ਪੰਜਾਬੀ ਪੋਸਟ ਸੰਪਾਦਕੀ

‘ਸਿੱਖ ਲੀਡਰਸਿ਼ੱਪ (ਗੁਰਦੁਆਰਿਆਂ ਅਤੇ ਸੰਸਥਾਵਾਂ) ਵਾਸਤੇ ਇਹ ਸ਼ਰਮਨਾਕ ਗੱਲ ਹੋਵੇਗੀ ਕਿ ਉਹ ਲਿਬਰਲ ਸਰਕਾਰ ਵੱਲੋਂ ਹੁਣ ਚੁੱਕੇ ਗਏ ਕਦਮਾਂ ਲਈ ਧੰਨਵਾਦ ਕਰਨ ਅਤੇ ਇਹ ਯਕੀਨ ਨਾਲ ਆਖਿਆ ਜਾ ਸਕਦਾ ਹੈ ਕਿ ਇਹਨਾਂ ਵਿੱਚੋਂ ਕਈ (ਆਗੂ) ਅਜਿਹਾ ਕਦਮ ਨੂੰ ਚੁੱਕਣ ਲਈ ਤਿਆਰ ਹੋ ਰਹੇ ਹਨ। ਸਾਡੇ ਪੰਥ ਨੂੰ ਕੈਨੇਡਾ ਲਈ ਅਤਿਵਾਦੀ ਖਤਰਾ ਕਿਹਾ ਗਿਆ ਹੈ ਅਤੇ ਸੱਤਾ ਵਿੱਚ ਬੈਠੇ ਲੋਕ ਸਾਡੇ ਨਾਮ ਨੂੰ ਉਸ ਰਿਪੋਰਟ ਵਿੱਚੋਂ ਕੱਢਣ ਤੋਂ ਇਨਕਾਰੀ ਹਨ ਜਿਹੜੀ ਜਨਤਕ ਰੂਪ ਵਿੱਚ ਉਪਲਬਧ ਹੈ। ਕੈਨੇਡਾ ਭਰ ਵਿੱਚ ਸਿੱਖ ਲੀਡਰਸਿ਼ੱਪ ਨੂੰ ਮੇਰਾ ਸੁਨੇਹਾ ਹੈ ਕਿ ਉਹ ਜਾਂ ਤਾਂ ਸਿੱਖ ਪੰਥ ਨਾਲ ਖੜੇ ਹੋ ਜਾਣ ਅਤੇ ਇਸ ਅੱਧਪੱਚਧੇ ‘ਮਤੇ’ ਨੂੰ ਸਵੀਕਾਰ ਕਰਨ ਤੋਂ ਇਨਕਾਰ ਕਰਨ ਜਾਂ ਆਪਣੇ ਅਹੁਦੇ ਛੱਡ ਕੇ ਉਹਨਾਂ ਨੂੰ ਕੰਮ ਕਰਨ ਦੇਣ ਜਿਹੜੇ ਕਰਨ ਦੀ ਸਮਰੱਥਾ ਰੱਖਦੇ ਹਨ’

ਉੱਪਰਲੇ ਸ਼ਬਦ ਸਿੱਖ ਲਿਬਰੇਸ਼ਨ ਫਰੰਟ ਦੇ ਆਗੂ ਅਤੇ ਗੁਰਦੁਆਰਾ ਦਸ਼ਮੇਸ਼ ਦਰਬਾਰ ਸਰੀ (ਵੈਨਕੂਵਰ) ਦੇ ਪ੍ਰਧਾਨ ਮੋਨਿੰਦਰ ਸਿੰਘ ਨੇ ਫੈਡਰਲ ਸਰਕਾਰ ਵੱਲੋਂ ਅਤਿਵਾਦ ਤੋਂ ਕੈਨੇਡਾ ਨੂੰ ਖਤਰੇ ਬਾਰੇ 2018 ਦੀ ਰਿਪੋਰਟ ਵਿੱਚੋਂ ਸਿੱਖ ਸ਼ਬਦ ਕੱਢ ਦਿੱਤੇ ਜਾਣ ਅਤੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਵੈਨਕੂਵਰ ਵਿਸਾਖੀ ਪਰੇਡ ਵਿੱਚ ਸ਼ਾਮਲ ਹੋਣ ਤੋਂ ਬਾਅਦ ਇੱਕ ਐਡੀਟੋਰੀਅਲ ਵਿੱਚ ਲਿਖੇ ਹਨ। ਲੰਬੇ ਸਮੇਂ ਤੋਂ ਗਰਮ ਖਿਆਲੀ ਮੁਹਿੰਮ ਨਾਲ ਜੁੜੇ ਮੋਨਿੰਦਰ ਸਿੰਘ ਬਾਰੇ ਕੱਲ ਮੇਨਸਟੀਰਮ ਮੀਡੀਆ ਖਾਸ ਕਰਕੇ ਪੋਸਟ ਮੀਡੀਆ ਦੇ ਨੈਸ਼ਨਲ ਪੋਸਟ ਸਮੇਤ ਅਨੇਕਾਂ ਅਖਬਾਰਾਂ ਵਿੱਚ ਆਰਟੀਕਲ ਛਪੇ ਹਨ। ਇਸ ਆਰਟੀਕਲ ਵਿੱਚ ਵਧੇਰੇ ਚਰਚਾ ਸਿੱਖ ਲਿਬਰੇਸ਼ਨ ਫਰੰਟ ਦੇ ਨਿਸ਼ਾਨ (ਲੋਗੋ) ਅਤੇ ਲੋਗੋ ਵਿੱਚ ਦਰਸਾਏ ਗਏ ਨਾਅਰੇ ਉੱਤੇ ਕੇਂਦਰਿਤ ਹੈ। ਇਸ ਜੱਥੇਬੰਦੀ ਦੇ ਲੋਗੋ ਵਿੱਚ ‘ਏ ਕੇ 47’ ਅਤੇ ‘ਸੂਰਾ ਸੋ ਪਹਿਚਾਨੀਏ ਜੋ ਲਰੈ ਦੀਨ ਕੇ ਹੇਤੁ’ ਦਰਜ਼ ਹਨ। ਮੋਨਿੰਦਰ ਸਿੰਘ ਨੂੰ ਆਰਟੀਕਲ ਵਿੱਚ ਇਹ ਆਖਦੇ ਹੋਏ ਵਿਖਾਇਆ ਗਿਆ ਹੈ ਕਿ ਅੱਜ ਕੈਨੇਡਾ ਵਿੱਚ ਹਥਿਆਰਬੰਦ ਮੁਹਿੰਮ ਦੀ ਕੋਈ ਹੋਂਦ ਨਹੀਂ ਅਤੇ ਅਸੀਂ ਕਿਸੇ ਹਥਿਆਰਬੰਦ ਮੁਹਿੰਮ ਦਾ ਕੈਨੇਡਾ ਵਿੱਚ ਜਿ਼ਕਰ ਵੀ ਨਹੀਂ ਕਰਦੇ ਸਗੋਂ ਸਾਡੀ ਮੁਰਾਦ ਪੰਜਾਬ ਹੈ।

ਦਿਲਚਸਪ ਗੱਲ ਇਹ ਹੈ ਕਿ ‘ਸੂਰਾ ਸੋ ਪਹਿਚਾਨੀਏ’ ਸ਼ਬਦ ਭਗਤ ਕਬੀਰ ਜੀ ਦਾ ਹੈ ਜਿਹਨਾਂ ਦੇ ਸ਼ਬਦ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਿੱਚ ਦਰਜ਼ ਹਨ। ਦਿਲਚਸਪ ਗੱਲ ਇਹ ਵੀ ਹੈ ਕਿ ਭਗਤ ਕਬੀਰ ਜੀ ਨੇ ਆਪਣੇ ਜੀਵਨ ਕਾਲ ਵਿੱਚ ਕਦੇ ਕਿਸੇ ਹਥਿਆਰਬੰਦ ਮੁਹਿੰਮ ਵਿੱਚ ਹਿੱਸਾ ਨਹੀਂ ਸੀ ਲਿਆ। ਅਧਿਆਤਮ ਮਾਰਗ ਦੇ ਵਿਆਖਿਆਕਾਰਾਂ ਮੁਤਾਬਕ ਭਗਤ ਕਬੀਰ ਜੀ ਨੇ ‘ਪੂਰਜਾ ਪੂਰਜਾ ਕੱਟ ਮਰੇ’ ਦਾ ਜਿ਼ਕਰ ਸੰਕੇਤ ਵਜੋਂ ਉਸ ਕਠਨ ਸੰਘਰਸ਼ ਲਈ ਕੀਤਾ ਜੋ ਮਨੁੱਖ ਨੂੰ ਆਪਣੇ ਅੰਦਰਲੇ ਵਿਕਾਰਾਂ ਨੂੰ ਮਾਰਨ ਲਈ ਕਰਨਾ ਪੈਂਦਾ ਹੈ।

