ਖੰਨਾ, 17 ਅਪ੍ਰੈਲ (ਪੋਸਟ ਬਿਊਰੋ)- ਪੰਜਾਬ ਦੇ ਇੱਕ ਕੇਸ ਦੌਰਾਨ ਪਿਓ-ਪੁੱਤਰ ਨੂੰ ਕਤਲ ਦੇ ਦੋਸ਼ੀ ਮੰਨੇ ਜਾਣ ਮਗਰੋਂ ਸੁਪਰੀਮ ਕੋਰਟ ਨੇ ਪੁੱਤਰ ਨੂੰ ਨਾਬਾਲਗ ਮੰਨ ਕੇ ਛੱਡ ਦਿੱਤਾ ਹੈ।
ਵਰਨਣ ਯੋਗ ਹੈ ਕਿ ਰੋਪੜ ਦੀ ਜ਼ਿਲ੍ਹਾ ਸੈਸ਼ਨ ਕੋਰਟ ਨੇ ਅਸ਼ੋਕ ਕੁਮਾਰ ਮਹਿਰਾ ਤੇ ਉਸ ਦੇ ਪੁੱਤਰ ਸੁਖਵੰਤ ਕੁਮਾਰ ਨੂੰ ਇੱਕ ਹੱਤਿਆ ਦੇ ਦੋਸ਼ ਵਿੱਚ ਛੇ ਜੂਨ 2000 ਨੂੰ ਬਰੀ ਕਰ ਦਿੱਤਾ ਸੀ, ਜਿਸ ਦੇ ਵਿਰੁੱਧ ਪੰਜਾਬ ਸਰਕਾਰ ਨੇ ਹਾਈ ਕੋਰਟ ਵਿੱਚ ਅਪੀਲ ਕਰ ਦਿੱਤੀ ਸੀ। ਹਾਈ ਕੋਰਟ 21 ਜੁਲਾਈ 2008 ਨੂੰ ਪਿਤਾ ਅਤੇ ਪੁੱਤਰ ਦੋਵਾਂ ਨੂੰ ਦੋਸ਼ੀ ਮੰਨ ਕੇ ਉਮਰ ਕੈਦ ਦੀ ਸਜ਼ਾ ਸੁਣਾ ਦਿੱਤੀ। ਇਸ ਦੇ ਵਿਰੋਧ ਵਿੱਚ ਦੋਵੇਂ ਪਿਤਾ ਅਤੇ ਪੁੱਤਰ ਸੁਪਰੀਮ ਕੋਰਟ ਵਿੱਚ ਅਪੀਲ ਕਰਨ ਚਲੇ ਗਏ। ਇਸ ਦੌਰਾਨ ਪਿਤਾ ਦੀ ਮੌਤ ਹੋ ਗਈ, ਪਰ ਸੁਣਵਾਈ ਵਿੱਚ ਸੁਪਰੀਮ ਕੋਰਟ ਨੂੰ ਦੱਸਿਆ ਗਿਆ ਕਿ ਸੁਖਵੰਤ ਕੁਮਾਰ ਦੀ ਜਨਮ ਤਰੀਕ ਜਨਮ ਸਰਟੀਫਿਕੇਟਸ ਵਿੱਚ 14 ਜੂਨ 1980 ਦਰਜ ਹੈ, ਜਦ ਕਿ ਵਾਰਦਾਤ 14 ਜਨਵਰੀ 1998 ਨੂੰ ਹੋਈ ਸੀ। ਇਸ ਉੱਤੇ ਸੁਪਰੀਮ ਕੋਰਟ ਨੇ ਮੰਨਿਆ ਕਿ ਵਾਰਦਾਤ ਕਰਦੇ ਸਮੇਂ ਪੁੱਤਰ ਦੀ ਉਮਰ 17 ਸਾਲ ਪੰਜ ਮਹੀਨੇ ਸੀ ਅਤੇ 18 ਸਾਲ ਤੋਂ ਘੱਟ ਹੋਣ ਕਾਰਨ ਉਸ ਨੂੰ ਨਾਬਾਲਗ ਮੰਨ ਕੇ ਬਰੀ ਕਰ ਦਿੱਤਾ ਗਿਆ ਹੈ। ਇਸ ਕੇਸ ਵਿੱਚ ਭਾਵੇਂ ਹੇਠਲੀਆਂ ਅਦਾਲਤਾਂ ਵਿੱਚ ਇਸ ਗੱਲ ਨਹੀਂ ਸੀ ਵਿਚਾਰੀ ਗਈ, ਫਿਰ ਵੀ ਸੁਪਰੀਮ ਕੋਰਟ ਨੇ ਇੱਕ ਪੁਰਾਣੇ ਕੇਸ ਦਾ ਹਵਾਲਾ ਦੇ ਕੇ 15 ਅਪ੍ਰੈਲ ਨੂੰ ਐਲਾਨ ਕੀਤਾ ਹੈ ਕਿ ਜੁਵੇਨਾਈਲ ਜਸਟਿਸ ਐਕਟ ਅਧੀਨ ਦੋਸ਼ੀ ਪਹਿਲਾਂ ਹੀ ਤੈਅ ਕੀਤੀ ਤੋਂ ਵੱਧ ਸਜ਼ਾ ਕੱਟ ਚੁੱਕਿਆ ਹੈ, ਇਸ ਲਈ ਉਸ ਦੀ ਬਾਕੀ ਦੀ ਸਜ਼ਾ ਮੁਆਫ ਕੀਤੀ ਜਾਂਦੀ ਹੈ।