ਟੈਲੀਵਿਜ਼ਨ ਦੇ ਬਾਅਦ ਬਾਲੀਵੁੱਡ ਵਿੱਚ ਪਛਾਣ ਬਣਾਉਣ ਵਾਲੀ ਅਭਿਨੇਤਰੀ ਹਿਨਾ ਖਾਨ ਨੂੰ ਇੱਕ ਦੇ ਬਾਅਦ ਇੱਕ ਫਿਲਮਾਂ ਮਿਲ ਰਹੀਆਂ ਹਨ। ਕਾਨ ਫਿਲਮ ਉਤਸਵ ਵਿੱਚ ਰੈਡ ਕਾਰਪੈਟ ਉਤੇ ਆਪਣੀਆਂ ਅਦਾਵਾਂ ਨਾਲ ਲੋਕਾਂ ਦਾ ਦਿਲ ਜਿੱਤਣ ਦੇ ਬਾਅਦ ਉਹ ਇੱਕ ਵਾਰ ਫਿਰ ਡਾਇਰੈਕਟਰ ਅਤੇ ਅੰਤਰਰਾਸ਼ਟਰੀ ਫਿਲਮਮੇਕਰ ਰਾਹਤ ਕਾਜ਼ਮੀ ਨਾਲ ਦਿਖਾਈ ਦੇਵੇਗੀ। ਕਾਜ਼ਮੀ ਵੱਡੇ ਐਕਟਰਾਂ ਦੇ ਨਾਲ ਕਈ ਫਿਲਮਾਂ ਕਰ ਚੁੱਕੇ ਹਨ, ਅੱਗੋਂ ਉਹ ਹਿਨਾ ਨੂੰ ਆਪਣੀ ਫਿਲਮ ਨਾਲ ਲਾਂਚ ਕਰ ਰਹੇ ਹਨ। ਕਾਨ ਫਿਲਮ ਉਤਸਵ ਦੇ ਬਾਅਦ ਹਿਨਾ ਯੂਰਪ ਵਿੱਚ ਹੀ ਰਹੀ ਅਤੇ ਇਸ ਦੌਰਾਨ ਉਨ੍ਹਾਂ ਨੂੰ ਰਾਹਤ ਕਾਜ਼ਮੀ ਤੇ ਉਨ੍ਹਾਂ ਦੀ ਟੀਮ ਨਾਲ ਦੇਖਿਆ ਗਿਆ। ਅੰਦਾਜ਼ਾ ਇਹ ਲਾਇਆ ਜਾ ਰਿਹਾ ਸੀ ਕਿ ਸ਼ਾਇਦ ਉਹ ਆਪਣੀ ਅਗਲੀ ਫਿਲਮ ਦੇ ਲਈ ਸ਼ੂਟਿੰਗ ਕਰ ਰਹੀ ਸੀ।
ਰਾਹਤ ਕਾਜ਼ਮੀ ਨੇ ਇਸ 'ਤੇ ਸਪੱਸ਼ਟੀਕਰਨ ਦਿੰਦੇ ਹੋਏ ਕਿਹਾ, ‘‘ਜੀ ਹਾਂ, ਅਸੀਂ ਹਿਨਾ ਖਾਨ ਨੂੰ ਅਗਲੀਆਂ ਤਿੰਨ ਫਿਲਮਾਂ ਲਈ ਸਾਈਨ ਕੀਤਾ ਹੈ। ਯੂਰਪ ਵਿੱਚ ਅਸੀਂ ਆਪਣੀ ਅਗਲੀ ਫਿਲਮ 'ਤੇ ਕੰਮ ਕਰ ਰਹੇ ਹਾਂ, ਜਿਸ ਵਿੱਚ ਇੱਕ ਵਾਰ ਫਿਰ ਹਿਨਾ ਖਾਨ ਲੀਡ ਰੋਲ ਵਿੱਚ ਦਿਖਾਈ ਦੇਵੇਗੀ।” ਜਦ ਕਾਜ਼ਮੀ ਤੋਂ ਹਿਨਾ ਨੂੰ ਚੁਣਨ ਦਾ ਕਾਰਨ ਪੁੱਛਆ ਗਿਆ ਤਾਂ ਮੁਸਕਰਾਉਂਦੇ ਹੋਏ ਕਿਹਾ, ‘‘ਮੈਨੂੰ ਅੰਦਾਜ਼ਾ ਨਹੀਂ ਸੀ ਕਿ ਉਹ ਇੰਨੀ ਪ੍ਰੋਫੈਸ਼ਨਲ ਅਤੇ ਹਾਰਡ-ਵਰਕਿੰਗ ਅਭਿਨੇਤਰੀ ਹੈ। ਹਿਨਾ ਜੋ ਵੀ ਰੋਲ ਕਰਦੀ ਹੈ, ਉਸ ਵਿੱਚ ਬਹੁਤ ਗਹਿਰਾਈ ਤੱਕ ਚਲੀ ਜਾਂਦੀ ਹੈ। ਇਸ ਲਈ ਅਸੀਂ ਦੋਬਾਰਾ ਸੋਚੇ ਬਿਨਾ ਉਨ੍ਹਾਂ ਨੂੰ ਇਕੱਠੇ ਤਿੰਨ ਫਿਲਮਾਂ ਵਿੱਚ ਸਾਈਨ ਕਰ ਲਿਆ ਹੈ।” ਹਿਨਾ ਦਾ ਕਹਿਣਾ ਹੈ, ‘‘ਮੈਂ ਯੂਰਪ ਵਿੱਚ ਰਾਹਤ ਆਜ਼ਮੀ ਅਤੇ ਉਨ੍ਹਾਂ ਦੀ ਟੀਮ ਦੇ ਨਾਲ ਸ਼ੂਟਿੰਗ ਬਾਰੇ ਬਹੁਤ ਖੁਸ਼ ਹਾਂ। ਫਿਲਮ ਯੂਰਪ ਦੀਆਂ ਖੂਬਸੂਰਤ ਲੋਕੇਸ਼ਨਾਂ 'ਤੇ ਸ਼ੂਟ ਕੀਤੀ ਜਾਏਗੀ ਅਤੇ ਇਸ ਤੋਂ ਮੈਨੂੰ ਬਹੁਤ ਕੁਝ ਐਕਸਪਲੋਰ ਕਰਨ ਦਾ ਮੌਕਾ ਮਿਲੇਗਾ।” ਰਾਹਤ ਕਾਜ਼ਮੀ ਅਲੱਗ ਤਰ੍ਹਾਂ ਦੀਆਂ ਫਿਲਮਾਂ ਲਿਖਣ ਅਤੇ ਨਿਰਦੇਸ਼ਿਤ ਕਰਨ ਦੇ ਲਈ ਜਾਣੇ ਜਾਂਦੇ ਹਨ।