ਪੈਰਿਸ, 19 ਜੂਨ (ਪੋਸਟ ਬਿਊਰੋ)- ਯੂਰਪੀਅਨ ਫੁੱਟਬਾਲ ਵਾਸਤੇ ਚੋਟੀ ਦੀ ਸੰਸਥਾ ਯੂਏਫਾ ਦੇ ਸਾਬਕਾ ਮੁਖੀ ਮਿਸ਼ੇਲ ਪਲਾਟੀਨੀ ਨੂੰ ਅਗਲੇ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਕਤਰ ਨੂੰ ਸੌਂਪਣ ਦੀ ਜਾਂਚ ਦੌਰਾਨ ਗ੍ਰਿਫਤਾਰ ਕੀਤਾ ਗਿਆ ਹੈ।
ਫਰਾਂਸ ਦੇ ਦਿੱਗਜ ਫੁੱਟਬਾਲਰ ਰਹੇ ਪਲਾਟੀਨੀ ਨੂੰ 2007 ਵਿੱਚ ਯੂਰਪੀ ਫੁੱਟਬਾਲ ਦੀ ਸੰਚਾਲਨ ਸੰਸਥਾ ਦਾ ਮੁਖੀ ਚੁਣਿਆ ਗਿਆ ਸੀ। ਕਤਰ ਨੂੰ 2022 ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਸੌਂਪ ਦੇਣ ਦੇ ਕੇਸ ਦੀ ਜਾਂਚ ਕਰ ਰਹੀ ਫਰਾਂਸ ਦੀ ਭਿ੍ਰਸ਼ਟਾਚਾਰ ਰੋਕੂ ਪੁਲਸ ਨੇ ਉਨ੍ਹਾਂ ਨੂੰ ਹਿਰਾਸਤ ਵਿੱਚ ਲਿਆ ਹੈ। ਕਤਰ ਨੂੰ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਸੌਂਪਣ ਦੇ ਫੈਸਲੇ ਨਾਲ ਵਿਵਾਦ ਹੋ ਗਿਆ ਸੀ, ਕਿਉਂਕਿ ਭਿ੍ਰਸ਼ਟਾਚਾਰ ਦੇ ਦੋਸ਼ਾਂ ਵਿੱਚ ਇਸ ਦੀ ਵਿਹਾਰਕਤਾ 'ਤੇ ਸਵਾਲ ਉਠਾਏ ਗਏ ਸਨ। ਪਲਾਟੀਨੀ 'ਤੇ ਨੈਤਿਕ ਜ਼ਾਬਤੇ ਦੇ ਉਲੰਘਣ ਦੇ ਮਾਮਲੇ 'ਚ ਚਾਰ ਸਾਲ ਲਈ ਫੁੱਟਬਾਲ 'ਤੇ ਪਾਬੰਦੀ ਲੱਗਣ ਤੋਂ ਪਹਿਲਾਂ ਉਹ 2015 ਤੱਕ ਯੂਏਫਾ ਦੇ ਮੁਖੀ ਸਨ। ਉਨ੍ਹਾਂ ਉੱਤੇ ਫੀਫਾ ਦੇ ਸਾਬਕਾ ਦਾਗੀ ਹੋਏ ਮੁਖੀ ਸੈਪ ਬਲਾਟਰ ਤੋਂ 20 ਲੱਖ ਡਾਲਰ ਲੈਣ ਦਾ ਦੋਸ਼ ਵੀ ਸੀ। ਕਤਰ ਉੱਤੇ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਹਾਸਲ ਕਰਨ ਲਈ ਵੋਟ ਖਰੀਦਣ ਦਾ ਦੋਸ਼ ਲੱਗਾ ਸੀ ਤੇ ਉਸ ਤੋਂ ਬਾਅਦ ਅਮਰੀਕਾ ਦੇ ਸੁਤੰਤਰ ਜਾਂਚ ਕਰਤਾ ਮਾਈਕਲ ਗਾਰਸੀਆ ਦੀ ਰਿਪੋਰਟ ਵਿੱਚ ਕਈ ਸ਼ੱਕੀ ਵਿੱਤੀ ਲੈਣ ਦੇਣ ਦੇ ਖੁਲਾਸੇ ਹੋਏ ਸਨ। ਇਨ੍ਹਾਂ ਵਿੱਚੋਂ ਕਈ ਸੈਂਡਰੋ ਰੋਸੇਲ ਨਾਲ ਜੁੜੇ ਸਨ, ਜੋ ਸ਼ਪੈਨਿਸ਼ ਕਲੱਬ ਬਾਰਸੀਲੋਨਾ ਦੇ ਸਾਬਕਾ ਪ੍ਰਧਾਨ ਸਨ। ਰੋਸੇਲ ਨੇ ਕਤਰ ਦੇ ਸਲਾਹਕਾਰ ਦੀ ਭੂਮਿਕਾ ਨਿਭਾਈ ਸੀ।