ਵਾਸਿ਼ੰਗਟਨ, 15 ਜੁਲਾਈ (ਪੋਸਟ ਬਿਊਰੋ) : ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਵੱਲੋਂ ਵੀਕੈਂਡ ਉੱਤੇ ਦਿੱਤੇ ਗਏ ਬੜੇ ਹੀ ਨਸਲੀ ਕਿਸਮ ਦੇ ਬਿਆਨ ਉੱਤੇ ਅਜੇ ਵੀ ਉੱਘੇ ਰਿਪਬਲਿਕਨਜ਼ ਚੁੱਪ ਧਾਰੀ ਬੈਠੇ ਹਨ। ਟਰੰਪ ਨੇ ਸਾਫ ਲਫਜ਼ਾਂ ਵਿੱਚ ਇਹ ਆਖਿਆ ਸੀ ਕਿ ਕਾਂਗਰਸ ਵਿੱਚ ਸ਼ਾਮਲ ਵੱਖ ਵੱਖ ਨਸਲਾਂ ਦੀਆਂ ਚਾਰ ਮਹਿਲਾਵਾਂ ਨੂੰ ਆਪੋ ਆਪਣੇ ਦੇਸ਼ ਮੁੜ ਜਾਣਾ ਚਾਹੀਦਾ ਹੈ। ਭਾਵੇਂ ਉੱਘੇ ਰਿਪਬਲਿਕਨਜ਼ ਇਸ ਬਾਰੇ ਚੁੱਪ ਵੱਟੀ ਬੈਠੇ ਹਨ ਪਰ ਪਾਰਟੀ ਵਿੱਚ ਟਰੰਪ ਦੇ ਇਸ ਬਿਆਨ ਉੱਤੇ ਪ੍ਰਤੀਕਿਰਿਆ ਸ਼ੁਰੂ ਹੋ ਗਈ ਹੈ।
ਕਈ ਜੀਓਪੀ ਸੈਨੇਟਰਜ਼ ਤੇ ਕੁੱਝ ਹਾਊਸ ਰਿਪਬਲਿਕਨਜ਼ ਦਾ ਕਹਿਣਾ ਹੈ ਕਿ ਇਸ ਵਾਰੀ ਤਾਂ ਟਰੰਪ ਨੇ ਸਾਰੀਆਂ ਹੱਦਾਂ ਹੀ ਪਾਰ ਕਰ ਲਈਆਂ ਹਨ। ਪਰ ਅਜੇ ਤੱਕ ਇਹ ਸਪਸ਼ਟ ਨਹੀਂ ਹੋ ਸਕਿਆ ਹੈ ਕਿ ਟਰੰਪ ਨੂੰ ਇਸ ਦਾ ਕੋਈ ਸਖ਼ਤ ਵਿਰੋਧ ਬਰਦਾਸ਼ਤ ਕਰਨਾ ਪੈ ਰਿਹਾ ਹੈ ਜਾਂ ਨਹੀਂ। ਸੈਨੇਟ ਮੈਜੌਰਿਟੀ ਲੀਡਰ ਮਿੱਚ ਮੈਕੌਨਲ ਨੇ ਇਸ ਮੁੱਦੇ ਉੱਤੇ ਵਿਚਾਰ ਵਟਾਂਦਰਾ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਉਨ੍ਹਾਂ ਆਖਿਆ ਕਿ ਉਹ ਮੰਗਲਵਾਰ ਨੂੰ ਕੀਤੀ ਜਾਣ ਵਾਲੀ ਨਿਊਜ਼ ਕਾਨਫਰੰਸ ਵਿੱਚ ਹੀ ਸਾਰਿਆਂ ਦੇ ਸਵਾਲਾਂ ਦੇ ਜਵਾਬ ਦੇਣਗੇ।
