ਨਵੀਂ ਦਿੱਲੀ, 6 ਅਕਤੂਬਰ (ਪੋਸਟ ਬਿਊਰੋ)- ਅੱਜ ਕੱਲ੍ਹ ਸੈਲਫੀ ਦਾ ਹਰ ਕੋਈ ਦੀਵਾਨਾ ਜਾਪਦਾ ਹੈ, ਪਰ ਭਾਰਤ ਵਿੱਚ ਇਸ ਸ਼ੌਕ ਵਾਸਤੇ ਕਈ ਲੋਕਾਂ ਨੂੰ ਆਪਣੀ ਜਾਨ ਤੋਂ ਹੱਥ ਧੋਣਾ ਪੈ ਰਿਹਾ ਹੈ। ਬੀਤੇ ਦੋ ਸਾਲਾਂ ਵਿੱਚ ਦੁਨੀਆ ਵਿੱਚ 127 ਲੋਕ ਸੈਲਫੀ ਕਲਿੱਕ ਕਰਨ ਦੇ ਚੱਕਰ ਵਿੱਚ ਮਾਰੇ ਗਏ ਹਨ, ਇਨ੍ਹਾਂ ਵਿੱਚੋਂ ਸਭ ਤੋਂ ਜ਼ਿਆਦਾ 76 ਮੌਤਾਂ ਭਾਰਤ ਵਿੱਚ ਹੋਈਆਂ ਹਨ। ‘ਸੈਲਫੀ ਡੈਥ' ਦੇ ਮਾਮਲੇ ਵਿੱਚ ਭਾਰਤ ਦੇ ਬਾਅਦ ਦੂਸਰਾ ਸਥਾਨ ਪਾਕਿਸਤਾਨ ਦਾ ਹੈ।
ਦਿੱਲੀ ਦੇ ਸਰਕਾਰੀ ਆਈ ਆਈ ਟੀ ਅਤੇ ਅਮਰੀਕਾ ਦੀ ਕਾਰਨੇਜੀ ਯੂਨੀਵਰਸਿਟੀ ਨੇ ਇਸ ਬਾਰੇ ਸਾਂਝੀ ਖੋਜ ਕੀਤੀ ਹੈ। ਇਸ ਖੋਜ ਦਾ ਨਾਮ ‘ਮੀ, ਮਾਈ ਸੈਲਫੀ ਐਂਡ ਮਾਈ ਕਿਲਫੀ' ਹੈ। ਇਸ ਦੀ ਰਿਪੋਰਟ ਅਨੁਸਾਰ ਸਾਲ 2014 ਤੋਂ ਸਤੰਬਰ 2016 ਤੱਕ ਭਾਰਤ ਵਿੱਚ 76, ਪਾਕਿਸਤਾਨ ਵਿੱਚ 9 ਅਤੇ ਅਮਰੀਕਾ ਵਿੱਚ ਕੁੱਲ ਅੱਠ ਲੋਕਾਂ ਨੂੰ ਆਪਣੀ ਜਾਨ ਗਵਾਉਣੀ ਪਈ ਸੀ। ਸੈਲਫੀ ਲੈਂਦੇ ਸਮੇਂ ਸਾਲ 2014 ਵਿੱਚ 15 ਮੌਤਾਂ ਹੋਈਆਂ ਸਨ। ਸਾਲ 2006 ਵਿੱਚ ਅੰਕੜਾ 39 ਤੱਕ ਪੁੱਜਾ। ਇਸ ਦੇ ਬਾਅਦ ਸਾਲ 2016 ਵਿੱਚ 73 ਲੋਕਾਂ ਦੀ ਮੌਤ ਸੈਲਫੀ ਕਾਰਨ ਹੋਈ।