ਲੰਡਨ, 22 ਅਪ੍ਰੈਲ (ਪੋਸਟ ਬਿਊਰੋ)- ਪਿਛਲੇ ਦਿਨੀਂ ਕੀਤੇ ਗਏ ਅਧਿਐਨ 'ਚ ਪਤਾ ਲੱਗਾ ਹੈ ਕਿ ਲੱਖਾਂ ਲੋਕ ਅੱਜ ਵੀ ਸੰਵੇਦਨਸ਼ੀਲ ਖਾਤਿਆਂ ਉੱਤੇ ਆਸਾਨੀ ਨਾਲ ਯਾਦ ਰੱਖੇ ਜਾ ਸਕਣ ਵਾਲੇ ਪਾਸਵਰਡ, ਜਿਵੇਂ 123456 ਅਤੇ ਕਵਰਟੀ ਦੀ ਵਰਤੋਂ ਕਰ ਰਹੇ ਹਨ। ਕੰਪਿਊਟਰ ਕੀ-ਬੋਰਡ ਦੇ ਅੱਖਰਾਂ ਦੀ ਪਹਿਲੀ ਕਤਾਰ ਵਿੱਚ ਖੱਬੇ ਤੋਂ ਸੱਜੇ ਲਿਖੇ ਵੱਲ ਪੰਜ ਅੱਖਰ (ਕਿਊ, ਡਬਲਯੂ, ਈ ਆਰ ਅਤੇ ਟੀ) ਨੂੰ ‘ਕਵਰਟੀ’ ਕਿਹਾ ਜਾਂਦਾ ਹੈ।
ਬ੍ਰਿਟੇਨ ਦੇ ਨੈਸ਼ਨਲ ਸਾਇਬਰ ਸਕਿਓਰਟੀ ਸੈਂਟਰ (ਐੱਨ ਸੀ ਐੱਸ ਸੀ) ਦੇ ਅਧਿਐਨ ਵਿੱ ਇਹ ਗੱਲ ਪਤਾ ਲੱਗੀ ਹੈ, ਜਿਸ ਨਾਲ ਲੋਕਾਂ ਦੀ ਸੁਰੱਖਿਆ ਖਤਰੇ ਵਿੱਚ ਪੈ ਸਕਦੀ ਹੈ। ਇਸ ਸੰਬੰਧ ਵਿੱਚ ਐੱਨ ਸੀ ਐੱਸ ਸੀ ਨੇ ਕਿਹਾ ਕਿ ਲੋਕਾਂ ਨੂੰ ਜ਼ੋਰਦਾਰ ਪਾਸਵਰਡ ਦੀ ਵਰਤੋਂ ਕਰਨ ਲਈ ਤਿੰਨ ਬੇਤਰਤੀਬ, ਪਰ ਯਾਦ ਰੱਖੇ ਜਾਣ ਵਾਲੇ ਅੱਖਰ ਵਰਤਣੇ ਚਾਹੀਦੇ ਹਨ। ਅਧਿਐਨ ਵਿੱਚ ਪਤਾ ਲੱਗਾ ਹੈ ਕਿ 2.3 ਕਰੋੜ ਤੋਂ ਵੱਧ ਪਾਸਵਰਡਾਂ ਵਿੱਚ ਸਭ ਤੋਂ ਵੱਧ 123456 ਰੱਖਿਆ ਜਾਂਦਾ ਹੈ। ਦੂਜੇ ਨੰਬਰ ਉੱਤੇ ਸਭ ਤੋਂ ਵੱਧ ਪਸੰਦ ਕੀਤਾ ਜਾਣ ਵਾਲਾ ਪਾਸਵਰਡ 123456789 ਹੈ। ਇਨ੍ਹਾਂ ਦੋਵਾਂ ਪਾਸਵਰਡਾਂ ਨੂੰ ਸੰਨ੍ਹ ਲਾਉਣਾ ਕੋਈ ਔਖਾ ਨਹੀਂ। ਸਿਖਰਲੇ ਪੰਜ ਸਭ ਤੋਂ ਵੱਧ ਵਰਤੇ ਜਾਣ ਵਾਲੇ ਪਾਸਵਰਡਾਂ 'ਚ ਬਾਕੀ ਤਿੰਨ ਕਵਰਟੀ, ਪਾਸਵਰਡ ਅਤੇ 1111111 ਸ਼ਾਮਲ ਹਨ। ਬੀ ਬੀ ਸੀ ਦੀ ਰਿਪੋਰਟ ਅਨੁਸਾਰ ਪਾਸਵਰਡ 'ਚ ਵਰਤਿਆ ਜਾਣ ਵਾਲਾ ਆਮ ਨਾਂਅ ਐਸ਼ਲੇ ਹੈ। ਇਸ ਤੋਂ ਬਾਅਦ ਮਾਈਕਲ, ਡੇਨੀਅਲ, ਜੈਸਿਕਾ ਅਤੇ ਚਾਰਲੀ ਨਾਂਅ ਪਾਏ ਗਏ ਹਨ। ਐੱਨ ਸੀ ਐੱਸ ਸੀ ਦੇ ਟੈਕਨੀਕਲ ਡਾਇਰੈਕਟਰ ਇਯਾਨ ਲੇਵੀ ਨੇ ਕਿਹਾ ਕਿ ਜੋ ਲੋਕ ਜਾਣ-ਪਛਾਣੇ ਸ਼ਬਦਾਂ ਜਾਂ ਨਾਂਅ ਵਾਲੇ ਪਾਸਵਰਡ ਵਰਤਦੇ ਹਨ, ਉਨ੍ਹਾਂ ਦੇ ਖਾਤੇ ਹੈਕ ਹੋਣ ਦਾ ਖਤਰਾ ਵੱਧ ਰਹਿੰਦਾ ਹੈ।