ਵਾਸ਼ਿੰਗਟਨ, 19 ਜੂਨ, (ਪੋਸਟ ਬਿਊਰੋ)- ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸਾਲ 2020 ਵਿੱਚ ਹੋ ਰਹੀਆਂ ਰਾਸ਼ਟਰਪਤੀ ਚੋਣਾਂ ਲਈ ਅੱਜ ਫਲੋਰੀਡਾ ਵਿੱਚ ਵੱਡੀ ਰੈਲੀ ਕਰ ਕੇ ਆਪਣੀ ਚੋਣ ਮੁਹਿੰਮ ਸ਼ੁਰੂ ਕਰ ਦਿੱਤੀ ਹੈ। ਔਰਲੈਂਡੋ ਸ਼ਹਿਰ ਵਿੱਚ ਇਸ ਰੈਲੀ ਵਿੱਚ ਜੁੜੀ ਹਜ਼ਾਰਾਂ ਦੀ ਭੀੜ ਸਾਹਮਣੇ 73 ਸਾਲਾ ਡੋਨਾਲਡ ਟਰੰਪ ਨੇ ‘ਕੀਪ ਅਮਰੀਕਾ ਗ੍ਰੇਟ` ਯਾਨੀ ਅਮਰੀਕਾ ਨੂੰ ਮਹਾਨ ਬਣਾਈ ਰੱਖਣ ਦਾ ਨਾਅਰਾ ਦਿੱਤਾ ਅਤੇ ਆਪਣੇ ਪੁਰਾਣੇ ਜਾਣੇ ਜਾਂਦੇ ਅੰਦਾਜ਼ ਵਿੱਚ ਕਿਹਾ ਕਿ ਅਗਲੇ ਸਾਲ ਦੀ ਚੋਣ ਉਨ੍ਹਾਂ ਲੋਕਾਂ ਦਾ ਫ਼ੈਸਲਾ ਕਰੇਗੀ, ਜਿਨ੍ਹਾਂ ਨੇ ਗ਼ੈਰ-ਅਮਰੀਕੀਆਂ ਵਾਂਗ ਵਿਹਾਰ ਕੀਤਾ ਤੇ ਸਾਡੇ ਮਹਾਨ ਲੋਕਤੰਤਰ ਨੂੰ ਕਮਜ਼ੋਰ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ।
ਇਸ ਰੈਲੀ ਵਿੱਚ ਡੋਨਾਲਡ ਟਰੰਪ ਦੀ ਰਿਪਬਲਿਕਨ ਪਾਰਟੀ ਦੇ ਵਰਕਰਾਂ ਨੇ ‘ਮੇਕ ਅਮਰੀਕਾ ਗ੍ਰੇਟ ਅਗੇਨ` ਲਿਖੀ ਕੈਪ ਪਾਈ ਹੋਈ ਸੀ। ਟਰੰਪ ਨੇ ਇਸ ਮੌਕੇ ਆਪਣੇ ਰਾਜ ਦੀਆਂ ਪ੍ਰਾਪਤੀਆਂ ਦੱਸੀਆਂ। ਟੈਕਸ ਕਟੌਤੀ ਤੇ ਵਧਦੇ ਅਰਥਚਾਰੇ ਲਈ ਉਨ੍ਹਾਂ ਨੇ ਆਪਣੀ ਸਰਕਾਰ ਦੀ ਪਿੱਠ ਠੋਕੀ, ਪਰ ਦੂਸਰੀ ਵਾਰੀ ਰਾਜ ਕਰਨ ਲਈ ਉਨ੍ਹਾਂ ਕਿਸੇ ਨਵੇਂ ਏਜੰਡੇ ਜਾਂ ਨੀਤੀ ਦਾ ਜ਼ਿਕਰ ਨਹੀਂ ਕੀਤਾ। ਟਰੰਪ ਨੇ ਵਿਰੋਧੀ ਡੈਮੋਕ੍ਰੇਟਿਕ ਪਾਰਟੀ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਕਿਹਾ ਕਿ ਵਿਰੋਧੀ ਧਿਰ ਸਾਡੇ ਦੇਸ਼ ਦੀਆਂ ਕਦਰਾਂ-ਕੀਮਤਾਂ ਨੂੰ ਨਫ਼ਰਤ ਕਰਦੀ ਹੈ। ਉਨ੍ਹਾਂ ਨੇ ਸਾਬਕਾ ਉਪ ਰਾਸ਼ਟਰਪਤੀ ਤੇ ਇਸ ਚੋਣ ਵਿੱਚ ਡੈਮੋਕ੍ਰੇਟਿਕ ਪਾਰਟੀ ਤੋਂ ਰਾਸ਼ਟਰਪਤੀ ਉਮੀਦਵਾਰ ਬਣਨ ਵਾਲੀ ਦੌੜ ਵਿੱਚ ਸ਼ਾਮਲ ਜੋ ਬਿਡੇਨ ਦਾ ਮਜ਼ਾਕ ਉਡਾਇਆ। ਟਰੰਪ ਨੇ ਰੂਸ ਨਾਲ ਸਾਂਝ ਦੇ ਸੰਬੰਧ ਵਿੱਚ ਆਪਣੇ ਖ਼ਿਲਾਫ਼ ਹੋਈ ਜਾਂਚ ਦੀ ਆਲੋਚਨਾ ਵੀ ਕੀਤੀ ਤੇ ਕਿਹਾ ਕਿ ਵਿਸ਼ੇਸ਼ ਕੌਂਸਲਰ ਰਾਬਰਟ ਮੂਲਰ ਅਤੇ ਉਨ੍ਹਾਂ ਨਾਲ ਮਿਲੇ ਹੋਏ ਡੈਮੋਕ੍ਰੇਟ ਜ਼ਬਰਦਸਤੀ ਮੈਨੂੰ ਫਸਾਉਣਾ ਚਾਹੁੰਦੇ ਸਨ, ਪਰ ਜਾਂਚ ਪਿੱਛੋਂ ਉਨ੍ਹਾਂ ਨੂੰ ਮੈਨੂੰ ਦੋਸ਼ਮੁਕਤ ਐਲਾਨਣਾ ਪਿਆ ਸੀ। ਸਾਲ 2016 ਦੀ ਚੋਣ ਵਾਂਗ ਇਸ ਵਾਰ ਵੀ ਨਾਜਾਇਜ਼ ਗ਼ੈਰ-ਪਰਵਾਸੀ ਲੋਕ ਟਰੰਪ ਦੀ ਚੋਣ ਮੁਹਿੰਮ ਦਾ ਪ੍ਰਮੁੱਖ ਮੁੱਦਾ ਬਣਨ ਵਾਲੇ ਹਨ। ਇਸ ਰੈਲੀ ਵਿੱਚ ਟਰੰਪ ਨੇ ਮੈਕਸੀਕੋ ਤੋਂ ਆਉਂਦੇ ਨਾਜਾਇਜ਼ ਪਰਵਾਸੀ ਲੋਕਾਂ ਨੂੰ ਅਮਰੀਕਾ ਦੀ ਸਭ ਤੋਂ ਵੱਡੀ ਸਮੱਸਿਆ ਦੱਸਿਆ ਅਤੇ ਇਸ ਨੂੰ ਹੱਲਾਸ਼ੇਰੀ ਦੇਣ ਕਾਰਨਟਰੰਪ ਨੇ ਡੈਮੋਕ੍ਰੇਟਾਂ ਦੀ ਆਲੋਚਨਾ ਕੀਤੀ ਤੇ ਕਿਹਾ ਕਿ ਉਹ ਮੈਕਸੀਕੋ ਸਰਹੱਦ ਉੱਤੇ ਕੰਧ ਨਹੀਂ ਬਣਨ ਦੇ ਰਹੇ।