ਜਲੰਧਰ, 15 ਜੂਨ (ਪੋਸਟ ਬਿਊਰੋ)- ਡੇਰਾ ਸੱਚਖੰਡ ਬੱਲਾਂ ਦੇ ਉਪ ਮੁਖੀ ਮਰਹੂਮ ਸੰਤ ਰਾਮਾਨੰਦ ਦੇ ਭਰਾ ਬੁੱਧ ਪ੍ਰਕਾਸ਼ ਨੇ ਇਸ ਡੇਰੇ ਦੇ ਮੌਜੂਦਾ ਪ੍ਰਬੰਧਕਾਂ ਉੱਤੇ ਦੋਸ਼ ਲਾਉਂਦਿਆਂ ਪੰਜਾਬ ਦੀ ਸਰਕਾਰ ਤੋਂ ਮੰਗ ਕੀਤੀ ਕਿ ਇਸ ਟਰੱਸਟ ਨੂੰ ਭੰਗ ਕਰਕੇ ਉਥੇ ਰਿਸੀਵਰ ਨਿਯੁਕਤ ਕਰ ਦਿੱਤਾ ਜਾਵੇ। ਕੱਲ੍ਹ ਇਥੇ ਉਨ੍ਹਾਂ ਨੇ ਮੀਡੀਆ ਨਾਲ ਗੱਲਬਾਤ ਦੇ ਦੌਰਾਨਆਖਿਆ ਕਿ ਇਸ ਡੇਰੇ ਵਿੱਚ ਵਿੱਤੀ ਗੜਬੜੀਆਂ ਚੱਲ ਰਹੀਆਂ ਹਨ।
ਬੁੱਧ ਪ੍ਰਕਾਸ਼ ਦੇ ਦੱਸਣ ਮੁਤਾਬਕ ਸਾਲ 2009 ਵਿੱਚ ਵਿਆਨਾ ਵਿੱਚ ਡੇਰਾ ਸੱਚਖੰਡ ਬੱਲਾਂ ਦੇ ਮੁਖੀ ਸੰਤ ਨਿਰੰਜਣ ਦਾਸ ਅਤੇ ਉਪ ਮੁਖੀ ਸੰਤ ਰਾਮਾਨੰਦ ਉੱਤੇ ਹਮਲਾ ਹੋਇਆ ਸੀ, ਜਿਸ ਵਿੱਚ ਸੰਤ ਰਾਮਾਨੰਦ ਦੀ ਮੌਤ ਹੋ ਗਈ ਸੀ। ਉਨ੍ਹਾਂ ਕਿਹਾ ਕਿ ਸੰਤ ਰਾਮਾਨੰਦ ਦੇ ਦੇਹਾਂਤ ਨੂੰ 10 ਸਾਲ ਬੀਤ ਜਾਣ ਉਤੇ ਵੀ ਉਨ੍ਹਾਂ ਨੇ ਕਦੇ ਡੇਰੇ ਵਿੱਚ ਕੋਈ ਦਖਲ ਨਹੀਂ ਸੀ ਦਿੱਤਾ, ਪਰ ਆਖਰ ਨੂੰ ਡੇਰੇ ਵਿਚਲੀਆਂ ਗੜਬੜਾਂ ਬਾਰੇ ਸੰਗਤ ਨੂੰ ਜਾਣੂ ਕਰਾਉਣਾ ਆਪਣਾ ਫਰਜ਼ ਸਮਝਿਆ ਹੈ।ਉਨ੍ਹਾਂ ਨੇ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਕਿ ਬਿਨਾਂ ਦੇਰ ਇਸ ਡੇਰੇ ਉਤੇ ਰਿਸੀਵਰ ਨਿਯੁਕਤ ਕੀਤਾ ਜਾਵੇ। ਸੰਤ ਰਾਮਾਨੰਦ ਮਿਸ਼ਨ ਸੁਸਾਇਟੀ ਦੇ ਪ੍ਰਧਾਨ ਰਮੇਸ਼ ਲਾਲ ਕਾਲਾ ਤੇ ਬੁੱਧ ਪ੍ਰਕਾਸ਼ ਨੇ ਉਨ੍ਹਾਂ ਦੇ ਨਾਲ ਇਹ ਦੋਸ਼ ਲਾਇਆ ਕਿ ਸੰਤ ਰਾਮਾਨੰਦ ਦੇ ਨਾਂ ਉਤੇ ਬੈਂਕ ਦੇ ਖਾਤੇ ਵਿੱਚੋਂ ਵੀ ਗੈਰ-ਕਾਨੂੰਨੀ ਤੌਰ 'ਤੇ ਪੈਸੇ ਕਢਵਾਏ ਗਏ ਹਨ।
ਦੂਸਰੇ ਪਾਸੇ ਡੇਰੇ ਵੱਲੋਂ ਪੱਖ ਰੱਖਦਿਆਂ ਗੁਰੂ ਰਵਿਦਾਸ ਜਨਮ ਅਸਥਾਨ ਮੰਦਰ ਪਬਲਿਕ ਚੈਰੀਟੇਬਲ ਟਰੱਸਟ ਦੇ ਜਨਰਲ ਸਕੱਤਰ ਸੱਤਪਾਲ ਵਿਰਦੀ ਨੇ ਬੁੱਧ ਪ੍ਰਕਾਸ਼ ਵੱਲੋਂ ਲਾਏ ਦੋਸ਼ਾਂ ਨੂੰ ਰੱਦ ਕੀਤਾ ਹੈ। ਵਿਰਦੀ ਨੇ ਕਿਹਾ ਕਿ ਜਿੰਨੇ ਦੋਸ਼ ਬੁੱਧ ਪ੍ਰਕਾਸ਼ ਨੇ ਲਾਏ ਹਨ, ਉਸ ਪਿੱਛੇ ਕੋਈ ਹੋਰ ਤਾਕਤ ਕੰਮ ਕਰ ਰਹੀ ਹੈ।