ਪਾਰਟੀ ਦੀ ਲੀਡਰਸਿ਼ਪ ਦੌੜ ਦੇ ਮੈਂਬਰ ਸੈਨੇਟਰ ਜੌਹਨ ਕੌਰਨਿਨ ਨੇ ਆਖਿਆ ਕਿ ਇਹ ਗਲਤੀ ਹੋ ਸਕਦੀ ਹੈ ਤੇ ਅਸਲ ਵਿੱਚ ਟਰੰਪ ਦੇ ਕਹਿਣ ਦਾ ਮਤਲਬ ਕੁੱਝ ਹੋਰ ਹੋ ਸਕਦਾ ਹੈ। ਉਨ੍ਹਾਂ ਆਖਿਆ ਕਿ ਉਨ੍ਹਾਂ ਨੂੰ ਨਹੀਂ ਲੱਗਦਾ ਕਿ ਰਾਸ਼ਟਰਪਤੀ ਨਸਲਵਾਦੀ ਹਨ। ਸਾਊਥ ਕੈਰੋਲੀਨਾ ਤੋਂ ਸਿਆਹ ਨਸਲ ਦੇ ਇੱਕਮਾਤਰ ਰਿਪਬਲਿਕਨ ਸੈਨੇਟਰ ਟਿੰਮ ਸਕੌਟ ਨੇ ਆਖਿਆ ਕਿ ਟਰੰਪ ਵੱਲੋਂ ਅਸਵੀਕਾਰਨਯੋਗ ਨਿਜੀ ਹਮਲੇ ਕੀਤੇ ਗਏ ਹਨ ਤੇ ਉਨ੍ਹਾਂ ਵੱਲੋਂ ਨਸਲੀ ਭਾਸ਼ਾ ਦੀ ਵਰਤੋਂ ਵੀ ਕੀਤੀ ਗਈ ਹੈ। ਸੈਨੇਟਰ ਸੂਜ਼ਨ ਕੌਲਿਨਜ਼, ਜਿਨ੍ਹਾਂ ਨੂੰ 2020 ਵਿੱਚ ਟਰੰਪ ਦੇ ਨਾਲ ਸਖ਼ਤ ਮੁਕਾਬਲੇਬਾਜ਼ੀ ਦਾ ਸਾਹਮਣਾ ਕਰਨਾ ਹੋਵੇਗਾ, ਨੇ ਆਖਿਆ ਕਿ ਰਾਸ਼ਟਰਪਤੀ ਵੱਲੋਂ ਕੀਤੀਆਂ ਟਿੱਪਣੀਆਂ ਵਿੱਚ ਹੱਦ ਪਾਰ ਕੀਤੀ ਗਈ ਹੈ।
ਓਹਾਇਓ ਤੋਂ ਰਿਪਬਲਿਕਨ ਮਾਈਕ ਟਰਨਰ ਨੇ ਆਖਿਆ ਕਿ ਰਾਸ਼ਟਰਪਤੀ ਵੱਲੋਂ ਕੀਤੇ ਗਏ ਟਵੀਟ ਨਸਲੀ ਹਨ ਤੇ ਟਰੰਪ ਨੂੰ ਇਸ ਲਈ ਮੁਆਫੀ ਮੰਗਣੀ ਚਾਹੀਦੀ ਹੈ। ਅਲਾਸਕਾ ਤੋਂ ਮੌਡਰੇਟ ਰਿਪਬਲਿਕਨ ਸੈਨੇਟਰ ਲੀਜ਼ਾ ਮੁਰਕੋਵਸਕੀ ਨੇ ਆਖਿਆ ਕਿ ਟਰੰਪ ਦੀਆਂ ਅਜਿਹੀਆਂ ਟਿੱਪਣੀਆਂ ਲਈ ਕਿਸੇ ਵੱਲੋਂ ਵੀ ਕੋਈ ਸਫਾਈ ਨਹੀਂ ਦਿੱਤੀ ਜਾਣੀ ਚਾਹੀਦੀ। ਇਸ ਤਰ੍ਹਾਂ ਦੀਆਂ ਟਿੱਪਣੀਆਂ ਸਵੀਕਾਰਯੋਗ ਨਹੀਂ ਹਨ ਤੇ ਇਹ ਬੰਦ ਹੋਣੀਆਂ ਚਾਹੀਦੀਆਂ ਹਨ।