ਇਸਲਾਮਾਬਾਦ, 14 ਮਈ (ਪੋਸਟ ਬਿਊਰੋ)- ਪਾਕਿਸਤਾਨ ਦੀ ਫੈਡਰਲ ਜਾਂਚ ਏਜੰਸੀ (ਐਫ ਆਈ ਏ) ਨੇ ਗੁਰਦੁਆਰਾ ਕਰਤਾਰਪੁਰ ਸਾਹਿਬ ਦੇ ਲਾਂਘੇ ਲਈ ਪਾਕਿ ਸਰਕਾਰ ਨੂੰ ਨਵੰਬਰ 2019 ਤੋਂ ਪਹਿਲਾਂ 21.5 ਕਰੋੜ ਡਾਲਰ ਦੇ ਫੰਡ ਜਾਰੀ ਕਰਨ ਲਈ ਅਪੀਲ ਕੀਤੀ ਹੈ ਅਤੇ ਇਸ ਵਿੱਚ ਦੇਰੀ ਤੋਂ ਬਚਣ ਲਈ ਕਿਹਾ ਹੈ।
ਐਫ ਆਈ ਏ ਇੰਮੀਗ੍ਰੇਸ਼ਨ ਦੇ ਡਾਇਰੈਕਟਰ ਨਾਸਿਰ ਮਹਿਮੂਦ ਸੱਤੀ ਪੀ ਐਸ ਪੀ ਨੇ ਇਸ ਬਾਰੇ ਦੱਸਿਆ ਕਿ ਇਸ ਰਕਮ ਵਿੱਚੋਂ 40,450,000 ਰੁਪਏ ਕੰਪਿਊਟਰ, ਕੈਮਰਿਆਂ, ਪਾਸਪੋਰਟ ਸਕੈਨਰ, ਰੂਟਰ, ਪ੍ਰਿੰਟਰ ਆਦਿ ਸਾਮਾਨ ਉੱਤੇ ਅਤੇ 21,195,000 ਰੁਪਏ ਯੂ ਪੀ ਐਸ, ਏਅਰ ਕੰਡੀਸ਼ਨਰ, ਕੰਧ ਅਤੇ ਛੱਤ ਵਾਲੇ ਪੱਖੇ, ਜਨਰੇਟਰ, ਮਾਈਕ੍ਰੋਵੇਵ ਓਵਨ, ਸਾਫ ਪਾਣੀ ਵਾਲੇ ਕੂਲਰਾਂ ਆਦਿ 'ਤੇ ਖਰਚ ਕੀਤੇ ਜਾਣਗੇ। ਕਰਤਾਰਪੁਰ ਲਾਂਘੇ ਲਈ ਐਫ ਆਈ ਏ ਦੇ ਸਟਾਫ ਦੀ ਤਨਖਾਹਾਂ ਉਤੇ 14,30,25,144 ਰੁਪਏ ਸਾਲਾਨਾ ਖਰਚੇ ਜਾਣਗੇ। ਉਕਤ ਸਟਾਫ 'ਚ ਇਕ ਡਿਪਟੀ ਡਾਇਰੈਕਟਰ, ਚਾਰ ਸਹਾਇਕ ਡਾਇਰੈਕਟਰ, ਚਾਰ ਸਿਸਟਮ ਇੰਚਾਰਜ, ਪੰਜ ਇੰਸਪੈਕਟਰ, ਛੇ ਸਬ ਇੰਸਪੈਕਟਰ, ਦੋ ਸਟੈਨੋ ਟਾਈਪਿਸਟ, ਚਾਰ ਟੈਕਨੀਕਲ ਸਹਾਇਕ, 16 ਸਹਾਇਕ ਸਬ ਇੰਸਪੈਕਟਰ, 55 ਹੈਡ ਕਾਂਸਟੇਬਲ ਅਤੇ 165 ਕਾਂਸਟੇਬਲਾਂ ਸਮੇਤ 18 ਹੋਰ ਕਰਮਚਾਰੀ ਨਿਯੁਕਤ ਕੀਤੇ ਗਏ ਹਨ। ਇਸ ਸਟਾਫ 'ਚ ਸਭ ਤੋਂ ਵਧੇਰੇ ਮਾਸਿਕ ਤਨਖਾਹ 92,795 ਰੁਪਏ ਡਿਪਟੀ ਡਾਇਰੈਕਟਰ ਨੂੰ ਦਿੱਤੀ ਜਾਵੇਗੀ। ਸੂਤਰਾਂ ਮੁਤਾਬਕ ਗੁਰਦੁਆਰਾ ਸ੍ਰੀ ਕਰਤਾਰਪੁਰ ਸਾਹਿਬ ਦੇ ਬਾਹਰਵਾਰ ਐਫ ਆਈ ਏ ਕਰਮਚਾਰੀਆਂ ਲਈ ਸਿੰਗਲ ਬੈਡ ਵਾਲੀਆਂ 50 ਬੈਰਕ, 50 ਕੈਬਿਨ ਤੇ 10-10 ਪਖਾਨੇ ਤੇ ਗੁਸਲਖਾਨੇ ਵੀ ਬਣਾਏ ਜਾ ਰਹੇ ਹਨ। ਭਾਰਤ 'ਚ ਲੋਕ ਸਭਾ ਚੋਣਾਂ ਪਿੱਛੋਂ ਪਾਕਿਸਤਾਨ ਇਕ ਵਾਰ ਫਿਰ ਤੋਂ ਕਰਤਾਰਪੁਰ ਸਾਹਿਬ ਲਾਂਘੇ ਬਾਰੇ ਭਾਰਤ ਨਾਲ ਗੱਲਬਾਤ ਕਰੇਗਾ। ਬੀਤੀ 16 ਅਪ੍ਰੈਲ ਤੋਂ ਬਾਅਦ ਦੋਵੇਂ ਮੁਲਕਾਂ ਵਿਚਾਲੇ ਕਰਤਾਰਪੁਰ ਲਾਂਘੇ ਬਾਰੇ ਵਾਰਤਾ ਰੁਕੀ ਹੋਈ ਹੈ। ਪਾਕਿ ਅਧਿਕਾਰੀਆਂ ਨੇ ਇਸਲਾਮਾਬਾਦ ਵਿਖੇ ਮੀਡੀਆ ਨੂੰ ਦੱਸਿਆ ਕਿ ਭਾਰਤ ਇਸ ਸਮੇਂ ਗੱਲਬਾਤ ਦੀ ਹਾਮੀ ਨਹੀਂ ਭਰ ਰਿਹਾ ਹੈ ਤੇ ਪਾਕਿ ਨੂੰ ਵਿਸ਼ਵਾਸ ਹੈ ਕਿ ਚੋਣਾਂ ਮਗਰੋਂ ਇਸ ਸਬੰਧ 'ਚ ਭਾਰਤ ਵੀ ਅੱਗੇ ਵਧੇਗਾ।