ਸ਼ਾਹਕੋਟ, 24 ਮਈ (ਪੋਸਟ ਬਿਊਰੋ)- ਏਥੇ ਰਾਮਗੜ੍ਹੀਆ ਚੌਕ ਵਿੱਚ ਬਾਵਾ ਹਸਪਤਾਲ ਨੇੜੇ ਦੋ ਮੋਟਰ ਸਾਈਕਲਾਂ ਦੀ ਸਿੱਧੀ ਟੱਕਰ 'ਚ ਇਕ ਨੌਜਵਾਨ ਦੀ ਮੌਤ ਹੋ ਗਈ ਅਤੇ ਤਿੰਨ ਨੌਜਵਾਨ ਗੰਭੀਰ ਜ਼ਖਮੀ ਹੋ ਗਏ।
ਮਿਲੀ ਜਾਣਕਾਰੀ ਅਨੁਸਾਰ ਬਲਬੀਰ ਪੁੱਤਰ ਰਾਜੂ, ਸਨੀ ਪੁੱਤਰ ਜੱਗਾ ਅਤੇ ਸਾਹਿਲ ਪੁੱਤਰ ਜੋਗਾ ਤਿੰਨੇ ਵਾਸੀ ਕਿਲੀ ਅਤੇ ਗੋਪੀ ਵਾਸੀ ਰਾਜੇਵਾਲ, ਚਾਰੇ ਨੌਜਵਾਨ ਨਿਊ ਕਰਤਾਰ ਸ਼ਾਹਕੋਟ ਦੇ ਨੇੜੇ ਮੱਦੀ ਕਾਲੋਨੀ 'ਚ ਠੇਕੇਦਾਰ ਨਾਲ ਪੱਥਰ ਲਾਉਣ ਦਾ ਕੰਮ ਕਰਦੇ ਹਨ। ਉਹ ਆਪਣੇ ਕੰਮ ਤੋਂ ਕਰੀਬ ਰਾਤ 8.30 ਵਜੇ ਮੋਟਰ ਸਾਈਕਲ ਉਤੇ ਆਪਣੇ ਪਿੰਡ ਜਾਣ ਲਈ ਮੇਨ ਬਾਜ਼ਾਰ ਵੱਲ ਆ ਰਹੇ ਸਨ। ਜਦੋਂ ਉਹ ਰਾਮਗੜ੍ਹੀਆ ਚੌਕ ਵਿਖੇ ਬਾਵਾ ਹਸਪਤਾਲ ਨੇੜੇ ਪੁੱਜੇ ਤਾਂ ਇਕ ਬੱਚੇ ਨੂੰ ਬਚਾਉਂਦੇ ਹੋਏ ਸਾਹਮਣੇ ਤੋਂ ਆਏ ਅਣਪਛਾਤੇ ਮੋਟਰ ਸਾਈਕਲ ਨਾਲ ਇਨ੍ਹਾਂ ਦੀ ਟੱਕਰ ਹੋ ਗਈ ਤੇ ਨੇੜੇ ਪਏ ਮਿੱਟੀ ਦੇ ਢੇਰ 'ਚ ਵੱਜਣ ਤੋਂ ਬਾਅਦ ਚਾਰੇ ਨੌਜਵਾਨ ਮੋਟਰ ਸਾਈਕਲ ਤੋਂ ਡਿੱਗ ਕੇ ਗੰਭੀਰ ਜ਼ਖਮੀ ਹੋ ਗਏ। ਰਾਹਗੀਰਾਂ ਨੇ ਇਸ ਹਾਦਸੇ ਬਾਰੇ 108 ਐਂਬੂਲੈਂਸ ਨੂੰ ਸੂਚਿਤ ਕੀਤਾ ਤਾਂ ਤਿੰਨਾਂ ਨੂੰ ਸਰਕਾਰੀ ਹਸਪਤਾਲ ਸ਼ਾਹਕੋਟ ਲਿਆਂਦਾ ਗਿਆ, ਜਦ ਕਿ ਇਕ ਨੌਜਵਾਨ ਗੋਪੀ ਠੇਕੇਦਾਰ ਦੇ ਘਰ ਚਲਾ ਗਿਆ। ਸਰਕਾਰੀ ਹਸਪਤਾਲ 'ਚ ਐਮਰਜੈਂਸੀ ਡਿਊਟੀ 'ਤੇ ਮੌਜੂਦ ਡਾ. ਰਜਿੰਦਰ ਗਿੱਲ ਨੇ ਨੌਜਵਾਨ ਸਾਹਿਲ ਵਾਸੀ ਕਿਲੀ (22) ਨੂੰ ਚੈਕ ਕਰਨ ਪਿੱਛੋਂ ਮ੍ਰਿਤਕ ਘੋਸ਼ਿਤ ਕਰ ਦਿੱਤਾ ਅਤੇ ਸਨੀ ਤੇ ਬਲਬੀਰ ਨੂੰ ਮੁੱਢਲੀ ਸਹਾਇਤਾ ਪਿੱਛੋਂ ਸਰਕਾਰੀ ਹਸਪਤਾਲ ਜਲੰਧਰ ਰੈਫਰ ਕਰ ਦਿੱਤਾ।