ਵਾਰਾਣਸੀ, 21 ਜੂਨ (ਪੋਸਟ ਬਿਊਰੋ)- ਆਰ ਐੱਸ ਐੱਸ ਦੇ ਮੁਖੀ ਮੋਹਨ ਭਾਗਵਤ ਤੇ ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਆਦਿਤਿਆ ਨਾਥ ਵਿਰੁੱਧ ਸੋਸ਼ਲ ਮੀਡੀਆ ਉਤੇ ਇਤਰਾਜ਼ ਯੋਗ ਗੱਲਾਂ ਲਿਖਣ ਵਾਲੀ ਪੰਜਾਬੀ ਗਾਇਕਾ, ਰੈਪਰ ਤੇ ਅਭਿਨੇਤਰੀ ਹਾਰਡ ਕੌਰ ਵਿਰੁੱਧ ਵਾਰਾਣਸੀ ਦੇ ਕੈਂਟ ਥਾਣੇ ਵਿੱਚ ਦੇਸ਼ ਧਰੋਹ ਦਾ ਕੇਸ ਦਰਜ ਕੀਤਾ ਗਿਆ ਹੈ। ਇੱਕ ਵਕੀਲ ਸ਼ਸ਼ਾਂਕ ਸ਼ੇਖਰ ਤਿ੍ਰਪਾਠੀ ਨੇ ਇਹ ਮਾਮਲਾ ਦਰਜ ਕਰਵਾਇਆ ਹੈ।
ਇਸ ਕੇਸ ਦੇ ਮੁਤਾਬਕ ਹਾਰਡ ਕੌਰ ਦੇ ਪੋਸਟ ਕਾਰਨ ਲੋਕਾਂ ਦੀਆਂ ਭਾਵਨਾਵਾਂ ਨੂੰ ਸੱਟ ਵੱਜੀ ਹੈ। ਕੈਂਟ ਪੁਲਸ ਨੇ ਧਾਰਾ 153 ਏ, 124 ਏ, 500, 505 ਅਤੇ 66 ਆਈ ਟੀ ਐਕਟ ਅਧੀਨ ਇਹ ਮਾਮਲਾ ਦਰਜ ਕੀਤਾ ਹੈ। 124 ਏ ਦੇਸ਼ ਧਰੋਹ ਨਾਲ ਜੁੜੀ ਧਾਰਾ ਹੈ। ਵਰਨਣ ਯੋਗ ਹੈ ਕਿ ਹਾਰਡ ਕੌਰ ਨੇ ਮੋਹਨ ਭਾਗਵਤ ਨੂੰ ਨਾ ਸਿਰਫ ਜਾਤੀਵਾਦੀ ਹੀ ਕਿਹਾ, ਸਗੋਂ ਦੇਸ਼ ਵਿੱਚ ਹੋਣ ਵਾਲੀਆਂ ਵੱਡੀਆਂ ਅੱਤਵਾਦੀ ਘਟਨਾਵਾਂ ਲਈ ਵੀ ਉਨ੍ਹਾਂ ਨੂੰ ਅਤੇ ਆਰ ਐੱਸ ਐੱਸ ਨੂੰ ਜ਼ਿੰਮੇਵਾਰ ਕਰਾਰ ਦਿੱਤਾ। ਮਾਮਲਾ 26/11 ਦੇ ਮੁੰਬਈ ਹਮਲੇ ਦਾ ਹੋਵੇ ਜਾਂ ਪੁਲਵਾਮਾ ਵਿਖੇ ਸੀ ਆਰ ਪੀ ਐੱਫ ਜਵਾਨਾਂ 'ਤੇ ਹਮਲੇ ਦਾ, ਹਾਰਡ ਕੌਰ ਵੱਖ-ਵੱਖ ਪੋਸਟਾਂ ਲਿਖਤੀ ਰਹਿੰਦੀ ਹੈ। ਇਸ ਵਾਰ ਤਾਂ ਯੋਗੀ ਆਦਿੱਤਿਆਨਾਥ ਅਤੇ ਮੋਹਨ ਭਾਗਵਤ ਬਾਰੇ ਲਿਖੀਆਂ ਟਿੱਪਣੀਆਂ ਲਈ ਉਸ ਨੂੰ ਸੋਸ਼ਲ ਮੀਡੀਆ 'ਤੇ ਬਹੁਤ ਝਾੜ ਪਈ ਹੈ। ਬ੍ਰਿਟੇਨ ਰਹਿੰਦੀ ਹਾਰਡ ਕੌਰ ਨੇ ਕੁਝ ਸਮਾਂ ਪਹਿਲਾਂ ਯੋਗੀ ਦੀ ਤਸਵੀਰ ਸ਼ੇਅਰ ਕਰਕੇ ਉਨ੍ਹਾਂ ਨੂੰ ਰੇਪਿਸਟ ਅਤੇ ਮੋਹਨ ਭਾਗਵਤ ਨੂੰ ਅੱਤਵਾਦੀ ਕਿਹਾ ਸੀ। ਇਸ ਤੋਂ ਕਾਫੀ ਵਿਵਾਦ ਛਿੜਿਆ ਪਿਆ ਹੈ।