ਓਟਵਾ, 11 ਜੂਨ (ਪੋਸਟ ਬਿਊਰੋ) : ਕਲੀਨ ਸਨਸਕ੍ਰੀਨ ਦੇ ਉਤਪਾਦਾਂ ਨੂੰ ਕੈਨੇਡਾ ਦੇ ਪਹਿਲੇ ਗੂਪ ਸਟੋਰ ਤੋਂ ਹਟਾ ਲਿਆ ਗਿਆ ਹੈ। ਅਮਰੀਕਾ ਦੀ ਇਸ ਕੰਪਨੀ ਵੱਲੋਂ ਹੈਲਥ ਕੈਨੇਡਾ ਤੋਂ ਲਾਇਸੰਸ ਲੈਣ ਦੀ ਸ਼ਰਤ ਪੂਰੀ ਨਹੀਂ ਸੀ ਕੀਤੀ ਗਈ।
ਅਮਰੀਕਾ ਸਥਿਤ ਕਲੀਨ ਬਿਊਟੀ ਬ੍ਰਾਂਡ ਬਿਊਟੀਕਾਊਂਟਰ ਵੱਲੋਂ ਤਿਆਰ ਦੋ ਸਨਸਕ੍ਰੀਨਜ਼ ਦੀ ਹੈਲਥ ਕੈਨੇਡਾ ਦੇ ਇੰਸਪੈਕਟਰਜ਼ ਵੱਲੋਂ ਪਛਾਣ ਕੀਤੀ ਗਈ। ਅਦਾਕਾਰਾ ਗਾਇਨਥ ਪੈਲਟਰੋਅ ਦੇ ਲਾਈਫਸਟਾਈਲ ਤੇ ਵੈੱਲਨੈੱਸ ਬ੍ਰੈਂਡ ਵੱਲੋਂ ਟੋਰਾਂਟੋ ਵਿੱਚ ਖੋਲ੍ਹੇ ਗਏ ਸ਼ੋਅਰੂਮ ਵਿੱਚ ਇਹ ਪ੍ਰੋਡਕਟਸ ਰੱਖੇ ਗਏ ਸਨ। ਹੈਲਥ ਕੈਨੇਡਾ ਦੇ ਤਰਜ਼ਮਾਨ ਅਨੁਸਾਰ ਇਨ੍ਹਾਂ ਉਤਪਾਦਾਂ ਨੂੰ ਬਿਨਾਂ ਲਾਇਸੰਸ ਦੇ ਹੀ ਵੇਚਿਆ ਜਾ ਰਿਹਾ ਸੀ ਜਦਕਿ ਇਸ ਲਾਇਸੰਸ ਦੀ ਲੋੜ ਕੈਨੇਡਾ ਵਿੱਚ ਹਰ ਕਿਸਮ ਦੇ ਨੈਚੂਰਲ ਹੈਲਥ ਉਤਪਾਦ ਵੇਚਣ ਲਈ ਪੈਂਦੀ ਹੈ।
ਉਨ੍ਹਾਂ ਦੱਸਿਆ ਕਿ ਇੱਕ ਵਾਰੀ ਹੈਲਥ ਕੈਨੇਡਾ ਵੱਲੋਂ ਉਤਪਾਦ ਦਾ ਮੁਲਾਂਕਣ ਕਰਨ ਤੇ ਇਹ ਪਤਾ ਲਾਉਣ ਕਿ ਉਹ ਸੇਫ, ਪ੍ਰਭਾਵਸ਼ਾਲੀ ਤੇ ਉੱਚ ਮਿਆਰ ਦੀ ਹੈ, ਤੋਂ ਬਾਅਦ ਹੀ ਲਾਇਸੰਸ, ਅੱਠ ਅੰਕਾਂ ਵਾਲਾ ਨੈਚੂਰਲ ਪ੍ਰੋਡਕਟ ਨੰਬਰ (ਪਿਨ) ਜਾਂ ਹੋਮਿਓਪੈਥਿਕ ਮੈਡੀਸਿਨ ਨੰਬਰ (ਡਿਨ-ਐਚਐਮ) ਜੋ ਕਿ ਲੇਬਲ ਉੱਤੇ ਦਰਜ ਹੋਣਾ ਚਾਹੀਦਾ ਹੈ, ਜਾਰੀ ਕੀਤਾ ਜਾਂਦਾ ਹੈ। ਇਹ ਲਾਇਸੰਸ ਹਾਸਲ ਕਰਨ ਲਈ ਕੰਪਨੀਆਂ ਨੂੰ ਉਤਪਾਦ ਦੀ ਵਿਸਥਾਰਪੂਰਵਕ ਜਾਣਕਾਰੀ ਤੇ ਉਸ ਵਿੱਚ ਵਰਤੀ ਗਈ ਸਮੱਗਰੀ, ਉਸ ਦੀ ਮੈਡੀਕਲ ਤੇ ਨੌਨ ਮੈਡੀਕਲ ਵਰਤੋਂ, ਡੋਜ, ਪੋਟੈਂਸੀ ਤੇ ਵਰਤੋਂ ਲਈ ਕੀਤੀ ਗਈ ਸਿਫਾਰਿਸ ਆਦਿ ਮੁਹੱਈਆ ਕਰਵਾਉਣੀ ਪੈਂਦੀ ਹੈ।