ਮੈਲਬਰਨ, 17 ਅਪ੍ਰੈਲ (ਪੋਸਟ ਬਿਊਰੋ)- ਆਸਟਰੇਲੀਆ ਵਿੱਚ ਬਾਹਰਲੇ ਦੇਸ਼ਾਂ ਤੋਂ ਆਉਂਦੇ ਯਾਤਰੀਆਂ ਲਈ ਵਰਜਿਤ ਚੀਜ਼ਾਂ ਦਾ ਐਲਾਨ ਨਾ ਕਰਨ ਉੱਤੇ ਉਨ੍ਹਾਂ ਦਾ ਵੀਜ਼ਾ ਰੱਦ ਕੀਤਾ ਜਾ ਸਕਦਾ ਹੈ। ਇਹ ਕਾਨੂੰਨ 17 ਅਪ੍ਰੈਲ ਤੋਂ ਸਖਤੀ ਨਾਲ ਲਾਗੂ ਕੀਤਾ ਜਾ ਰਿਹਾ ਹੈ, ਕਿਉਂਕਿ ਇਥੇ ਗੰਭੀਰ ਕਿਸਮ ਦੀਆਂ ਬਿਮਾਰੀਆਂ ਦੇ ਵਧਣ ਦੇ ਆਸਾਰ ਦੀ ਸਿਹਤ ਵਿਭਾਗ ਵੱਲੋਂ ਚਿਤਾਵਨੀ ਦਿੱਤੀ ਗਈ ਹੈ।
ਕੁਝ ਵਿਦੇਸ਼ੀ ਖਾਣੇ ਪੌਦਿਆਂ ਅਤੇ ਜਾਨਵਰਾਂ ਦੇ ਉਤਪਾਦਾਂ ਤੋਂ ਬਣਦੇ ਹਨ, ਜੋ ਬੜੇ ਹਾਨੀਕਾਰਕ ਪਾਏ ਜਾਂਦੇ ਹਨ। ਹਵਾਈ ਅੱਡੇ ਦੀ ਅਥਾਰਟੀ ਨੇ ਸਖਤੀ ਨਾਲ ਤਾੜਨਾ ਕਰਦੇ ਹੋਏ ਦੱਸਿਆ ਕਿ ਜੇ ਕੋਈ ਯਾਤਰੀ ਕਸਟਮ ਕਾਰਡ ਉਪਰ ਜੋ ਨਾਲ ਲਿਆਂਦਾ ਹੈ, ਉਸ ਦੇ ਉਤਰ ਨਾਂਹ ਜਾਂ ਹਾਂ ਵਿੱਚ ਦੇਣ 'ਚ ਅਸਫਲ ਰਿਹਾ ਤਾਂ ਉਸ ਦਾ ਵੀਜ਼ਾ ਰੱਦ ਕਰ ਦਿੱਤਾ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਕਈ ਲੋਕ ਆਪਣੇ ਦੋਸਤਾਂ, ਰਿਸ਼ਤੇਦਾਰਾਂ ਨੂੰ ਇਥੇ ਪਾਬੰਦੀ ਸ਼ੁਦਾ ਚੀਜ਼ਾਂ ਲਿਆਉਣ ਨੂੰ ਕਹਿ ਦਿੰਦੇ ਹਨ, ਪਰ ਜੇ ਉਹ ਲੋਕ ਕਸਟਮ ਕਾਰਡ 'ਚ ਦੱਸਣ 'ਚ ਅਸਫਲ ਰਹਿੰਦੇ ਹਨ ਤਾਂ ਉਹ ਮੁਸ਼ਕਿਲ 'ਚ ਪੈ ਸਕਦੇ ਹਨ। ਦਵਾਈਆਂ, ਕਿਸੇ ਵੀ ਤਰ੍ਹਾਂ ਦਾ ਖਾਣਾ, ਪਲਾਂਟ, ਬੀਜ, ਫਲ, ਦੁੱਧ ਤੋਂ ਬਣੀਆਂ ਮਿਠਈਆਂ ਦਾ ਆਪਣੇ ਕਸਟਮ ਕਾਰਡ 'ਤੇ ਸੋਚ ਸਮਝ ਕੇ ਉਤਰ ਦਿਓ, ਵਰਨਾ ਵੀਜ਼ਾ ਕੈਂਸਲ ਕਰਨ ਦੇ ਨਾਲ ਭਾਰੀ ਜੁਰਮਾਨਾ ਕੀਤਾ ਜਾ ਸਕਦਾ ਹੈ। ਏਅਰਪੋਰਟ ਅਥਾਰਟੀ ਨੇ ਬਾਹਰਲੇ ਦੇਸ਼ਾਂ ਤੋਂ ਆਉਂਦੇ ਮੁਸਾਫਰਾਂ ਨੂੰ ਇਨ੍ਹਾਂ ਨਿਯਮਾਂ ਦਾ ਪਾਲਣ ਕਰਨ ਲਈ ਅਪੀਲ ਕੀਤੀ ਹੈ।