ਨਵੀਂ ਦਿੱਲੀ, 19 ਜੂਨ (ਪੋਸਟ ਬਿਊਰੋ)- ਖੁੱਲੇ੍ਹ ਬਾਜ਼ਾਰ ਵਿੱਚ ਕਣਕ ਦੀਆਂ ਕੀਮਤਾਂ ਘੱਟ ਹੋਈਆਂ ਹਨ। ਇਸ ਦੌਰਾਨ ਸਰਕਾਰ ਸਵਾ ਕਰੋੜ ਟਨ ਪੁਰਾਣੀ ਕਣਕ ਬਾਜ਼ਾਰ ਦੇ ਮੁਕਾਬਲੇ ਜ਼ਿਆਦਾ ਭਾਅ 'ਤੇ ਵੇਚਣ ਲੱਗੀ ਹੈ।
ਖੁਰਾਕ ਮੰਤਰਾਲੇ ਦੇ ਇਸ ਐਲਾਨ ਦਾ ਜਿਣਸ ਬਾਜ਼ਾਰ 'ਤੇ ਹਾਲੇ ਕੋਈ ਅਸਰ ਨਹੀਂ ਪਿਆ। ਸਰਕਾਰੀ ਗੁਦਾਮਾਂ 'ਚ ਪਈ ਕਣਕ ਦਾ ਹਾਲੇ ਕੋਈ ਲੈਣਦਾਰ ਨਹੀਂ ਮਿਲ ਰਿਹਾ। ਚਾਲੂ ਹਾੜੀ ਖਰੀਦ ਸੀਜ਼ਨ ਵਿੱਚ ਕਣਕ ਦੀ ਸਰਕਾਰੀ ਖਰੀਦ ਲਗਾਤਾਰ ਜਾਰੀ ਹੈ, ਜਿਸ ਦੇ ਭੰਡਾਰ ਬਾਰੇ ਸਰਕਾਰੀ ਏਜੰਸੀਆਂ ਪ੍ਰੇਸ਼ਾਨੀ ਵਿੱਚ ਹਨ। ਦੂਜੇ ਪਾਸੇ ਇਨ੍ਹਾਂ ਦੇ ਗੁਦਾਮਾਂ ਵਿੱਚ 1.20 ਕਰੋੜ ਟਨ ਕਣਕ ਦਾ ਪੁਰਾਣਾ ਸਟਾਕ ਪਿਆ ਹੈ ਅਤੇ ਉਸ ਨੂੰ ਬਾਹਰ ਕੱਢਣ ਦੀ ਕਾਹਲ ਹੈ। ਬਾਜ਼ਾਰ ਵਿੱਚ ਕਣਕ ਦੀ ਮੰਗ ਨਾ ਹੋਣ ਨਾਲ ਇੰਪੋਰਟ ਸੰਭਵ ਨਹੀਂ। ਸਰਕਾਰੀ ਏਜੰਸੀ ਭਾਰਤੀ ਖੁਰਾਕ ਨਿਗਮ (ਐਫ ਸੀ ਆਈ) ਇਸ ਪੁਰਾਣੇ ਸਟਾਕ ਨੂੰ ਹਰ ਹਾਲਤ ਵਿੱਚ ਖਾਲੀ ਕਰਵਾਉਣਾ ਚਾਹੁੰਦੀ ਹੈ। ਖੁੱਲ੍ਹੇ ਬਾਜ਼ਾਰ ਵਿੱਚ ਵੇਚਣ ਦੀ ਨੀਤੀ ਹੇਠ ਇਕ ਕਰੋੜ ਟਨ ਕਣਕ ਅਤੇ 50 ਲੱਖ ਟਨ ਚੌਲ ਵੇਚਣ ਦੀ ਮਨਜ਼ੂਰੀ ਸਰਕਾਰ ਨੇ ਦੇ ਦਿੱਤੀ ਹੈ, ਪਰ ਇਨ੍ਹਾਂ ਜਿਣਸਾਂ ਲਈ ਤੈਅ ਕੀਤੀਆਂ ਕੀਮਤਾਂ ਖੁੱਲ੍ਹੇ ਬਾਜ਼ਾਰ ਮੁਕਾਬਲੇ ਬਹੁਤ ਵੱਧ ਹੈ। ਇਨ੍ਹਾਂ ਵਿੱਚ ਕਣਕ ਦਾ ਮੁੱਲ 2080 ਤੋਂ 2245 ਰੁਪਏ ਪ੍ਰਤੀ ਕੁਇੰਟਲ ਰੱਖਿਆ ਅਤੇ ਚੌਲ ਲਈ 2785 ਰੁਪਏ ਪ੍ਰਤੀ ਕੁਇੰਟਲ ਭਾਅ ਨਿਸ਼ਚਿਤ ਕੀਤਾ ਹੈ। ਇਸ ਦੇ ਮੁਕਾਬਲੇ ਉਤਪਾਦ ਬਾਜ਼ਾਰਾਂ ਵਿੱਚ ਕਣਕ ਦਾ ਭਾਅ ਕਿਸੇ ਵੀ ਹਾਲਤ ਘੱਟੋ ਘੱਟ ਸਮਰਥਨ ਮੁੱਲ ਤੋਂ ਵੱਧ ਨਹੀਂ ਹੈ। ਸਰਕਾਰ ਦੀ ਪੁਰਾਣੀ ਕਣਕ ਦਾ ਮੁੱਲ ਖੁੱਲ੍ਹੇ ਬਾਜ਼ਾਰ ਨਾਲੋਂ ਲਗਭਗ ਡੇਢ ਗੁਣਾ ਹੈ। ਖੁਰਾਕ ਖਾਧ ਮੰਤਰਾਲੇ ਦੇ ਇਕ ਅਧਿਕਾਰੀ ਨੇ ਦੱਸਿਆ ਕਿ ਪੁਰਾਣੇ ਸਟਾਕ ਵਾਲੀ ਕਣਕ ਦਾ ਮੁੱਲ ਉਸ ਦੀ ਸੰਭਾਲ ਦੇ ਖਰਚ ਨੂੰ ਜੋੜ ਕੇ ਤੈਅ ਕੀਤਾ ਹੈ। ਸਰਕਾਰੀ ਸਟਾਕ ਵਿੱਚ ਫਿਲਹਾਲ 1.20 ਕਰੋੜ ਟਨ ਪੁਰਾਣੀ ਕਣਕ ਦੇ ਨਾਲ ਚਾਲੂ ਸੀਜ਼ਨ ਵਿੱਚ ਕੁੱਲ 4.65 ਕਰੋੜ ਟਨ ਕਣਕ ਹੈ। ਜਦ ਕਿ ਪਿਛਲੀ ਸਾਉਣੀ ਸੀਜ਼ਨ ਦੇ ਚੌਲ ਦਾ ਸਟਾਕ ਗੁਦਾਮਾਂ ਵਿੱਚ 2.75 ਕਰੋੜ ਟਨ ਹੈ।