ਨਕੋਦਰ, 19 ਅਪ੍ਰੈਲ (ਪੋਸਟ ਬਿਊਰੋ)- ਇਕਤਰਫਾ ਪਿਆਰ ਵਿੱਚ ਪਿੰਡ ਹੁਸੈਨਾਬਾਦ ਦੀ 18 ਸਾਲਾ ਲੜਕੀ ਦੀ ਹੱਤਿਆ ਕਰ ਕੇ ਲਾਸ਼ ਖੂਹ ਵਿੱਚ ਸੁੱਟ ਦੇਣ ਦਾ ਵਾਰਦਾਤ ਦੀ ਖਬਰ ਆਈ ਹੈ।
ਥਾਣਾ ਸਦਰ ਚੀ ਪੁਲਸ ਨੇ ਇਸ ਪਿੰਡ ਦੇ ਹੀ ਇੱਕ ਨੌਜਵਾਨ ਦੇ ਖਿਲਾਫ ਮ੍ਰਿਤਕਾ ਦੇ ਪਿਤਾ ਦੀ ਸ਼ਿਕਾਇਤ ਉੱਤੇ ਧਾਰਾ 302, 201 ਦਾ ਕੇਸ ਦਰਜ ਕਰ ਲਿਆ ਹੈ। ਲੜਕੀ ਤਾਨਿਆ ਪੁੱਤਰੀ ਸੁੱਚਾ ਸਿੰਘ ਪਿੰਡ ਹੁਸੈਨਾਬਾਦ ਅੱਠ ਮਾਰਚ ਤੋਂ ਘਰੋਂ ਗਾਇਬ ਸੀ ਤੇ ਉਸ ਦੀ 12 ਅਪ੍ਰੈਲ ਨੂੰ ਪਿੰਡ ਵਿੱਚ ਪੰਜਗੋਰੀਆਂ ਰੋਡ 'ਤੇ ਵੀਰਾਨ ਪਏ ਖੂਹ ਵਿੱਚੋਂ ਲਾਸ਼ ਮਿਲੀ ਸੀ। ਪੁਲਸ ਨੂੰ ਸੁੱਚਾ ਸਿੰਘ ਨੇ ਦੱਸਿਆ ਕਿ ਅੱਠ ਮਾਰਚ ਸ਼ਾਮ 7.30 ਵਜੇ ਤਾਨਿਆ ਬਿਨਾਂ ਦੱਸੇ ਘਰੋਂ ਚਲੀ ਗਈ ਅਤੇ ਫਿਰ ਵਾਪਸ ਨਹੀਂ ਆਈ ਤੇ ਲਾਸ਼ ਮਿਲੀ ਹੈ। ਸੁੱਚਾ ਸਿੰਘ ਨੇ ਪੁਲਸ ਨੂੰ 17 ਅਪ੍ਰੈਲ ਨੂੰ ਦੱਸਿਆ ਕਿ ਉਸ ਨੂੰ ਪਤਾ ਲੱਗਾ ਹੈ ਕਿ ਪਿੰਡ ਦਾ ਨੌਜਵਾਨ ਸੁਰਜੀਤ ਸਿੰਘ ਉਰਫ ਢੇਸੀ ਪੁੱਤਰ ਜੋਗਿੰਦਰ ਸਿੰਘ ਤਾਨਿਆ ਨੂੰ ਬਿਨਾਂ ਵਜ੍ਹਾ ਰਾਹ ਜਾਂਦੇ ਹੋਏ ਪ੍ਰੇਸ਼ਾਨ ਕਰਦਾ ਹੁੰਦਾ ਸੀ ਤੇ ਕੁੱਟਮਾਰ ਵੀ ਕਰਦਾ ਸੀ। ਉਹ ਲੋਕਾਂ ਨੂੰ ਕਹਿੰਦਾ ਸੀ ਕਿ ਜੇ ਤਾਨਿਆ ਮੇਰੀ ਨਾ ਹੋਈ ਤਾਂ ਉਸ ਨੂੰ ਕਿਸੇ ਹੋਰ ਦੀ ਵੀ ਨਹੀਂ ਹੋਣ ਦੇਵੇਗਾ। ਮੈਨੂੰ ਸ਼ੱਕ ਹੈ ਕਿ ਸੁਰਜੀਤ ਸਿੰਘ ਤੇ ਕਿਸੇ ਹੋਰ ਨੇ ਗਲਾ ਘੁੱਟ ਕੇ ਤਾਨਿਆ ਦੀ ਹੱਤਿਆ ਕਰ ਕੇ ਲਾਸ਼ ਖੂਹ ਵਿੱਚ ਸੁੱਟੀ ਹੈ। ਪੁਲਸ ਨੇ 17 ਅਪ੍ਰੈਲ ਦੇਰ ਰਾਤ ਦੋਸ਼ੀ ਨੌਜਵਾਨ ਦੇ ਖਿਲਾਫ ਕੇਸ ਦਰਜ ਕਰ ਲਿਆ ਤਾਂ ਇਸ ਦੇ ਬਾਅਦ ਜਾਣਕਾਰੀ ਮਿਲ ਰਹੀ ਹੈ ਕਿ ਦੋਸ਼ੀ ਵਿਦੇਸ਼ ਦੌੜ ਗਿਆ ਹੈ।
ਜਾਂਚ ਅਧਿਕਾਰੀ ਲਵਲੀਨ ਕੁਮਾਰ ਨੇ ਦੱਸਿਆ ਕਿ ਦੋਸ਼ੀ ਨੌਜਵਾਨ ਸੁਰਜੀਤ ਕੁਮਾਰ ਵਿਆਹਿਆ ਹੋਇਆ ਹੈ ਅਤੇ ਕੁਝ ਮਹੀਨੇ ਪਹਿਲਾਂ ਇਟਲੀ ਤੋਂ ਆਇਆ ਸੀ। ਪਤਾ ਲੱਗਾ ਹੈ ਕਿ ਉਹ ਵਿਦੇਸ਼ ਦੌੜ ਗਿਆ ਅਤੇ ਮ੍ਰਿਤਕਾ ਦਾ ਮੋਬਾਈਲ ਵੀ ਨਹੀਂ ਮਿਲਿਆ। ਏ ਐੱਸ ਪੀ ਨਕੋਦਰ ਵਤਸਲਾ ਗੁਪਤਾ ਨੇ ਦੱਸਿਆ ਕਿ ਕੇਸ ਦਰਜ ਕਰ ਕੇ ਪੁਲਸ ਜਾਂਚ ਕਰ ਰਹੀ ਹੈ। ਦੋਸ਼ੀ ਨੂੰ ਵਿਦੇਸ਼ ਤੋਂ ਵਾਪਸ ਲਿਆਉਣ ਦੀ ਕਾਰਵਾਈ ਕੀਤੀ ਜਾਏਗੀ।