* ਚਮਕੀ ਬੁਖਾਰ ਨਾਲ ਮੌਤਾਂ ਦਾ ਅੰਕੜਾ 129 ਹੋ ਗਿਆ
ਪਟਨਾ, 18 ਜੂਨ, (ਪੋਸਟ ਬਿਊਰੋ)-ਬਿਹਾਰ ਵਿੱਚ ਭਿਆਨਕ ਗਰਮੀ ਅਤੇ ਲੂ ਚੌਥੇ ਦਿਨ ਵੀ ਜਾਨਲੇਵਾ ਸਾਬਿਤ ਹੋਈ ਤੇ ਇਸ ਦੌਰਾਨ ਚਮਕੀ ਬੁਖਾਰ ਨਾਲ ਬੱਚਿਆਂ ਦੀ ਮੌਤਾਂ ਦਾ ਸਿਲਸਿਲਾ ਵੀ ਲਗਾਤਾਰ ਜਾਰੀ ਹੈ।
ਅੱਜ ਮੰਗਲਵਾਰ ਨੂੰ ਬਿਹਾਰ ਦੇ ਵੱਖ-ਵੱਖ ਜ਼ਿਲ੍ਹਿਆਂ ਵਿੱਚ 41 ਲੋਕਾਂ ਦੀ ਮੌਤ ਹੋ ਗਈ। ਮਗਧ ਤੇ ਸ਼ਾਹਬਾਦ ਵਿੱਚ 14, ਭਾਗਲਪੁਰ ਵਿੱਚ 4, ਬਾਂਕਾ ਵਿੱਚ 3, ਜਾਮੁਈ ਅਤੇ ਮੁੰਗੇਰ ਵਿੱਚ 2-2, ਵੈਸ਼ਾਲੀ, ਛਪਰਾ, ਭੋਜਪੁਰ, ਨਾਲੰਦਾ ਅਤੇ ਕਟਿਹਾਰ ਵਿੱਚਗਰਮੀ ਦੇ ਨਾਲ 16 ਮੌਤਾਂ ਹੋਈਆਂ ਹਨ। ਸ਼ਨਿਚਰਵਾਰ ਤੋਂਅੱਜ ਤੱਕ ਸੂਬੇ ਵਿੱਚ 285 ਮੌਤਾਂ ਹੋ ਚੁੱਕੀਆਂ ਹਨ। ਬੀਤੇ ਸ਼ਨਿਚਰਵਾਰ ਨੂੰ 60, ਐਤਵਾਰ 118, ਸੋਮਵਾਰ 66 ਜਣਿਆਂ ਦੀ ਮੌਤ ਹੋਈ ਸੀ। ਦਰਜਨਾਂ ਲੋਕਾਂ ਨੂੰ ਇਲਾਜ ਲਈ ਹਸਪਤਾਲਦਾਖਲ ਕਰਾਇਆ ਗਿਆ ਹੈ। ਮਗਧ ਮੈਡੀਕਲ ਕਾਲਜ ਹਸਪਤਾਲ ਵਿੱਚ 165 ਮਰੀਜ਼ ਹਨ, ਇਨ੍ਹਾਂ ਵਿੱਚ 21 ਨਵੇਂ ਆਏ ਮਰੀਜ਼ ਹਨ। ਔਰੰਗਾਬਾਦ ਵਿੱਚ ਲਗਭਗ 100 ਮਰੀਜ਼ ਹਨ। ਸਾਸਾਰਾਮ ਅਤੇ ਨਵਾਦਾ ਵਿੱਚ ਸੌ ਦੇ ਕਰੀਬ ਮਰੀਜ਼ ਹਨ।ਮਗਧ ਮੈਡੀਕਲ ਕਾਲਜ ਅਤੇ ਹਸਪਤਾਲ ਦੇ ਮੁਖੀ ਡਾ. ਵਿਜੈ ਕ੍ਰਿਸ਼ਨ ਪ੍ਰਸਾਦ ਨੇ ਦੱਸਿਆ ਕਿ ਅੱਜ ਤੱਕ ਜੋ ਮਰੀਜ਼ ਆਏ, ਉਹ ਲੂ ਦਾ ਸ਼ਿਕਾਰ ਹਨ। ਤੇਜ਼ ਗਰਮੀ ਤੇ ਲੂ ਵਾਲੇ ਖੇਤਰਾਂ ਵਿੱਚ ਦਿਨ ਦੇ 11 ਤੋਂ 4 ਵਜੇ ਤਕ ਦੁਕਾਨਾਂ ਬੰਦ ਕਰਨ ਦਾ ਆਦੇਸ਼ ਦਿੱਤਾ ਗਿਆ ਹੈ। ਕਈ ਦੁਕਾਨਾਂ ਖੁੱਲ੍ਹੀਆਂ ਸਨ, ਪਰ ਇੱਕਾ-ਦੁੱਕਾ ਗਾਹਕ ਨਜ਼ਰ ਆ ਰਹੇ ਸਨ।
