ਕਰਾਕਸ, 25 ਮਾਰਚ (ਪੋਸਟ ਬਿਊਰੋ)- ਵੈਨਜ਼ੂਏਲਾ ਦੇ ਰਾਸ਼ਟਰਪਤੀ ਨਿਕੋਲਸ ਮਾਦੁਰੋ ਨੇ ਆਪਣੀ ਵਿਰੋਧੀ ਧਿਰ ਦੇ ਨੇਤਾ ਜੁਆਨ ਗੁਈਦੋ ਉਤੇ ਉਨ੍ਹਾਂ ਦੀ ਹੱਤਿਆ ਦਾ ਸਾਜ਼ਿਸ਼ ਰਚਣ ਦਾ ਦੋਸ਼ ਲਾਇਆ ਹੈ। ਉਨ੍ਹਾਂ ਇਹ ਦੋਸ਼ ਵੀ ਲਾਇਆ ਕਿ ਇਸ ਕੰਮ ਵਿੱਚ ਅਮਰੀਕਾ ਨੇ ਗੁਈਦੋ ਨੂੰ ਆਰਥਿਕ ਮਦਦ ਭਿਜਵਾਈ ਸੀ।
ਆਪਣੇ ਹਜ਼ਾਰਾਂ ਸਮਰਥਕਾਂ ਨੂੰ ਸੰਬੋਧਨ ਕਰਦੇ ਹੋਏ ਮਾਦੁਰੋ ਨੇ ਗੁਈਦੋ ਦਾ ਜ਼ਿਕਰ ਕੀਤਾ ਅਤੇ ਕਿਹਾ, ‘ਅਸੀਂ ਕਠਪੁਤਲੀ ਵੱਲੋਂ ਰਚੀ ਗਈ ਸਾਜ਼ਿਸ਼ ਨੂੰ ਨਾਕਾਮ ਕਰ ਦਿੱਤਾ ਹੈ।' ਗੁਈਦੋ ਨੂੰ ਅਮਰੀਕਾ ਸਮੇਤ 50 ਦੇਸ਼ਾਂ ਨੇ ਵੈਨਜ਼ੁਏਲਾ ਦੇ ਅੰਤਰਿਮ ਰਾਸ਼ਟਰਪਤੀ ਦੇ ਰੂਪ ਵਿੱਚ ਮਾਨਤਾ ਦਿੱਤੀ ਹੈ। ਮਾਦੁਰੋ ਨੇ ਦੋਸ਼ ਲਾਇਆ ਕਿ ਇਸ ਸਾਜ਼ਿਸ਼ ਵਿੱਚ ਗੁਆਂਢੀ ਦੇਸ਼ ਕੋਲੰਬੀਆ ਵੀ ਸ਼ਾਮਲ ਸੀ। ਉਨ੍ਹਾਂ ਕਿਹਾ ਕਿ ਦੇਸ਼ ਵਿੱਚ ਇਕ ਅਣਪਛਾਤੇ ਕੋਲੰਬੀਆਈ ਨੀਮ ਫੌਜੀ ਬਲ ਦੇ ਮੁਖੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਤੇ ਉਹ ਬਿਆਨ ਦੇ ਰਿਹਾ ਹੈ। ਮਾਦੁਰੋ ਦੀ ਸਰਕਾਰ ਨੇ ਸਰਕਾਰੀ ਟੈਲੀਵਿਜ਼ਨ 'ਤੇ ਕਥਿਤ ਸਾਜ਼ਿਸ਼ ਦੀ ਜਾਣਕਾਰੀ ਦਿੱਤੀ। ਸੂਚਨਾ ਮੰਤਰੀ ਜਾਰਜ ਰੋਡ੍ਰਿਗਜ਼ ਨੇ ਕਿਹਾ ਕਿ ਵੱਡੀ ਰਕਮ ਦਾ ਇਸਤੇਮਾਲ ਕਰਕੇ ਅਲ ਸਾਲਵਾਦੋ, ਗਵਾਟੇਮਾਲਾ ਅਤੇ ਹੋਂਡੁਰਸ ਦੇ ਹੱਤਿਆਰਿਆਂ ਨੂੰ ਇਹ ਕੰਮ ਸੌਂਪਿਆ ਗਿਆ ਸੀ। ਉਨ੍ਹਾਂ ਨੂੰ ਵੈਨਜ਼ੁਏਲਾ ਵਿੱਚ ਹੱਤਿਆ ਨੂੰ ਅੰਜਾਮ ਦੇਣ ਤੋਂ ਪਹਿਲਾਂ ਕੋਲੰਬੀਆ ਭੇਜਿਆ ਗਿਆ ਸੀ। ਉਨ੍ਹਾਂ ਗੁਈਦੋ ਦੇ ਚੀਫ ਆਫ ਸਟਾਫ ਰਾਬਰਟੋ ਮਰੈਰੋ (49) 'ਤੇ ਅਮਰੀਕਾ ਤੋਂ ਪੈਸਾ ਲੈਣ ਅਤੇ ਕਥਿਤ ਸਾਜ਼ਿਸ਼ ਦਾ ਮੁੱਖ ਸਾਜ਼ਿਸ਼ ਕਰਤਾ ਹੋਣ ਦਾ ਦੋਸ਼ ਲਾਇਆ।
ਮਦੈਰੋ ਨੂੰ ਵੀਰਵਾਰ ਨੂੰ ਗ੍ਰਿਫਤਾਰ ਕੀਤਾ ਗਿਆ ਸੀ। ਇਸ ਤੋਂ ਤਤਕਾਲ ਬਾਅਦ ਅਮਰੀਕਾ, ਯੂਰਪੀਅਨ ਯੂਨੀਅਨ ਅਤੇ ਕਈ ਲੈਟਿਨ ਅਮਰੀਕਨ ਦੇਸ਼ਾਂ ਨੇ ਮਰੈਰੋ ਦੀ ਫੌਰੀ ਤੌਰ 'ਤੇ ਰਿਹਾੲ ਲਈ ਕਿਹਾ ਸੀ।