ਮੋਨਿੰਦਰ ਸਿੰਘ ਅਤੇ ਸਿੱਖ ਲਿਬਰੇਸ਼ਨ ਫਰੰਟ ਉੱਤੇ ਮੀਡੀਆ ਦਾ ਫੋਕਸ ਵਰਤਮਾਨ ਵਿੱਚ ਕੁੱਝ ਸੁਆਲਾਂ ਨੂੰ ਜਨਮ ਦੇਂਦਾ ਹੈ। ਪਹਿਲਾ ਇਹ ਕਿ ਕੀ ਫੈਡਰਲ ਰਿਪੋਰਟ ਵਿੱਚੋਂ ਸਿੱਖ ਸ਼ਬਦ ਦੇ ਕੱਢੇ ਜਾਣ ਦੇ ਬਾਵਜੂਦ ਲਿਬਰਲ ਪਾਰਟੀ ਨੂੰ ਸਿੱਖ ਵੋਟ ਬੈਂਕ ਵਿੱਚ ਕੋਈ ਲਾਭ ਹੋਵੇਗਾ ਜਾਂ ਫੇਰ ਹੋਣ ਵਾਲੇ ਕਿਸੇ ਲਾਭ ਉੱਤੇ ਸਿੱਖ ਲਿਬਰੇਸ਼ਨ ਫਰੰਟ ਉੱਤੇ ਛਿੜੀ ਚਰਚਾ/ਮੋਨਿੰਦਰ ਸਿੰਘ ਦੇ ਵਿਚਾਰ ਭਾਰੂ ਹੋ ਜਾਣਗੇ। ਇਹ ਗੱਲ ਵਿਸ਼ੇਸ਼ ਕਰਕੇ ਸਰੀ ਏਰੀਆ ਬਾਰੇ ਕਹੀ ਜਾ ਸਕਦੀ ਹੈ ਜਿੱਥੇ ਦਸ਼ਮੇਸ਼ ਗੁਰਦੁਆਰਾ ਉੱਤੇ ਇਸ ਗਰੁੱਪ ਦਾ ਪ੍ਰਸ਼ਾਸ਼ਨ ਹੈ। ਦੂਜਾ ਮੁੱਦਾ ਹੈ ਕਿ ਜਿਵੇਂ ਵੈਨਕੂਵਰ ਵਿਸਾਖੀ ਪਰੇਡ ਵਿੱਚ ਲਿਬਰਲ ਅਤੇ ਕੰਜ਼ਰਵੇਟਿਵ ਆਗੂ ਹੁੰਮਹੁਮਾ ਕੇ ਹਾਜ਼ਰ ਹੋਏ ਸਨ, ਕੀ 20 ਅਪਰੈਲ ਦਿਨ ਸ਼ਨਿਚਰਵਾਰ ਨੂੰ ਸਰੀ ਵਿੱਚ ਹੋਣ ਜਾ ਰਹੇ ਨਗਰ ਕੀਰਤਨ ਵਿੱਚ ਮੋਨਿੰਦਰ ਸਿੰਘ ਦਾ ਗਰੁੱਪ ਉਹਨਾਂ ਨੂੰ ਸ਼ਾਮਲ ਹੋਣ ਦੇਵੇਗਾ ਜਾਂ ਨਹੀਂ?

ਸਿੱਖ ਲਿਬਰੇਸ਼ਨ ਫਰੰਟ ਉੱਤੇ ਕੇਂਦਰਿਤ ਹੋਇਆ ਧਿਆਨ ਇਹ ਸੁਆਲ ਵੀ ਖੜਾ ਕਰਦਾ ਹੈ ਕਿ ਕੀ ਕੈਨੇਡਾ ਵਿੱਚ ਗਰਮ ਖਿਆਲੀ ਸਿੱਖ ਮੁਹਿੰਮ ਪ੍ਰਤੀ ਕੈਨੇਡਾ ਦੀਆਂ ਫੈਡਰਲ ਸਰਕਾਰਾਂ ਦਾ ਰਵਈਆ ਭੱਵਿਖ ਕਿਹੋ ਜਿਹਾ ਰਹੇਗਾ ਅਤੇ ਅਕਤੂਬਰ ਵਿੱਚ ਆ ਰਹੀਆਂ ਚੋਣਾਂ ਵਿੱਚ ਸਿਆਸੀ ਪਾਰਟੀਆਂ ਦੀ ਸਿੱਖ ਮੁੱਦਿਆਂ ਪ੍ਰਤੀ ਪਹੁੰਚ ਕਿਹੋ ਜਿਹੀ ਰਹੇਗੀ।