ਗੋਹਾਣਾ, 18 ਅਪ੍ਰੈਲ (ਪੋਸਟ ਬਿਊਰੋ)- ਸਦਰ ਥਾਣਾ ਪੁਲਸ ਨੇ ਲੁਟੇਰੇ ਗਰੋਹ ਦਾ ਪਰਦਾ ਫਾਸ਼ ਕਰ ਕੇ ਦੋ ਔਰਤਾਂ ਸਮੇਤ ਛੇ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਨ੍ਹਾਂ ਵਿੱਚ ਤਿੰਨ ਸਕੇ ਭਰਾ ਹਨ। ਕੱਲ੍ਹ ਪੁਲਸ ਨੇ ਦੋਸ਼ੀਆਂ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ, ਜਿਥੋਂ ਚਾਰ ਦੋਸ਼ੀਆਂ ਦਾ ਦੋ ਦਿਨ ਦਾ ਰਿਮਾਂਡ ਮਨਜ਼ੂਰ ਹੋਇਆ। ਦੋਸ਼ੀ ਔਰਤਾਂ ਨੂੰ ਨਿਆਇਕ ਹਿਰਾਸਤ ਵਿੱਚ ਭੇਜ ਦਿੱਤਾ ਗਿਆ। ਗਰੋਹ ਰੋਹਤਕ, ਪਾਣੀਪਤ, ਜੀਂਦ ਤੇ ਕਰਨਾਲ ਜ਼ਿਲਿਆਂ ਵਿੱਚ ਸਰਗਰਮ ਸੀ। ਪੁਲਸ ਨੇ ਦੋਸ਼ੀਆਂ ਤੋਂ ਇਕ ਸੈਂਟਰੋ ਕਾਰ ਵੀ ਬਰਾਮਦ ਕੀਤੀ ਹੈ। ਦੋਸ਼ੀਆਂ ਦੀ ਪਛਾਣ ਪਾਣੀਪਤ ਦੇ ਪਿੰਡ ਦਰਿਆਪੁਰ ਦੇ ਕੁਲਵਿੰਦਰ, ਲਖਵਿੰਦਰ ਅਤੇ ਗੁਰਪ੍ਰੀਤ, ਜੀਂਦ ਜ਼ਿਲੇ ਦੇ ਪਿੰਡ ਅੰਟਾ ਦੇ ਮੁਨੀਮ, ਪਿੰਡ ਕਰਸਿੰਧੂ ਦੀ ਔਰਤ ਮੋਮੀਨਾ ਅਤੇ ਕਰਨਾਲ ਦੇ ਪਿੰਡ ਫੂਸਗੜ੍ਹ ਦੀ ਸ਼ਕੁੰਤਲਾ ਦੇ ਰੂਪ ਵਿੱਚ ਹੋਈ ਹੈ। ਪੁੱਛਗਿੱਛ ਵਿੱਚ ਸਾਹਮਣੇ ਆਇਆ ਕਿ ਔਰਤਾਂ ਸੜਕ ਕਿਨਾਰੇ ਖੜੇ ਹੋ ਕੇ ਰਾਹਗੀਰਾਂ ਤੋਂ ਲਿਫਟ ਮੰਗਂਦੀਆਂ ਸਨ ਅਤੇ ਬਾਅਦ ਵਿੱਚ ਉਨ੍ਹਾਂ ਦੇ ਸਾਥੀ ਵੀ ਮੌਕੇ 'ਤੇ ਪਹੁੰਚ ਜਾਂਦੇ ਤੇ ਲੋਕਾਂ ਨੂੰ ਔਰਤਾਂ ਨਾਲ ਛੇੜਛਾੜ ਦਾ ਡਰ ਦਿਖਾ ਕੇ ਲੁੱਟ ਖੋਹ ਕਰਦੇ ਸਨ। ਉਨ੍ਹਾਂ ਨੇ ਗੋਹਾਣਾ ਖੇਤਰ ਵਿੱਚ ਬੀਤੇ 29 ਮਾਰਚ ਨੂੰ ਰੋਹਤਕ ਦੇ ਪਿੰਡ ਘਿਲੌੜ ਕਲਾਂ ਦੇ ਰਣਧੀਰ ਨਾਲ ਲੁੱਟ ਖੋਹ ਕੀਤੀ ਸੀ।
ਸਦਰ ਥਾਣਾ ਦੇ ਇੰਚਾਰਜ ਸੰਦੀਪ ਅਹਿਲਾਵਤ ਨੇ ਦੱਸਿਆ ਕਿ ਐਸ ਆਈ ਕਪਤਾਨ ਸਿੰਘ ਦੀ ਟੀਮ ਖਰਖੌਦਾ ਰੋਡ 'ਤੇ ਗਸ਼ਤ ਕਰ ਰਹੀ ਸੀ। ਇਸ ਦੌਰਾਨ ਸੂਚਨਾ ਮਿਲੀ ਕਿ ਕਈ ਵਿਅਕਤੀ ਸੈਂਟਰੋ ਕਾਰ ਵਿੱਚ ਲੁੱਟ ਖੋਹ ਦੀ ਫਿਰਾਕ ਵਿੱਚ ਘੁੰਮ ਰਹੇ ਹਨ, ਜਿਨ੍ਹਾਂ ਵਿੱਚ ਦੋ ਔਰਤਾਂ ਹਨ। ਪੁਲਸ ਨੇ ਰੇਡ ਕਰਕੇ ਉਨ੍ਹਾਂ ਨੂੰ ਕਾਬੂ ਕਰਕੇ ਪੁੱਛਗਿੱਛ ਕੀਤੀ। ਇਸ ਦੇ ਬਾਅਦ ਦੋਸ਼ੀਆਂ ਨੇ ਲੁੱਟ ਖੋਹ ਅਤੇ ਹੋਰ ਘਟਨਾਵਾਂ ਦਾ ਖੁਲਾਸਾ ਕੀਤਾ। ਪੁਲਸ ਪੁੱਛਗਿੱਛ ਵਿੱਚ ਸਾਹਮਣੇ ਆਇਆ ਕਿ ਕੁਲਵਿੰਦਰ ਲੁੱਟ, ਚੋਰੀ, ਸਨੈਚਿੰਗ ਸਮੇਤ ਕਰੀਬ 70 ਘਟਨਾਵਾਂ ਵਿੱਚ ਸ਼ਾਮਲ ਰਹਿ ਚੁੱਕਾ ਹੈ। ਲਖਵਿੰਦਰ ਕਰੀਬ 18 ਘਟਨਾਵਾਂ ਅਤੇ ਮੁਨੀਮ ਕਰੀਬ 12 ਘਟਨਾਵਾਂ ਵਿੱਚ ਸ਼ਾਮਲ ਰਹਿ ਚੁੱਕਾ ਹੈ।