਦੋਸ਼ 'ਚ ਜੇਲ੍ਹ 'ਚ ਬੰਦ ਰਾਂਚੀ ਦੀ ਰਿਚਾ ਭਾਰਤੀ (19) ਨੂੰ ਰਾਹਤ ਮਿਲ ਗਈ ਹੈ। ਕੱਲ੍ਹ ਸੀ ਜੇ ਐਮ ਮਨੀਸ਼ ਕੁਮਾਰ ਸਿੰਘ ਦੀ ਅਦਾਲਤ ਨੇ ਉਸ ਨੂੰ ਅਨੋਖੀ ਸਜ਼ਾ ਸੁਣਾਉਂਦੇ ਹੋਏ ਬਾਸ਼ਰਤ ਜ਼ਮਾਨਤ ਦੇ ਦਿੱਤੀ।
ਚੀਫ ਜੁਡੀਸ਼ਲ ਮੈਜਿਸਟਰੇਟ ਨੇ ਕਿਹਾ, ਦੋਸ਼ੀ ਨੂੰ 15 ਦਿਨਾਂ ਦੇ ਅੰਦਰ ਪਵਿੱਤਰ ਕੁਰਾਨ ਦੀਆਂ ਪੰਜ ਕਾਪੀਆਂ ਵੰਡਣੀਆਂ ਪੈਣਗੀਆਂ। ਜੇ ਇਸ ਦੀ ਪਾਲਣਾ ਨਾ ਕੀਤੀ ਤਾਂ ਜ਼ਮਾਨਤ ਰੱਦ ਹੋ ਸਕਦੀ ਹੈ। ਸੱਤ ਹਜ਼ਾਰ ਰੁਪਏ ਦੇ ਦੋ ਨਿੱਜੀ ਬਾਂਡ ਜਮ੍ਹਾਂ ਕਰਨ ਮਗਰੋਂ ਕੱਲ੍ਹ ਰਿਚਾ ਜੇਲ੍ਹ ਤੋਂ ਬਾਹਰ ਆ ਗਈ ਹੈ। ਇਸ ਆਦੇਸ਼ ਦੇ ਮੁਤਾਬਕ ਕੁਰਾਨ ਦੀ ਇਕ ਕਾਪੀ ਸ਼ਿਕਾਇਤ ਕਰਤਾ ਸਦਰ ਅੰਜੁਮਨ ਕਮੇਟੀ, ਪਿਠੋਰੀਆ ਅਤੇ ਹੋਰ ਚਾਰ ਕਾਪੀਆਂ ਰਾਂਚੀ ਦੀ ਸਰਕਾਰੀ ਯੂਨੀਵਰਸਿਟੀ ਜਾਂ ਕਾਲਜ ਜਾਂ ਸਕੂਲਾਂ 'ਚ ਵੰਡਣੀਆਂ ਪੈਣਗੀਆਂ। ਕੁਰਾਨ ਦੀ ਕਾਪੀ ਵੰਡਣ ਵੇਲੇ ਰਾਂਚੀ ਪੁਲਸ ਨੂੰ ਉਚਿਤ ਸੁਰੱਖਿਆ ਹਾਸਲ ਕਰਵਾਉਣ ਦਾ ਆਦੇਸ਼ ਦਿੱਤਾ ਗਿਆ। ਨਾਲ ਅਦਾਲਤ ਨੇ ਇਹ ਆਦੇਸ਼ ਦਿੱਤਾ ਕਿ ਦੋ ਜਣਿਆਂ ਵਿੱਚ ਇਕ ਜ਼ਮਾਨਤਦਾਰ ਇਸ ਦੋਸ਼ੀ ਦੇ ਕਰੀਬੀ ਰਿਸ਼ਤੇਦਾਰ ਬਣਨ।
ਵਰਨਣ ਯੋਗ ਹੈ ਕਿ ਸੋਸ਼ਲ ਸਾਈਟ 'ਤੇ ਇਤਰਾਜ਼ ਯੋਗ ਟਿੱਪਣੀ ਕਰਨ ਬਾਰੇ 12 ਜੁਲਾਈ ਨੂੰ ਸਦਰ ਅੰਜੁਮਨ ਕਮੇਟੀ, ਪਿਠੋਰੀਆ ਨੇ ਕੇਸ ਦਰਜ ਕਰਵਾਇਆ ਸੀ। ਸ਼ਿਕਾਇਤ ਕਰਤਾ ਨੇ ਕਿਹਾ ਸੀ ਕਿ ਪਿਛਲੇ ਤਿੰਨ ਦਿਨਾਂ ਤੋਂ ਰਿਚਾ ਫੇਸਬੁੱਕ 'ਤੇ ਧਰਮ ਵਿਸ਼ੇਸ਼ ਖਿਲਾਫ ਇਤਰਾਜ਼ ਯੋਗ ਟਿੱਪਣੀ ਕਰ ਰਹੀ ਹੈ ਅਤੇ ਇਸ ਨੂੰ ਪ੍ਰਚਾਰਤ ਕਰ ਰਹੀ ਹੈ। ਇਸ ਨਾਲ ਇਲਾਕੇ 'ਚ ਕਦੀ ਵੀ ਧਾਰਮਿਕ ਭਾਵਨਾ ਭੜਕ ਸਕਦੀ ਹੈ। ਮਾਮਲਾ ਦਰਜ ਹੋਣ ਦੇ ਤਿੰਨ ਘੰਟੇ ਅੰਦਰ ਰਿਚਾ ਭਾਰਤੀ ਨੂੰ ਪੁਲਸ ਨੇ ਗ੍ਰਿਫਤਾਰ ਕਰਕੇ ਜੇਲ੍ਹ ਭੇਜ ਦਿੱਤਾ ਸੀ।