ਡੇਰਾਬੱਸੀ, 16 ਅਪ੍ਰੈਲ (ਪੋਸਟ ਬਿਊਰੋ)- ਡੇਰਾਬੱਸੀ ਦੇ ਨੌਜਵਾਨ ਕਾਂਗਰਸੀ ਆਗੂ ਜਸਵੀਰ ਸਿੰਘ ਜੱਸਾ ਸੈਣੀ ਨੇ ਕੱਲ੍ਹ ਪਿੱਪਲ ਦੇ ਦਰੱਖਤ ਨਾਲ ਰੱਸੀ ਬੰਨ੍ਹ ਕੇ ਖੁਦਕੁਸ਼ੀ ਕਰ ਲਈ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਜਸਬੀਰ ਜੱਸਾ ਦੀ ਆਸ਼ਿਆਨਾ ਕਾਲੋਨੀ ਦੀ ਰਿਹਾਇਸ਼ 'ਤੇ ਕੱਲ੍ਹ ਸਵੇਰ ਵੇਲੇ ਕੈਂਪਰਾਂ ਦੇ ਪਾਣੀ ਦੀ ਸਪਲਾਈ ਦੇਣ ਆਏ ਟੈਂਪੂ ਚਾਲਕ ਨੇ ਰੁੱਖ ਨਾਲ ਝੂਲਦੀ ਲਾਸ਼ ਵੇਖ ਕੇ ਸਕਿਉਰਟੀ ਗਾਰਡ ਨੂੰ ਦੱਸਿਆ ਅਤੇ ਇਸ ਦੀ ਸੂਚਨਾ ਮਿਲਣ 'ਤੇ ਪੁਲਸੱ ਨੇ ਆਣ ਕੇ ਲਾਸ਼ ਦਰੱਖਤ ਉਤੋਂ ਲਾਹੀ। ਜਸਵੀਰ ਸਿੰਘ ਜੱਸਾ ਤੇ ਉਸ ਦੀ ਪਤਨੀ ਪਿਛਲੇ ਲੰਮੇ ਸਮੇਂ ਤੋਂ ਕਾਂਗਰਸ ਪਾਰਟੀ 'ਚ ਸਰਗਰਮੀ ਨਾਲ ਕੰਮ ਕਰਦੇ ਆ ਰਹੇ ਹਨ। ਉਸ ਦੀ ਪਤਨੀ ਮੀਰਾ ਕੁਮਾਰੀ ਡੇਰਾਬੱਸੀ ਸ਼ਹਿਰੀ ਕਾਂਗਰਸ ਦੀ ਮਹਿਲਾ ਪ੍ਰਧਾਨ ਹਨ। ਉਸ ਦੇ ਮਾਂ-ਬਾਪ ਕਿਸੇ ਬਿਮਾਰੀ ਕਾਰਨ ਚੱਲ ਫਿਰ ਨਹੀਂ ਸਕਦੇ, ਜੋ ਪਿਛਲੇ ਕਈ ਸਾਲਾਂ ਤੋਂ ਬਿਸਤਰੇ 'ਤੇ ਹਨ। ਦੋ ਭੈਣਾਂ ਦਾ ਇਕਲੌਤਾ ਭਰਾ ਜੱਸਾ ਸੈਣੀ ਕਈ ਸਾਲਾਂ ਤੋਂ ਮਾਤਾ ਪਿਤਾ ਦੀ ਸੇਵਾ ਕਰਦਾ ਆ ਰਿਹਾ ਸੀ। ਕੱਲ੍ਹ ਤੜਕੇ 2.25 ਵਜੇ ਉਹ ਘਰ ਤੋਂ ਬਾਹਰ ਆਇਆ ਅਤੇ 2.35 ਵਜੇ ਮੁੜ ਘਰ ਵਾਪਸ ਆ ਗਿਆ। ਦੁਬਾਰਾ ਉਹ ਕਦੋਂ ਘਰ ਤੋਂ ਨਿਕਲਿਆ, ਪਰਵਾਰ ਨੂੰ ਇਸ ਦਾ ਪਤਾ ਨਹੀਂ। ਸਵੇਰੇ ਕਰੀਬ ਛੇ ਵਜੇ ਜਦੋਂ ਘਰਾਂ 'ਚ ਪਾਣੀ ਦੇ ਕੈਂਪਰਾਂ ਦੀ ਸਪਲਾਈ ਦੇਣ ਆਏ ਇਕ ਟੈਂਪੂ ਚਾਲਕ ਨੇ ਉਸ ਦੀ ਲਾਸ਼ ਪਿੱਪਲ ਦੇ ਦਰੱਖਤ ਨਾਲ ਲਟਕਦੀ ਹੋਈ ਵੇਖੀ ਤਾਂ ਉਸ ਨੇ ਰੌਲਾ ਪਾਇਆ।
ਜੱਸਾ ਸੈਣੀ ਪ੍ਰਾਪਰਟੀ ਦੇ ਕਾਰੋਬਾਰ ਦੇ ਨਾਲ ਸਮਾਜ ਸੇਵੀ ਤੇ ਕਾਂਗਰਸ 'ਚ ਮੋਹਰੀ ਭੂਮਿਕਾ ਨਿਭਾਉਂਦੇ ਸਨ। ਉਨ੍ਹਾਂ ਦੀ ਪਤਨੀ ਮੀਰਾ ਕੁਮਾਰੀ ਪਿਛਲੀ ਕੌਂਸਲ ਦੀ ਚੋਣ 'ਚ ਉਮੀਦਵਾਰ ਸੀ। ਇਸ ਵਾਰ ਵੀ ਪਰਵਾਰ ਆਪਣੇ ਵਾਰਡ ਨੰਬਰ ਸੱਤ ਤੋਂ ਕੌਂਸਲ ਦੀ ਚੋਣ ਲੜਨ ਦੀ ਤਿਆਰੀ ਕਰ ਰਿਹਾ ਸੀ।