ਨਿਊ ਯਾਰਕ, 15 ਜੁਲਾਈ (ਪੋਸਟ ਬਿਊਰੋ)- ਨਿਊ ਯਾਰਕ ਵਿੱਚ ਕੱਲ੍ਹ ਅਚਾਨਕ ਬਿਜਲੀ ਚਲੀ ਗਈ ਅਤੇ ਪੂਰਾ ਸ਼ਹਿਰ ਹਨੇਰੇ ਵਿੱਚ ਡੁੱਬ ਗਿਆ। ਇਸ ਨਾਲ 50 ਹਜ਼ਾਰ ਤੋਂ ਵੱਧ ਲੋਕ ਪ੍ਰਭਾਵਤ ਹੋਏ, ਜਿਨ੍ਹਾਂ ਵਿੱਚ ਸਭ ਤੋਂ ਵੱਧ ਮਿਡਟਾਊਨ ਮੈਨਹਟਨ ਅਤੇ ਅਪਰ ਵੈਸਟ ਇਲਾਕੇ ਦੇ ਹਨ।
ਖਬਰ ਏਜੰਸੀ ਦੇ ਅਨੁਸਾਰ ਬਿਜਲੀ ਸੇਵਾ ਕੰਪਨੀ ਕਾਨ ਐਡਸਨ ਨੇ ਦੱਸਿਆ ਕਿ ਰਾਤ 8.30 ਵਜੇ ਅਚਾਨਕ ਬਿਜਲੀ ਚਲੀ ਜਾਣ ਨਾਲ ਦੱਖਣ ਦੀ 40ਵੀਂ ਸਟਰੀਟ ਤੋਂ ਉਤਰ ਵਿੱਚ 72ਵੀਂ ਸਟਰੀਟ ਤੱਕ ਅਤੇ ਪੰਜਵੇਂ ਐਵੇਨਿਊ ਤੋਂ ਹਡਸਨ ਨਦੀ ਤੱਕ ਫੈਲੇ ਖੇਤਰ ਪ੍ਰਭਾਵਤ ਹੋਏ। ਨਤੀਜੇ ਵਜੋਂ ਪ੍ਰਸਿੱਧ ਟਾਈਮ ਸਕੁਵਾਇਰ ਦੇ ਬਿਲਬੋਰਡਸ 'ਚ ਹਨੇਰਾ ਛਾ ਗਿਆ। ਸਥਾਨਕ ਮੀਡੀਆ ਦੀ ਰਿਪੋਰਟ ਅਨੁਸਾਰ ਹੇਲਸ ਕਿਚਨ ਦੇ ਸਾਰੇ ਰੈਸਟੋਰੈਂਟ ਵੀ ਹਨੇਰੇ 'ਚ ਡੁੱਬ ਗਏ ਤੇ ਸ਼ਹਿਰ ਦੇ ਪ੍ਰਭਾਵਤ ਹਿੱਸਿਆਂ 'ਚ ਸਟਰੀਟ ਲਾਈਟਾਂ ਬੰਦ ਹੋ ਗਈਆਂ। ਬਿਜਲੀ ਨਾ ਹੋਣ ਦੇ ਕਾਰਨ ਸ਼ਹਿਰ ਦੇ ਸਬ ਵੇਅ ਸਿਸਟਮ ਵੀ ਕਾਫੀ ਹੱਦ ਤੱਕ ਪ੍ਰਭਾਵਤ ਰਹੇ ਅਤੇ ਚਾਰ ਸਟੇਸ਼ਨਾਂ ਨੂੰ ਬਿਜਲੀ ਨਾ ਹੋਣ ਕਾਰਨ ਬੰਦ ਕਰ ਦਿੱਤਾ ਗਿਆ। ਨਿਊ ਯਾਰਕ ਸ਼ਹਿਰ ਦੇ ਮੇਅਰ ਬਿਲ ਬਲਾਸਿਓ ਨੇ ਟਵੀਟ ਕੀਤਾ ਕਿ ਮੈਨਹੋਲ ਦੀ ਅੱਗ ਨਾਲ ਹੋਏ ਬਲੈਕਆਊਟ ਨੂੰ ਠੀਕ ਕਰਨ ਲਈ ਐਨ ਵਾਈ ਸੀ ਆਫਤ ਪ੍ਰਬੰਧ, ਪੁਲਸ, ਫਾਇਰ ਵਿਭਾਗ ਸ਼ਹਿਰ ਦੀਆਂ ਏਜੰਸੀਆਂ ਨਾਲ ਮਿਲ ਕੇ ਕੰਮ ਕਰ ਰਿਹਾ ਹੈ।