ਨਵੀਂ ਦਿੱਲੀ, 22 ਮਈ (ਪੋਸਟ ਬਿਊਰੋ)- ਭਾਰਤੀ ਕੋਸਟ ਗਾਰਡ (ਆਈ ਸੀ ਜੀ) ਨੇ ਗੁਜਰਾਤ ਦੇ ਤੱਟ ਉਤੇ ਕੱਲ੍ਹ ਇਕ ਪਾਕਿਸਤਾਨੀ ਕਿਸ਼ਤੀ ਘੇਰ ਕੇ 600 ਕਰੋੜ ਰੁਪਏ ਮੁੱਲ ਦਾ ਨਸ਼ੀਲਾ ਪਦਾਰਥ, ਜੋ ਹੈਰੋਇਨ ਲੱਗਦਾ ਹੈ, ਬਰਾਮਦ ਕੀਤਾ ਹੈ। ਸੁਰੱਖਿਆ ਏਜੰਸੀ ਨੇ ਕਿਸ਼ਤੀ 'ਤੇ ਸਵਾਰ ਛੇ ਵਿਅਕਤੀਆਂ ਨੂੰ ਆਪਣੀ ਹਿਰਾਸਤ ਵਿੱਚ ਲੈ ਲਿਆ ਹੈ।
ਇਸ ਮਾਮਲੇ ਵਿੱਚ ਭਾਰਤੀ ਕੋਸਟ ਗਾਰਡ ਨੇ ਇਹ ਪੂਰਾ ਅਪਰੇਸ਼ਨ ਡਾਇਰੈਕਟੋਰੇਟ ਆਫ ਰੈਵੇਨਿਊ ਇੰਟੈਲੀਜੈਂਸ (ਡੀ ਆਰ ਆਈ) ਤੇ ਹੋਰਨਾਂ ਏਜੰਸੀਆਂ ਵੱਲੋਂ ਦਿੱਤੀ ਜਾਣਕਾਰੀ ਦੇ ਅਧਾਰ ਉਤੇ ਪੂਰਾ ਕੀਤਾ ਹੈ। ਆਈ ਸੀ ਜੀ ਨੇ ਇਕ ਟਵੀਟ 'ਚ ਕਿਹਾ, ‘ਭਾਰਤੀ ਕੋਸਟ ਗਾਰਡ ਨੇ ਕੱਲ੍ਹ ਸਵੇਰੇ ਸੂਚਨਾ ਦੇ ਆਧਾਰ 'ਤੇ ਕਰਾਚੀ ਵਿੱਚ ਰਜਿਸਟਰਡ ਕੀਤੀ ਗਈ ਪਾਕਿਸਤਾਨ ਦੀ ਮੱਛੀਆਂ ਫੜਨ ਵਾਲੀ ਕਿਸ਼ਤੀ ‘ਅਲ ਮਦੀਨਾ' ਨੂੰ ਹਿਰਾਸਤ ਵਿੱਚ ਲੈ ਲਿਆ। ਇਸ ਮੌਕੇ ਕਿਸ਼ਤੀ ਵਿੱਚ ਛੇ ਲੋਕ ਸਵਾਰ ਸਨ। ਕਿਸ਼ਤੀ 'ਚੋਂ ਨਸ਼ੀਲੇ ਪਦਾਰਥਾਂ ਦੇ 194 ਪੈਕੇਟ ਬਰਾਮਦ ਹੋਏ ਹਨ।' ਆਈ ਸੀ ਪੀ ਨੇ ਕਿਹਾ ਕਿ ਕੱਲ੍ਹ ਸਵੇਰੇ ਉਨ੍ਹਾਂ ਜਖਾਓ ਕੰਢੇ ਉੱਤੇ ਅਲ ਮਦੀਨਾ ਨਾਂ ਦੀ ਕਿਸ਼ਤੀ ਨੂੰ ਰੁਕਣ ਲਈ ਕਿਹਾ ਤਾਂ ਉਨ੍ਹਾਂ ਕਿਸ਼ਤੀ ਭਜਾ ਲਈ। ਆਈ ਸੀ ਪੀ ਨੇ ਦੋ ਹੋਰਨਾਂ ਕਿਸ਼ਤੀਆਂ ਦੀ ਮਦਦ ਨਾਲ ਇਸ ਨੂੰ ਘੇਰ ਲਿਆ। ਇਸ ਦੌਰਾਨ ਪਾਕਿਸਤਾਨੀ ਕਿਸ਼ਤੀ 'ਚ ਸਵਾਰ ਵਿਅਕਤੀਆਂ ਨੇ ਨਸ਼ੀਲੇ ਪਦਾਰਥ ਵਾਲੇ ਬੈਗ ਪਾਣੀ 'ਚ ਸੁੱਟਣੇ ਸ਼ੁਰੂ ਕਰ ਦਿੱਤੇ। ਕਿਸ਼ਤੀ ਸਵਾਰਾਂ ਨੂੰ ਹਿਰਾਸਤ ਵਿੱਚ ਲੈਣ ਮਗਰੋਂ ਆਈ ਸੀ ਪੀ ਨੇ ਪਾਣੀ ਵਿੱਚ ਸੁੱਟੇ ਸੱਤ ਬੈਗ ਬਾਹਰ ਕੱਢ ਲਏ ਹਨ। ਕਿਸ਼ਤੀ ਦੀ ਤਲਾਸ਼ੀ ਵਿੱਚ ਇਸ ਵਿੱਚੋਂ ਸ਼ੱਕੀ ਨਸ਼ੀਲੇ ਪਦਾਰਥ ਦੇ 194 ਪੈਕੇਟ ਮਿਲੇ ਹਨ।