ਵਾਸ਼ਿੰਗਟਨ, 18 ਅਪ੍ਰੈਲ (ਪੋਸਟ ਬਿਊਰੋ)- ਅਮਰੀਕਾ ਨੇ ਅੱਜ ਕਿਊਬਾ ਤੇ ਵੈਨੇਜ਼ੁਏਲਾ ਉੱਤੇ ਨਵੀਆਂ ਪਾਬੰਦੀਆਂ ਲਾ ਦਿੱਤੀਆਂ ਹਨ। ਇਨ੍ਹਾਂ ਪਾਬੰਦੀਆਂ ਵਿਚ ਲੈਟਿਨ ਅਮਰੀਕੀ ਦੇਸ਼ ਦੀ ਯਾਤਰਾ ਵੀ ਸੀਮਤ ਕਰ ਦਿੱਤੀ ਹੈ।
ਇਕ ਅੰਗਰੇਜ਼ੀ ਅਖਬਾਰ ਦੀ ਖਬਰ ਮੁਤਾਬਕ ਨਵੇਂ ਪ੍ਰਬੰਧ ਹੇਠ ਕਿਊਬਾ ਦੀਆਂ ਸਰਹੱਦੀ ਨੀਤੀਆਂ ਨੂੰ ਪਾਬੰਦੀ ਸ਼ੁਦਾ ਕਰ ਦਿੱਤਾ ਗਿਆ ਤੇ ਫੀਡਲ ਕਾਸਟਰੋ ਦੀ ਅਗਵਾਈ ਵਾਲੀ ਕਿਊਬਾ ਸਰਕਾਰ ਵੱਲੋਂ ਦੇਸ਼ ਤੋਂ ਕੱਢੇ ਲੋਕਾਂ ਦੀਆਂ ਪਹਿਲਾਂ ਜ਼ਬਤ ਕੀਤੀਆਂ ਜਾਇਦਾਦਾਂ ਲਈ ਕੇਸ ਦਾਇਰ ਕਰਨ ਦੀ ਖੁੱਲ੍ਹ ਦੇ ਦਿੱਤੀ ਹੈ। ਇਸ ਨਾਲ ਅਮਰੀਕਾ ਨੇ ਇਹ ਐਲਾਨ ਵੀ ਕੀਤਾ ਕਿ ਕਿਊਬਾ ਦੇ ਅਮਰੀਕੀ ਨਾਗਰਿਕ ਉਸ ਟਾਪੂ ਉਤੇ ਆਪਣੇ ਰਿਸ਼ਤੇਦਾਰਾਂ ਨੂੰ 1,000 ਡਾਲਰ ਪ੍ਰਤੀ ਵਿਅਕਤੀ ਭੇਜ ਸਕਦੇ ਹਨ। ਵੈਨੇਜ਼ੁਏਲਾ ਦੇ ਰਾਸ਼ਟਰਪਤੀ ਨਿਕੋਲਸ ਮਾਦੁਰੋ ਨੂੰ ਗਦੀਉਂ ਲਾਹੇ ਜਾਣ ਅਤੇ ਕਿਊਬਾ ਤੇ ਨਿਕਾਰਾਗੁਆ ਸਮੇਤ ਉਨ੍ਹਾਂ ਸਾਰੇ ਦੇਸ਼ਾਂ ਉਤੇ ਦਬਾਅ ਪਾਉਣ ਦੀ ਕੋਸ਼ਿਸ਼ ਵਿਚ ਇਹ ਕਦਮ ਚੁੱਕੇ ਗਏ ਹਨ।
ਖਬਰ ਏਜੰਸੀ ਨੇ ਅਮਰੀਕਾ ਦੇ ਕੌਮੀ ਸੁਰੱਖਿਆ ਸਲਾਹਕਾਰ ਜੌਨ ਬੋਲਟਨ ਦੇ ਹਵਾਲੇ ਨਾਲ ਕਿਹਾ ਕਿ ‘ਖਜ਼ਾਨਾ ਵਿਭਾਗ ਕਿਊਬਾ ਵਿਚ ਗੈਰ-ਪਰਿਵਾਰਕ ਯਾਤਰਾ ਨੂੰ ਪਾਬੰਦੀ ਸ਼ੁਦਾ ਕਰਨ ਲਈ ਅੱਗੇ ਦੀਆਂ ਰੈਗੁਲੇਟਰੀ ਤਬਦੀਲੀਆਂ ਲਾਗੂ ਕਰੇਗਾ। ਇਹ ਨਵੇਂ ਉਪਾਅ ਅਮਰੀਕਾ ਦੀ ਕਰੰਸੀ ਤੱਕ ਕਿਊਬਾ ਦੀ ਪਹੁੰਚ ਦੂਰ ਕਰਨ ਵਿਚ ਮਦਦ ਕਰਨਗੇ।` ਬੋਲਟਨ ਨੇ ਸਾਲ 1961 ਦੀ ‘ਬੇ ਆਫ ਪਿਗਸ` ਦੇ ਹਮਲੇ ਦੀ ਅਸਫਲਤਾ ਦੀ 58ਵੀਂ ਵਰ੍ਹੇਗੰਢ ਮੌਕੇ ਮਿਆਮੀ ਵਿਚ ਇਕ ਸਭਾ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਵੈਨੇਜ਼ੁਏਲਾ ਵਿਚ ਕਈ ਕਿਊਬਨ ਅਸਲ ਵਿਚ ਮਿਲਟਰੀ ਅਤੇ ਖੁਫੀਆ ਏਜੰਟ ਹਨ। ਉਹ ਵੈਨੇਜ਼ੁਏਲਾ ਦੀ ਫੌਜ ਕੰਟਰੋਲ ਕਰਦੇ ਹਨ ਤੇ ਮਾਦੁਰੋ ਨੂੰ ਸੱਤਾ ਵਿਚ ਰੱਖਣ ਵਿਚ ਮਦਦ ਕਰਦੇ ਹਨ। ਇਸ ਐਲਾਨ ਤੋਂ ਇਕ ਦਿਨ ਪਹਿਲਾਂ ਅਮਰੀਕੀ ਵਿਦੇਸ਼ ਮੰਤਰੀ ਮਾਈਕ ਪੌਂਪੀਓ ਨੇ ਵੀ ਕਿਹਾ ਸੀ ਕਿ ਅਮਰੀਕਾ ਸਾਲ 1959 ਦੀ ਕਿਊਬਾ ਕ੍ਰਾਂਤੀ ਵੇਲੇ ਅਮਰੀਕੀ ਨਾਗਰਿਕਾਂ ਦੀ ਜ਼ਬਤ ਕੀਤੀ ਜਾਇਦਾਦ ਦੀ ਵਰਤੋਂ ਕਰਨ ਵਾਲੇ ਵਿਦੇਸ਼ੀ ਕਾਰੋਬਾਰਾਂ ਉੱਤੇ ਮੁਕੱਦਮਾ ਚਲਾਉਣ ਦੀ ਇਜਾਜ਼ਤ ਦੇ ਦੇਵੇਗਾ।