ਫਰੀਦਾਬਾਦ, 11 ਜੂਨ (ਪੋਸਟ ਬਿਊਰੋ)- ਕਾਂਗਰਸ ਦੇ ਹਰਿਆਣਾ ਦੇ ਪ੍ਰਧਾਨ ਨੇ ਭਾਜਪਾ ਉੱਤੇ ਫਰੀਦਾਬਾਦ ਵਿੱਚਲੀਆਂ ਅਰਾਵਲੀ ਪਹਾੜੀਆਂ ਦੇ ਖੇਤਰ ਵਿੱਚ ਹਜ਼ਾਰਾਂ ਏਕੜ ਦੇ ਪਹਾੜ ਘੋਟਾਲੇ ਦਾ ਦੋਸ਼ ਲਾਇਆ ਹੈ। ਹਰਿਆਣਾ ਦੇ ਕਾਂਗਰਸ ਪ੍ਰਧਾਨ ਡਾ. ਅਸ਼ੋਕ ਤੰਵਰ ਨੇ ਫਰੀਦਾਬਾਦ ਦੇ ਅਰਾਵਲੀ ਦਾ ਦੌਰਾ ਵੀ ਕੀਤਾ ਹੈ।
ਤੰਵਰ ਕਾਂਗਰਸ ਦੇ ਪ੍ਰਦੇਸ਼ ਬੁਲਾਰੇ ਵਿਕਾਸ ਚੌਧਰੀ ਤੇ ਟੋਹਾਣਾ ਵਿਧਾਨ ਸਭਾ ਖੇਤਰ ਤੋਂ ਪਾਰਟੀ ਉਮੀਦਵਾਰ ਰਹੇ ਦਵਿੰਦਰ ਬਬਲੀ ਸਮੇਤ ਹੋਰ ਪਾਰਟੀ ਵਰਕਰਾਂ ਦੇ ਨਾਲ ਫਰੀਦਾਬਾਦ ਗੁਰੂਗ੍ਰਾਮ ਰੋਡ 'ਤੇ ਕੋਟਗਾਂਵ ਦੇ ਕੋਲ ਅਰਾਵਲੀ ਪਹਾੜੀ 'ਤੇ ਪਹੁੰਚੇ ਜਿਥੇ ਉਨ੍ਹਾਂ ਨੇ ਜੰਗਲ ਵਿਚ ਜਾ ਕੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਖੁੱਲ੍ਹ ਕੇ ਦੋਸ਼ ਲਾਏ ਕਿ ਇਹ ਉਹੀ ਪਹਾੜੀ ਜ਼ਮੀਨ ਹੈ, ਜਿਸ ਨੂੰ ਅਧਿਕਾਰੀਆਂ ਅਤੇ ਨੇਤਾਵਾਂ ਦੀ ਮਿਲੀਭੁਗਤ ਦੇ ਕਾਰਨ ਬਾਬਾ ਰਾਮਦੇਵ ਨੇ ਕੌਡੀਆਂ ਦੇ ਭਾਅ ਖਰੀਦਿਆ ਹੈ। ਤੰਵਰ ਨੇ ਸਿੱਧੇ-ਸਿੱਧੇ ਬਾਬਾ ਰਾਮਦੇਵ ਅਤੇ ਪਤੰਜਲੀ ਦੇ ਕਰਤਾ ਧਰਤਾ ਆਚਾਰੀਆ ਬਾਲਕ੍ਰਿਸ਼ਨ ਆਰੀਆ 'ਤੇ ਦੋਸ਼ ਲਾਉਂਦੇ ਹੋਏ ਕਿਹਾ ਕਿ ਪਹਾੜ 'ਤੇ ਹਜ਼ਾਰਾਂ ਏਕੜ ਜ਼ਮੀਨ ਪੰਜ ਲੱਖ ਰੁਪਏ ਏਕੜ ਵਿੱਚ ਖਰੀਦੀ ਹੋਈ ਹੈ, ਜਦ ਕਿ ਇਸ ਦੇ ਬਿਲਕੁਲ ਕੋਲ ਗੁਰੂਗ੍ਰਾਮ ਵਿੱਚ ਜ਼ਮੀਨ ਦਾ ਭਾਅ ਕਰੀਬ 10 ਕਰੋੜ ਰੁਪਏ ਏਕੜ ਹੈ। ਉਨ੍ਹਾਂ ਕਿਹਾ ਕਿ ਅਧਿਕਾਰੀ ਤੇ ਸੱਤਾ ਵਿੱਚ ਬੈਠੇ ਰਾਜਨੇਤਾਵਾਂ ਦੀ ਮਿਲੀਭੁਗਤ ਨਾਲ ਸ਼ਾਮਲਾਤ ਤੇ ਜੰਗਲਾਤ ਦੀ ਹਜ਼ਾਰਾਂ ਏਕੜ ਪਹਾੜੀ ਜ਼ਮੀਨ ਬਾਬਾ ਰਾਮਦੇਵ ਨੇ ਵੱਖ-ਵੱਖ ਨਾਵਾਂ ਨਾਲ ਕੌਡੀਆਂ ਦੇ ਭਾਅ ਖਰੀਦੀ ਹੈ, ਜਿਸ ਨਾਲ ਭਾਜਪਾ ਸਰਕਾਰ ਨੇ ਬਾਬਾ ਰਾਮਦੇਵ ਦੇ ਨਾਲ ਮਿਲ ਕੇ ਹਜ਼ਾਰਾਂ ਕਰੋੜ ਰੁਪਏ ਦਾ ਵੱਡਾ ਘੋਟਾਲਾ ਕੀਤਾ ਹੈ, ਇਸ ਕਾਰਨ ਹਰਿਆਣਾ ਵਿਧਾਨ ਸਭਾ ਵਿੱਚ ਪੀ ਐਲ ਪੀ ਏ ਐਕਟ ਖਤਮ ਕਰਨ ਦੀ ਵੀ ਕੋਸ਼ਿਸ਼ ਕੀਤੀ ਗਈ ਸੀ।