ਪੰਜਾਬੀ ਪੋਸਟ ਸੰਪਾਦਕੀ
ਉਂਟੇਰੀਓ, ਸਸਕੈਚਵਨ, ਮੈਨੀਟੋਬਾ ਅਤੇ ਨਿਊ-ਬਰੱਨਸਵਿੱਕ ਵਿੱਚ ਗੈਸ ਦੀਆਂ ਕੀਮਤਾਂ ਵਿੱਚ ਸਾਢੇ ਚਾਰ ਸੈਂਟ ਤੋਂ ਲੈ ਕੇ 7ਸੈਂਟ ਤੱਕ ਦਾ ਵਾਧਾ ਕੱਲ ਤੋਂ ਲਾਗੂ ਹੋ ਚੁੱਕਾ ਹੈ। ਇਹ ਚਾਰੇ ਉਹ ਪ੍ਰੋਵਿੰਸ ਹਨ ਜਿਹਨਾਂ ਨੇ ਆਪਣਾ ਕੋਈ ਕਾਰਬਨ ਟੈਕਸ ਲਾਗੂ ਨਹੀਂ ਕੀਤਾ ਹੋਇਆ ਜਿਸ ਕਾਰਣ ਫੈਡਰਲ ਸਰਕਾਰ ਵੱਲੋਂ ਇਹ ਕਦਮ ਚੁੱਕਿਆ ਗਿਆ ਹੈ। ਦੇਸ਼ ਭਰ ਵਿੱਚ ਸਿਆਸਤਦਾਨ ਅਤੇ ਆਮ ਲੋਕ ਇਸ ਟੈਕਸ ਦੇ ਹੱਕ ਅਤੇ ਵਿਰੋਧ ਵਿੱਚ ਆਵਾਜਾਂ ਚੁੱਕ ਰਹੇ ਹਨ। ਮਿਸਾਲ ਵਜੋਂ ਲਿਬਰਲ ਪਾਰਟੀ ਵੱਲੋਂ ਇਸ ਟੈਕਸ ਨੂੰ ‘ਗੁਨਾਹਗਾਰਾਂ ਨੂੰ ਸਜ਼ਾ ਦੇ ਕੇ ਆਮ ਆਦਮੀ ਦੀ ਰਖਵਾਲੀ ਕਰਨ ਵਾਲਾ’ ਕਰਾਰ ਦਿੱਤਾ ਜਾ ਰਿਹਾ ਹੈ। ਦੂਜੇ ਪਾਸੇ ਕੰਜ਼ਵੇਟਿਵ ਪਾਰਟੀ ਵੱਲੋਂ ਇਸ ਟੈਕਸ ਨੂੰ ਲੋਕਾਂ ਦਾ ਸੰਘ ਘੁੱਟਣ ਵਾਲਾ ਆਖਿਆ ਜਾ ਰਿਹਾ ਹੈ। ਹਰ ਧਿਰ ਦਾ ਆਪੋ ਆਪਣਾ ਪੱਖ ਹੈ ਪਰ ਇੱਕ ਗੱਲ ਪੱਕੀ ਹੈ ਕਿ ਸਾਰੀਆਂ ਧਿਰਾਂ ਵਾਤਾਵਰਣ ਦੀ ਰਖਵਾਲੀ ਨੂੰ ਮਹੱਤਵਪੂਰਣ ਮੰਨਦੀਆਂ ਹਨ। ਕੋਈ ਇਸਨੂੰ ਟੈਕਸ ਲਾ ਕੇ ਹੱਲ ਕਰਨ ਦੀ ਸੋਚ ਰਿਹਾ ਹੈ ਤਾਂ ਦੂਜੇ ਇਸਦਾ ਹੱਲ ਆਪੋ ਆਪਣੇ ਢੰਗ ਨਾਲ ਕਰਨਾ ਸੋਚਦੇ ਹਨ। ਮਿਸਾਲ ਵਜੋਂ ਉਂਟੇਰੀਓ ਸਰਕਾਰ ਵੱਲੋਂ ਇੱਕ ‘ਵਾਤਾਵਰਣ ਯੋਜਨਾ’ਤਿਆਰ ਕੀਤੀ ਗਈ ਹੈ ਜਿਸ ਤਹਿਤ ਪ੍ਰਾਈਵੇਟ ਕੰਪਨੀਆਂ ਨੂੰ ਗਰੀਨ ਐਨਰਜੀ ਦੇ ਇਸਤੇਮਾਲ ਲਈ ਉਤਸ਼ਾਹਿਤ ਕੀਤਾ ਜਾਵੇਗਾ।
