ਉਤਰੈਖ਼ਤ, ਨੀਦਰਲੈਂਡਜ਼, 18 ਮਾਰਚ (ਪੋਸਟ ਬਿਊਰੋ) : ਇੱਕ ਬੰਦੂਕਧਾਰੀ ਨੇ ਡੱਚ ਸ਼ਹਿਰ ਉਤਰੈਖ਼ਤ ਵਿੱਚ ਸੋਮਵਾਰ ਦੀ ਸਵੇਰ ਨੂੰ ਟਰੈਮ ਦੇ ਸਫਰ ਦੌਰਾਨ ਤਿੰਨ ਵਿਅਕਤੀਆਂ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ ਤੇ ਪੰਜ ਹੋਰਨਾਂ ਨੂੰ ਜ਼ਖਮੀ ਕਰ ਦਿੱਤਾ। ਨਿਊਜ਼ੀਲੈਂਡ ਦੀਆਂ ਦੋ ਮਸਜਿਦਾਂ ਵਿੱਚ ਹੋਏ ਹਮਲੇ ਤੋਂ ਕੁੱਝ ਦਿਨਾਂ ਬਾਅਦ ਹੀ ਇਹ ਹਮਲਾ ਹੋਇਆ ਤੇ ਇਸ ਨੂੰ ਵੀ ਅੱਤਵਾਦੀ ਹਮਲਾ ਮੰਨਿਆ ਜਾ ਰਿਹਾ ਹੈ।
ਅਧਿਕਾਰੀਆਂ ਨੇ ਤੁਰਕੀ ਦੇ ਜੰਮ-ਪਲ ਮਸ਼ਕੂਕ ਨੂੰ ਗ੍ਰਿਫਤਾਰ ਕੀਤਾ ਹੈ। ਰਾਤ ਤੱਕ ਇਸ ਘਟਨਾ ਦੇ ਸਿ਼ਕਾਰ ਤਿੰਨ ਵਿਅਕਤੀਆਂ ਦੀ ਹਾਲਤ ਨਾਜੁ਼ਕ ਦੱਸੀ ਜਾ ਰਹੀ ਸੀ ਤੇ ਇਸ ਮਾਰਕਾਟ ਦੇ ਮੰਤਵ ਨੂੰ ਜਾਂਚਣ ਲਈ ਜਾਂਚ ਕੀਤੀ ਜਾ ਰਹੀ ਸੀ। ਪ੍ਰਧਾਨ ਮੰਤਰੀ ਮਾਰਕ ਰੱਟ ਨੇ ਆਖਿਆ ਕਿ ਅਧਿਕਾਰੀ ਇਹ ਪਤਾ ਲਾਉਣ ਦੀ ਕੋਸਿ਼ਸ਼ ਕਰ ਰਹੇ ਹਨ ਕਿ ਕੀ ਇਸ ਹਮਲੇ ਪਿੱਛੇ ਅੱਤਵਾਦ ਹੀ ਮੁੱਖ ਕਾਰਨ ਹੈ।
ਇਸ ਦੌਰਾਨ ਨਿਆਂ ਮੰਤਰੀ ਫਰਡ ਗਰੈਪਰਹਾਜ ਨੇ ਦੱਸਿਆ ਕਿ ਮਸ਼ਕੂਕ ਦੀ ਪਛਾਣ 37 ਸਾਲਾਂ ਦੇ ਗੋਕਮੈਨ ਟੈਨਿਸ ਵਜੋਂ ਕੀਤੀ ਗਈ ਹੈ। ਉਸ ਦਾ ਪੁਲਿਸ ਨਾਲ ਪਹਿਲਾਂ ਵੀ ਵਾਹ ਪੈਂਦਾ ਰਿਹਾ ਹੈ ਤੇ ਉਸ ਦਾ ਮੁਜਰਮਾਨਾਂ ਰਿਕਾਰਡ ਵੀ ਹੈ। ਪੁਲਿਸ ਨੇ ਆਖਿਆ ਕਿ ਉਨ੍ਹਾਂ ਸ਼ੱਕ ਦੇ ਆਧਾਰ ਉੱਤੇ ਇੱਕ ਹੋਰ ਵਿਅਕਤੀ ਨੂੰ ਵੀ ਨਜ਼ਰਬੰਦ ਕੀਤਾ ਸੀ ਪਰ ਇਸ ਬਾਰੇ ਤਫਸੀਲ ਨਾਲ ਕੋਈ ਹੋਰ ਜਾਣਕਾਰੀ ਨਹੀਂ ਦਿੱਤੀ ਗਈ।
ਜਿ਼ਕਰਯੋਗ ਹੈ ਕਿ ਜੁੰਮੇ ਦੀ ਨਮਾਜ਼ ਅਦਾ ਕਰਨ ਦੌਰਾਨ ਸ਼ੁੱਕਰਵਾਰ ਨੂੰ ਨਿਊਜ਼ੀਲੈਂਡ ਦੇ ਕ੍ਰਾਈਸਟਚਰਚ ਸ਼ਹਿਰ ਦੀਆਂ ਦੋ ਮਸਜਿਦਾਂ ਵਿੱਚ ਇੱਕ ਗੋਰੇ ਤੇ ਸਿਰਫਿਰੇ ਵਿਅਕਤੀ, ਜੋ ਕਿ ਪਰਵਾਸੀਆਂ ਤੋਂ ਨਫਰਤ ਕਰਦਾ ਸੀ, ਨੇ ਅੰਨ੍ਹੇਵਾਹ ਗੋਲੀਆਂ ਚਲਾ ਕੇ 50 ਲੋਕਾਂ ਨੂੰ ਮਾਰ ਮੁਕਾਇਆ ਸੀ। ਉਤਰੈਖ਼ਤ ਵਾਲੀ ਘਟਨਾ ਇਸ ਤੋਂ ਤਿੰਨ ਦਿਨ ਬਾਅਦ ਵਾਪਰੀ ਹੈ। ਉਤਰੈਖ਼ਤ ਹਮਲਾ ਰਿਹਾਇਸ਼ੀ ਇਲਾਕੇ ਵਿੱਚੋਂ ਲੰਘਣ ਵਾਲੇ ਮਸ਼ਰੂਫ ਲਾਂਘੇ ਉੱਤੇ ਹੋਇਆ। ਬੰਦੂਕਧਾਰੀ ਕੋਲ ਕਥਿਤ ਤੌਰ ਉੱਤੇ ਆਟੋਮੈਟਿਕ ਹਥਿਆਰ ਸੀ।