ਪੰਜਾਬੀ ਪੋਸਟ ਸੰਪਾਦਕੀ
ਬੀਤੇ ਹਫਤੇ ਟੋਰਾਂਟੋ ਵਿੱਚ ਪ੍ਰੈਕਟਿਸ ਕਰਦੀ ਵਕੀਲ ਲੀਓਰਾ ਸ਼ੇਮੈਸ਼ (Leora Shemesh) ਨੇ ਪੀਲ ਪੁਲੀਸ, ਕੈਨੇਡਾ ਦੇ ਅਟਾਰਨੀ ਜਨਰਲ, ਡਾਇਰੈਕਟਰ ਆਫ ਪਬਲਿਕ ਪ੍ਰੌਜੀਕਿਊਟਰ ਅਤੇ ਬਰੈਂਪਟਨ ਅਦਾਲਤ ਵਿੱਚ ਤਾਇਨਾਤ ਚਾਰ ਸਰਕਾਰੀ ਵਕੀਲਾਂ ਵਿਰੁੱਧ ਸਵਾ ਮਿਲੀਅਨ ਡਾਲਰ ਦਾ ਮੁੱਕਦਮਾ ਕੀਤਾ ਹੈ। ਵਰਨਣਯੋਗ ਹੈ ਕਿ ਮਈ 2015 ਵਿੱਚ ਪੀਲ ਪੁਲੀਸ ਨੇ ਇਸ ਵਕੀਲ ਖਿਲਾਫ਼ ਅਦਾਲਤ ਵਿੱਚ ਝੂਠ ਬੋਲਣ ਅਤੇ ਇਨਸਾਫ਼ ਪ੍ਰਣਾਲੀ ਦੇ ਰਾਹ ਵਿੱਚ ਰੋੜਾ ਬਣਨ ਦੇ ਚਾਰਜ ਲਾਏ ਸਨ। ਇਸ ਕੇਸ ਨਾਲ ਜੁੜੇ ਤੱਥ ਇਸ ਤਰਾਂ ਦੀ ਕਹਾਣੀ ਦੱਸਦੇ ਹਨ ਕਿ 2009 ਵਿੱਚ ਪੀਲ ਪੁਲੀਸ ਦਾ ਕਾਂਸਟੇਬਲ ਇਆਨ ਡੈਨ (Ian Dann) ਉਹਨਾਂ ਚਾਰ ਪੁਲੀਸ ਅਫ਼ਸਰਾਂ ਵਿੱਚ ਸ਼ਾਮਲ ਸੀ ਜਿਹਨਾਂ ਬਾਰੇ ਅਦਾਲਤ ਨੇ ਫੈਸਲਾ ਦਿੱਤਾ ਸੀ ਕਿ ਇਹਨਾਂ ਨੇ ਲੀਓਰਾ ਸ਼ੇਮੈਸ਼ ਦੇ ਕਲਾਇੰਟ ਨਾਲ ਧੱਕਾ ਮੁੱਕੀ ਕੀਤੀ ਸੀ। ਅਦਾਲਤ ਮੁਤਾਬਕ ਪੁਲੀਸ ਅਫ਼ਸਰਾਂ ਦਾ ਵਤੀਰਾ ਅਤੀਅੰਤ ਗਲਤ ਸੀ। ਫੇਰ ਇਸੇ ਵਕੀਲ ਦੇ ਇੱਕ ਹੋਰ ਕਲਾਇੰਟ ਦਾ ਡਰੱਗ ਟਰੈਫਿਕਿੰਗ ਕੇਸ ਅਦਾਲਤ ਵਿੱਚ ਗਿਆ ਜਿਸ ਵਿੱਚ ਕਾਂਸਟੇਬਲ ਇਆਨ ਡੈਨ ਉੱਤੇ ਦੋਸ਼ ਲੱਗੇ ਕਿ ਉਸਨੇ ਦੋਸ਼ੀ ਦੇ ਘਰ ਦੀ ਸੇਫ਼ ਵਿੱਚੋਂ ਪੈਸੇ ਕੱਢ ਲਏ ਸਨ।