ਜਦੋਂ ਪ੍ਰਦੂਸ਼ਣ ਦੀ ਗੱਲ ਆਉਂਦੀ ਹੈ ਤਾਂ ਸਿਰਫ਼ ਗੈਸ ਨਾਲ ਪੈਦਾ ਹੋਣ ਵਾਲੇ ਧੂੰਏ ਨੂੰ ਹੀ ਸਾਰੇ ਅਵਗੁਣਾਂ ਦਾ ਕਾਰਣ ਨਹੀਂ ਮੰਨਿਆ ਜਾ ਸਕਦਾ ਜਿਵੇਂ ਕਿ ਲਿਬਰਲਾਂ ਸਮੇਤ ਕਈਆਂ ਵੱਲੋਂ ਸੁਝਾਇਆ ਜਾਂਦਾ ਹੈ। ਜੇ ਇਹ ਮੰਨਿਆ ਜਾ ਰਿਹਾ ਹੈ ਕਿ ਬ੍ਰਿਟਿਸ਼ ਕੋਲੰਬੀਆ ਵੱਲੋਂ ਕਾਰਬਨ ਟੈਕਸ ਲਾਉਣ ਤੋਂ ਬਾਅਦ 8 ਸਾਲਾਂ ਵਿੱਚ ਪ੍ਰਦੂਸ਼ਣ ਦੇ ਪੱਧਰ ਵਿੱਚ 4.5 ਪ੍ਰਤੀਸ਼ਤ ਕਮੀ ਆਈ ਹੈ ਤਾਂ ਉਂਟੇਰੀਓ ਵਿੱਚ ਕੋਲੇ ਨਾਲ ਚੱਲਣ ਵਾਲੇ ਬਿਜਲੀ ਦੇ ਪਲਾਂਟ ਬੰਦ ਕਰਨ ਨਾਲ ਵੀ ਉੱਨੀ ਹੀ ਕਮੀ ਆਈ ਸੀ। ਸੋ ਜੇ ਅਸੀਂ ਇਸ ਮੁੱਦੇ ਦੀ ਸਿਆਸਤ ਵੱਲ ਨਾ ਜਾਈਏ ਤਾਂ ਸੋਚਣਾ ਬਣਦਾ ਹੈ ਕਿ ਸਾਡਾ ਖੁਦ ਦਾ ਵਾਤਾਵਰਣ ਨੂੰ ਸਾਫ਼ ਰੱਖਣ ਵਿੱਚ ਕੀ ਯੋਗਦਾਨ ਹੈ?
ਬੀਤੇ ਦਿਨੀਂ ਕੈਨੇਡਾ ਦੇ ਵਾਤਾਵਰਨ ਬਦਲਾਅ ਬਾਰੇ ਬਣੀ ਸੰਸਥਾ ਦੀ ਆਈ ਰਿਪੋਰਟ ਮੁਤਾਬਕ ਕੈਨੇਡਾ ਵਿੱਚ ਗਰਮੀ ਦੀ ਦਰ ਪੂਰੇ ਵਿਸ਼ਵ ਦੇ ਮੁਕਾਬਲੇ ਦੁੱਗਣੀ ਦਰ ਨਾਲ ਵੱਧ ਰਹੀ ਹੈ। 1948 ਤੋਂ ਬਾਅਦ ਕੈਨੇਡਾ ਦੇ ਤਾਪਮਾਨ ਵਿੱਚ ਸਾਲਾਨਾ 1.7 ਸੈਂਟੀਗਰੇਡ ਤਾਪਮਾਨ ਦਾ ਵਾਧਾ ਹੁੰਦਾ ਆਇਆ ਹੈ ਜਿਸ ਵਿੱਚ ਸੱਭ ਤੋਂ ਵੱਧ ਤੇਜੀ ਉੱਤਰ (ਨੌਰਥ), ਪਰੇਰੀਜ਼ ਅਤੇ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਵੇਖੀ ਗਈ। ਰਿਪੋਰਟ ਮੁਤਾਬਕ ਬੇਸ਼ੱਕ ਵਾਤਾਵਰਣ ਦੀ ਖਰਾਬੀ ਵਿੱਚ ਮਨੁੱਖੀ ਅਤੇ ਕੁਦਰਤੀ ਬਦਲਾਵਾਂ ਨੇ ਯੋਗਦਾਨ ਪਾਇਆ ਹੈ ਪਰ ਇਹ ਮਨੁੱਖੀ ਯੋਗਦਾਨ ਹੈ ਜੋ ਜਿ਼ਆਦਾ ਖਰਾਬੀ ਦਾ ਕਾਰਣ ਬਣਦਾ ਹੈ। ਰਿਪੋਰਟ ਮੁਤਾਬਕ ਵਾਤਾਵਰਣ ਦੀ ਹੁਣ ਤੱਕ ਹੋਈ ਕੁੱਲ ਖਰਾਬੀ ਦਾ 50% ਤੋਂ ਵੱਧ ਹਿੱਸਾ ਮਨੁੱਖੀ ਛੇੜਾਛੇੜੀ ਦਾ ਨਤੀਜਾ ਹੈ। ਸਮੱਸਿਆ ਨੂੰ ਇਸ ਨੁਕਤੇ ਨਜ਼ਰ ਤੋਂ ਵੇਖਣ ਲਈ ਸਾਨੂੰ ਵਾਤਾਵਰਣ ਪਰੇਮੀ ਅਤੇ ਸਾਇੰਸਦਾਨ ਡੇਵਿਡ ਸੁਜ਼ੁਕੀ ਦੇ ਕਥਨ ਨੂੰ ਚੇਤੇ ਰੱਖਣਾ ਪਵੇਗਾ, “7 ਬਿਲੀਅਨ ਤੋਂ ਵੱਧ ਲੋਕਾਂ ਦੇ ਇਸ ਸੰਸਾਰ ਵਿੱਚ ਇੱਕ ਵਿਅਕਤੀ ਦੀ ਹੋਂਦ ਬਾਲਟੀ ਵਿੱਚ ਬੁੰਦ ਦੇ ਬਰਾਬਰ ਹੈ, ਪ੍ਰਤੂੰ ਬੁੰਦਾਂ ਦੀ ਚੰਗੀ ਖਾਸੀ ਮਾਤਰਾ ਨਾਲ ਬਾਲਟੀ ਭਰੀ ਜਾ ਸਕਦੀ ਹੈ”।
ਵਾਤਵਾਰਣ ਦੀ ਰਖਵਾਲੀ ਲਈ ਕੰਮ ਕਰਨ ਵਾਲੇ ਮਾਹਰਾਂ ਮੁਤਾਬਕ ਹਰ ਥਾਂ ਕਾਰ ਲਿਜਾਣ ਦੀ ਥਾਂ ਸਾਨੂੰ ਕਦੇ ਕਦਾਈਂ ਬੱਸ, ਪੈਦਲ ਜਾਂ ਸਾਈਕਲ ਦਾ ਆਨੰਦ ਲੈਣਾ ਚਾਹੀਦਾ ਹੈ। ਸਿਹਤ ਵੀ ਚੰਗੀ ਰਹੇਗੀ ਅਤੇ ਵਾਤਾਰਵਣ ਵੀ। ਬਿਜਲੀ ਦੀ ਬੱਚਤ ਕਰਨ ਵਾਲੇ ਬਲੱਬ, ਕੰਪਿਊਟਰਾਂ, ਟੀਵੀਆਂ ਨੂੰ ਸਹੀ ਸਮੇਂ ਬੰਦ ਕਰਕੇ, ਘੱਟ ਮੀਟ ਖਾ ਕੇ, ਖਾਣੇ ਦੀ ਦੁਰਵਰਤੋਂ ਘੱਟ ਕਰਕੇ, ਬੇਲੋੜੀ ਖਤਪਕਾਰੀ ਨੂੰ ਘੱਟ ਕਰਕੇ ਅਸੀਂ ਵਾਤਾਵਰਣ ਦੀ ਰਖਵਾਲੀ ਵਿੱਚ ਹੀ ਹਿੱਸਾ ਨਹੀਂ ਪਾਵਾਂਗੇ ਸਗੋਂ ਆਉਣ ਵਾਲੀਆਂ ਪੀੜੀਆਂ ਲਈ ਇੱਕ ਸੋਹਣਾ ਸੰਸਾਰ ਛੱਡ ਜਾਵਾਂਗੇ।
ਜਿੱਥੇ ਤੱਕ ਲਾਗੂ ਹੋਏ ਕਾਰਬਨ ਟੈਕਸ ਦਾ ਸੁਆਲ ਹੈ, ਸਰਕਾਰ ਵੱਲੋਂ ਹਰ ਟਨ ਪ੍ਰਦੂਸ਼ਣ ਪੈਦਾ ਕਰਨ ਉੱਤੇ 20 ਡਾਲਰ ਟੈਕਸ ਲਾਇਆ ਜਾਵੇਗਾ ਜੋ ਹਰ ਸਾਲ ਵੱਧਦਾ 2022 ਵਿੱਚ 50 ਡਾਲਰ ਪ੍ਰਤੀ ਟਨ ਹੋ ਜਾਵੇਗਾ। ਕੀ ਇਸ ਤਰਾਂ ਟੈਕਸ ਲਾ ਕੇ ਸੱਚਮੁੱਚ ਲੋਕਾਂ ਨੂੰ ਕਾਰਾਂ ਵਾਹਨ ਘੱਟ ਚਲਾਉਣ ਲਈ ਉਤਸ਼ਾਹਿਤ ਕੀਤਾ ਜਾ ਸਕਦਾ ਹੈ? ਜੇ ਪਬਲਿਕ ਨੇ ਕੁੱਝ ਮਦਦ ਕਰਨੀ ਹੈ ਤਾਂ ਸੱਭ ਤੋਂ ਬਿਹਤਰ ਮਦਦ ਆਪਣੀਆਂ ਆਦਤਾਂ ਉੱਤੇ ਕਾਬੂ ਪਾਉਣਾ ਹੋਵੇਗਾ। ਪਰ ਇਸ ਕਿਸਮ ਦੀ ਸਿੱਖਿਆ ਦੇਣ ਲਈ ਮਿਹਨਤ ਜਿ਼ਆਦਾ ਕਰਨੀ ਪੈਂਦੀ ਹੈ ਅਤੇ ਵੋਟਾਂ ਘੱਟ ਮਿਲਦੀਆਂ ਹਨ।