ਰੋਮ, 21 ਮਈ (ਟੇਕ ਚੰਦ ਜਗਤਪੁਰ)- ਸ਼ੇਰ-ਏ -ਪੰਜਾਬ ਮਹਾਰਾਜਾ ਰਣਜੀਤ ਸਿੰਘ ਦਾ ਰਾਜ ਸਿੱਖ ਰਾਜ ਦਾ ਸਨਿਹਰੀ ਰਾਜ ਰਿਹਾ ਹੈ।ਮਹਾਰਾਜਾ ਰਣਜੀਤ ਸਿੰਘ ਦੀ ਫੌਜ ਵਿੱਚ ਭਾਰਤੀ ਫੌਜੀਆਂ ਦੇ ਨਾਲ਼ ਨਾਲ਼ ਵਿਦੇਸ਼ੀ ਮੁਲਕਾਂ ਨਾਲ਼ ਸਬੰਧਿਤ ਸੈਨਿਕ ਵੀ ਫੌਜ ਦਾ ਹਿੱਸਾ ਰਹੇ ਹਨ।ਇਸੇ ਪ੍ਰਕਾਰ ਇਟਲੀ ਦੇ ਫੀਨਾਲੇ ਈਮੀਲਆ ਸ਼ਹਿਰ ਨਾਲ਼ ਸਬੰਧਿਤ ਇਟਾਲੀਅਨ ਮੂਲ ਦਾ ਜਰਨੈਲ ਵੇਨਤੂਰਾ ਵੀ ਮਹਾਰਾਜਾ ਰਣਜੀਤ ਸਿੰਘ ਦੀ ਫੌਜ ਦਾ ਇਕ ਹਿੱਸਾ ਬਣ ਕੇ ਜਿੱਥੇ ਫੌਜ ਨੂੰ ਜੰਗੀ ਕਰਤੱਬਾਂ ਦੀ ਸਿਖਲਾਈ ਦਿੰਦਾ ਰਿਹਾ,ਉੱਥੇ ਉਨਾਂ੍ਹ ਨੇ ਜੰਗੀ ਮੈਦਾਨ ਵਿੱਚ ਜਾ ਕੇ ਬਹਾਦਰੀ ਦਿਖਾ ਕੇ ਅਨੇਕਾਂ ਵਾਰੀ ਦੁਸ਼ਮਣਾਂ ਦੇ ਦੰਦ ਵੀ ਖੱਟੇ ਕੀਤੇ। ਜਨਰਲ ਵੇਤੂਰਾ ਦਾ ਜੱਦੀ ਘਰ ਇਟਲੀ ਦੇ ਫੀਨਾਲੇ ਈਮੀਲੀਆ ਸ਼ਹਿਰ ਵਿੱਚ ਅੱਜ ਵੀ ਸਥਿੱਤ ਹੈ ਜਿਸਦਾ ਪਤਾ ਲੱਗਣ ਤੇ ਇਟਲੀ ਦੀ ਸੰਸਥਾ ਸਿੱਖੀ ਸੇਵਾ ਸੁਸਾਇਟੀ ਇਟਲੀ ਨੇ ਯੁ ਕੇ ਦੀ ਐੱਸ ਕੇ ਫਾਉਡੇਸ਼ਨ ਦੇ ਸਹਿਯੋਗ ਨਾਲ਼ ਯਾਦਗਾਰ ਵਜੋਂ ਇਸ ਘਰ ਚ ਮਹਾਰਾਜਾ ਰਣਜੀਤ ਸਿੰਘ ਅਤੇ ਵੇਨਤੂਰਾ ਦੇ ਚਿੱਤਰ ਵਾਲਾ ਤਾਬਾਮਈ ਧਾਂਤ ਵਾਲਾ ਚਿੰਨ੍ਹ ਸਥਾਪਿਤ ਕਰਨ ਦਾ ਫੈਸਲਾ ਕੀਤਾ ਜਿਸ ਦਾ ਰਸ਼ਮੀ ਸਥਾਪਨਾ ਮਿਤੀ 26 ਮਈ ਨੂੰ ਕੀਤੀ ਜਾਵੇਗੀ।ਸਿੱਖੀ ਸੇਵਾ ਸੁਸਾਇਟੀ ਇਟਲੀ ਦੇ ਗੁਰਸ਼ਰਨ ਸਿੰਘ ਤੇ ਜਗਜੀਤ ਸਿੰਘ ਨੇ ਦੱਸਿਆ ਕਿ ਇਸ ਸਮਾਗਮ ਦੌਰਾਨ ਐੱਸ ਕੇ ਫਾਉਡੇਸ਼ਨ ਯੂ ਕੇ ਤੋਂ ਬੌਬੀ ਬਾਂਸਲ,ਲਾਹੌਰ ਤੌਨ ਅਜੂਮ ਜੈਵਿਦ ਅਤੇ ਵਿਸ਼ਵ ਵਿਆਪੀ ਅਨੇਕਾਂ ਪ੍ਰਮੁੱਖ ਸ਼ਖਸ਼ੀਅਤਾਂ ਸਿ਼ਰਕਤ ਕਰਨਗੀਆਂ।