ਵਰਨਣਯੋਗ ਹੈ ਕਿ ਇਸ ਪੁਲੀਸ ਅਫ਼ਸਰ ਦੇ ਗਲਤ ਵਤੀਰੇ ਕਾਰਣ ਲੀਓਰਾ ਦੇ ਕਲਾਇੰਟ ਨੂੰ ਕੋਈ ਜੇਲ੍ਹ ਨਹੀਂ ਸੀ ਹੋਈ ਹਾਲਾਂਕਿ ਉਸ ਕੋਲੋਂ 3 ਕਿਲੋ ਕੋਕੇਨ ਫੜੀ ਗਈ ਸੀ ਅਤੇ ਉਸਨੇ ਆਪਣਾ ਦੋਸ਼ ਕਬੂਲ ਕੀਤਾ ਸੀ। ਅਦਾਲਤ ਨੇ ਫੈਸਲੇ ਵਿੱਚ ਕਿਹਾ ਸੀ ਕਿ ਪੁਲੀਸ ਅਫ਼ਸਰ ਇਆਨ ਡੈਨ ਵੱਲੋਂ ਪੈਸੇ ਕੱਢ ਲੈਣ ਕਾਰਣ ਡਰੱਗ ਟਰੈਫਿਕਿੰਗ ਕਰਨ ਵਾਲਾ ਟੈਨ-ਹੁੰਗ-ਡਿਨ੍ਹ (Tan-Hung Dinh) 5 ਤੋਂ 8 ਸਾਲ ਦੀ ਕੈਦ ਹੋਣ ਤੋਂ ਵਾਲ ਵਾਲ ਬਚ ਗਿਆ ਹੈ। ਕਿਹਾ ਜਾਂਦਾ ਹੈ ਕਿ ਆਪਣੇ ਗਿਰੇਵਾਨ ਵਿੱਚ ਝਾਕਣ ਦੀ ਥਾਂ ਪੁਲੀਸ ਨੇ ਵਕੀਲ ਲੀਓਰਾ ਉੱਤੇ ਸਿ਼ਕੰਜਾ ਕੱਸਣ ਦੀ ਤਿਆਰੀ ਵਿੱਢ ਲਈ। ਪੀਲ ਪੁਲੀਸ ਵੱਲੋਂ ਬਾਅਦ ਵਿੱਚ ਲੀਓਰਾ ਉੱਤੇ ਚਾਰਜ ਲਾਏ ਗਏ ਕਿ ਉਸਨੇ ਪੁਲੀਸ ਅਫ਼ਸਰ ਡੈਨ ਦੇ ਅਕਸ ਨੂੰ ਖਰਾਬ ਕਰਨ ਲਈ ਝੂਠ ਅਫਵਾਹ ਫੈਲਾਈ ਕਿ ਉਸ ਕੋਲ ਡੈਨ ਵੱਲੋਂ ਪੈਸੇ ਚੋਰੀ ਕਰਨ ਦੀ ਵੀਡੀਓ ਹੈ। ਜੂਨ 2018 ਵਿੱਚ ਲੀਓਰਾ ਦੀ ਵਕੀਲ ਮਰੀ ਹਨੀਨ (Marie Henien) ਨੇ ਅਜਿਹੇ ਤਰਕ ਦਿੱਤੇ ਕਿ ਡੀਫੈਂਸ ਪ੍ਰੌਜ਼ੀਕਿਊਟਰਾਂ ਨੂੰ ਮੁੱਕਦਮਾ ਵਾਪਸ ਲੈਣਾ ਪਿਆ ਸੀ। ਪੁਲੀਸ ਅਫ਼ਸਰ ਇਆਨ ਡੈਨ ਨੇ ਬਾਅਦ ਵਿੱਚ ਅਦਾਲਤ ਵਿੱਚ ਕਬੂਲ ਕੀਤਾ ਸੀ ਕਿ ਉਸਨੇ ਲੀਓਰਾ ਦੇ ਕਲਾਇੰਟ ਦੀ ਸੇਫ਼ ਵਿੱਚੋਂ ਪੈਸੇ ਕੱਢੇ ਸਨ।