ਇਸ ਦੌਰਾਨ ਬਿਹਾਰ ਵਿੱਚ ਏਕਿਊਟ ਇੰਸੇਫਲਾਈਟਿਸ ਸਿੰਡ੍ਰੋਮ (ਏ ਈ ਐਸ), ਜਿਸ ਨੂੰ ਚਮਕੀ ਬੁਖਾਰ ਕਿਹਾ ਜਾ ਰਿਹਾ ਹੈ, ਨਾਲਅੱਜ ਤਕ 129 ਬੱਚਿਆਂ ਦੀ ਮੌਤ ਹੋ ਚੁੱਕੀ ਹੈ। ਮੁਜੱਫਰਨਗਰ ਦੇ ਸਿਵਲ ਸਰਜਨ ਡਾ. ਸ਼ੈਲੇਸ਼ ਪ੍ਰਸਾਦ ਨੇ ਦੱਸਿਆ ਕਿ ਮੰਗਲਵਾਰ ਸ਼ਾਮ ਤਕ ਚਮਕੀ ਬੁਖਾਰ ਨਾਲ ਮਰਨ ਵਾਲੇ ਬੱਚਿਆਂ ਦੀ ਗਿਣਤੀ ਵਧ ਕੇ 129 ਹੋ ਗਈ ਹੈ, ਜਿਨ੍ਹਾਂ ਵਿੱਚ ਸ਼੍ਰੀਕ੍ਰਿਸ਼ਨ ਮੈਡੀਕਲ ਕਾਲਜ ਹਸਪਤਾਲਵਿੱਚ 90 ਬੱਚੇ, ਕੇਜਰੀਵਾਲ ਹਸਪਤਾਲ ਵਿੱਚ 19 ਬੱਚੇ ਅਤੇ ਹੋਰ ਹਸਪਤਾਲਾਂ ਵਿੱਚ 20 ਬੱਚਿਆਂ ਦੀ ਮੌਤ ਹੋ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਰੋਗ ਦੀ ਚਪੇਟ ਵਿੱਚ ਆਏ 400 ਤੋਂਵੱਧ ਬੱਚੇ ਅਜੇ ਵੀ ਇਲਾਜ ਲਈ ਹਸਪਤਾਲ ਵਿੱਚ ਹਨ।
ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਨੇ ਅੱਜ ਮੰਗਲਵਾਰ ਹਸਪਤਾਲ ਪਹੁੰਚ ਕੇ ਹਾਲਾਤ ਦਾ ਜਾਇਜ਼ਾ ਲਿਆ ਤੇ ਓਥੋਂ ਦੇ ਸੰਬੰਧਤ ਅਧਿਕਾਰੀਆਂ ਤੇ ਡਾਕਟਰਾਂ ਨਾਲ ਬੈਠਕ ਕੀਤੀ। ਇਸ ਮੌਕੇ ਉਨ੍ਹਾਂ ਨੇ ਡਾਕਟਰਾਂ ਤੇ ਅਧਿਕਾਰੀਆਂ ਨੂੰ ਨਿਰਦੇਸ਼ ਵੀ ਦਿੱਤੇ। ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਦੇ ਮੁਜੱਫਰਪੁਰ ਦੇ ਕ੍ਰਿਸ਼ਨ ਮੈਡੀਕਲ ਕਾਲਜ ਤੇ ਹਸਪਤਾਲ ਦਾ ਦੌਰਾ ਕਰਨ ਉੱਤੇ ਸਥਾਨਕ ਲੋਕਾਂ ਨੇ ਉਨ੍ਹਾਂ ਦਾ ਜੰਮ ਕੇ ਵਿਰੋਧ ਕੀਤਾ ਤੇ ਨਿਤੀਸ਼ ਕੁਮਾਰ ਵਾਪਸ ਜਾਓ ਦੇ ਨਾਅਰੇ ਲਾਏ। ਲੋਕਾਂ ਦਾ ਵਧਦਾ ਵਿਰੋਧ ਦੇਖ ਨਿਤੀਸ਼ ਕੁਮਾਰ ਪੱਤਰਕਾਰਾਂ ਨਾਲ ਬਿਨਾਂ ਗੱਲ ਕੀਤੇ ਚਲੇ ਗਏ।