ਮਰੀ ਹਨੀਨ ਉਹੀ ਵਕੀਲ ਹੈ ਜਿਸਨੇ ਥੋੜੇ ਦਿਨ ਪਹਿਲਾਂ ਕੈਨੇਡੀਅਨ ਨੇਵੀ ਦੇ ਵਾਈਸ ਐਡਮਿਰਲ ਮਾਰਕ ਨੌਰਮਨ ਦੇ ਕੇਸ ਵਿੱਚ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਸਮੇਤ ਸਮੁੱਚੀ ਫੈਡਰਲ ਸਰਕਾਰ ਨੂੰ ਇੱਕ ਕਿਸਮ ਨਾਲ ਵਖ਼ਤ ਪਾ ਦਿੱਤਾ ਸੀ। ਸੀ ਬੀ ਸੀ ਰੇਡੀਓ ਸ਼ੋਅ ਹੋਸਟ ਜਿਆਨ ਗੋਮੇਸ਼ੀ ਦਾ ਕੇਸ ਵੀ ਇਸ ਵਕੀਲ ਨੇ ਹੀ ਲੜਿਆ ਸੀ। ਹੁਣ ਆਪਣੇ ਸਵਾ ਮਿਲੀਅਨ ਡਾਲਰ ਹਰਜਾਨੇ ਦੇ ਕੇਸ ਵਿੱਚ ਲੀਓਰਾ ਵੱਲੋਂ ਦੋਸ਼ ਲਾਇਆ ਗਿਆ ਹੈ ਕਿ ਆਪਣੀਆਂ ਖਾਮੀਆਂ ਨੂੰ ਛੁਪਾਉਣ ਲਈ ਅਤੇ ਬਦਲੇ ਦੀ ਭਾਵਨਾ ਤਹਿਤ ਪੀਲ ਪੁਲੀਸ ਅਤੇ ਸਰਕਾਰੀ ਵਕੀਲ (ਪ੍ਰੌਜ਼ੀਕਿਊਟਰ) ਉਸ ਪਿੱਛੇ ਹੱਥ ਧੋ ਕੇ ਪਏ ਹੋਏ ਸਨ।
ਵਕਾਲਤ ਦੇ ਕਿੱਤੇ ਵਿੱਚ ਆਉਣ ਤੋਂ ਪਹਿਲਾਂ ਲੀਓਰਾ ਸ਼ੇਮੈਸ਼ ਕੈਨੇਡਾ ਦੀ ਫਿਗਰ ਸਕੇਟਿੰਗ ਟੀਮ ਦੀ ਮੈਂਬਰ ਹੁੰਦੀ ਸੀ। ਵਕਾਲਤ ਦੇ ਪ੍ਰੋਫੈਸ਼ਨਲ ਸਰਕਲਾਂ ਵਿੱਚ ਉਸਦੁ ਅਤਿ ਦੀ ਗੰਭੀਰ ਅਕਸ ਵਾਲੀ ਅਤੇ ਆਪਣੇ ਵਿਰੋਧੀਆਂ ਨੂੰ ਕਰੜੇ ਹੱਥੀਂ ਲੈਣ ਲਈ ਜਾਣੀ ਜਾਂਦੀ ਹੈ। ਸਹੀ ਹੈ ਕਿ ਮਰੀ ਹਨੀਨ ਅਤੇ ਲੀਓਰਾ ਸ਼ੇਮੈਸ਼ ਵਰਗੀਆਂ ਔਰਤਾਂ ਕਿੱਤੇ ਵਜੋਂ ਵਕੀਲ ਹੋਣ ਅਤੇ ਆਪਣੇ ਹੱਕਾਂ ਦੀ ਜਾਣਕਾਰੀ ਰੱਖਣ ਕਾਰਣ ਪੁਲੀਸ ਅਫ਼ਸਰਾਂ ਅਤੇ ਸਰਕਾਰੀ ਵਕੀਲਾਂ ਨਾਲ ਮੱਥਾ ਲਾ ਲੈਂਦੀਆਂ ਹਨ। ਪਰ ਸੁਆਲ ਹੈ ਕਿ ਉਸ ਸਾਧਾਰਣ ਵਿਅਕਤੀ ਲਈ ਇਨਸਾਫ਼ ਹਾਸਲ ਕਰਨਾ ਕਿੰਨਾ ਮੁਸ਼ਕਲ ਹੋ ਸਕਦਾ ਹੈ ਜਿਸਨੂੰ ਪੁਲੀਸ ਅਤੇ ਸਰਕਾਰੀ ਵਕੀਲ ਆਪਣੇ ਰਾਹ ਦਾ ਰੋੜਾ ਸਮਝਣ ਲੱਗ ਪੈਣ।