ਲਖਨਊ, 18 ਮਾਰਚ (ਪੋਸਟ ਬਿਊਰੋ)- ਬਹੁਜਨ ਸਮਾਜ ਪਾਰਟੀ ਦੀ ਮੁਖੀ ਮਾਇਆਵਤੀ ਦਾ ਸਖ਼ਤ ਰੁਖ਼ ਦੇਖਦੇ ਹੋਏ ਕਾਂਗਰਸ ਨੇ ਉੱਤਰ ਪ੍ਰਦੇਸ਼ ਵਿਚ ਗਠਜੋੜ ਖਾਤਰ ਸੱਤ ਸੀਟਾਂ ਛੱਡੀਆਂ ਹਨ, ਪਰ ਮਾਇਆਵਤੀ ਨੂੰ ਇਹ ਵੀ ਮਨਜ਼ੂਰ ਨਹੀਂ। ਕਾਂਗਰਸ ਵੱਲੋਂ ਸਮਾਜਵਾਦੀ, ਬਸਪਾ, ਰਾਸ਼ਟਰੀ ਲੋਕ ਦਲ ਲਈ ਸੱਤ ਸੀਟਾਂ ਛੱਡਣ ਬਾਰੇ ਮਾਇਆਵਤੀ ਨੇ ਕਿਹਾ ਕਿ ਕਾਂਗਰਸ ਗਠਜੋੜ ਸਬੰਧੀ ਸੂਬੇ ਵਿਚ ਗ਼ਲਤ ਸੰਦੇਸ਼ ਨਾ ਫੈਲਾਵੇ, ਇਹ ਸਾਜ਼ਿਸ਼ ਲੱਗਦਾ ਹੈ।
ਉੱਤਰ ਪ੍ਰਦੇਸ਼ ਵਿਚ ਕਾਂਗਰਸ ਨੇ ਕੱਲ੍ਹ ਸ਼ਾਮ ਸਮਾਜਵਾਦੀ, ਬਸਪਾ, ਰਾਸ਼ਟਰੀ ਲੋਕ ਦਲ ਗੱਠਜੋੜ ਨੂੰ ਸੱਤ ਸੀਟਾਂ ਛੱਡਣ ਦਾ ਐਲਾਨ ਕੀਤਾ ਤਾਂ ਮਾਇਆਵਤੀ ਨੇ ਸਾਫ ਕਿਹਾ ਕਿ ਕਾਂਗਰਸ ਜ਼ਬਰਦਸਤੀ ਯੂ ਪੀ ਵਿਚ ਗਠਜੋੜ ਦੇ ਲਈ ਸੱਤ ਸੀਟਾਂ ਛੱਡਣ ਦਾ ਭਰਮ ਨਾ ਫੈਲਾਵੇ। ਉਨ੍ਹਾਂ ਟਵੀਟ ਕਰ ਕੇ ਕਿਹਾ ਕਿ ਬੀ ਐੱਸ ਪੀ ਇਕ ਵਾਰ ਫਿਰ ਸਾਫ ਕਰਨਾ ਚਾਹੁੰਦੀ ਹੈ ਕਿ ਉੱਤਰ ਪ੍ਰਦੇਸ਼ ਸਮੇਤ ਪੂਰੇ ਦੇਸ਼ ਵਿਚ ਕਾਂਗਰਸ ਨਾਲ ਸਾਡਾ ਕਿਸੇ ਤਰ੍ਹਾਂ ਤਾਲਮੇਲ ਤੇ ਗਠਜੋੜ ਆਦਿ ਬਿਲਕੁਲ ਨਹੀਂ। ਇਸ ਦੇ ਨਾਲ ਉਨ੍ਹਾਂ ਕਿਹਾ ਕਿ ਸਾਡੇ ਲੋਕ ਕਾਂਗਰਸ ਦੇ ਆਏ ਦਿਨ ਫੈਲਾਏ ਜਾਂਦੇ ਭਰਮ ਵਿੱਚ ਨਾ ਆਉਣ। ਉਸ ਨੇ ਕਿਹਾ ਕਿ ਕਾਂਗਰਸ ਉੱਤਰ ਪ੍ਰਦੇਸ਼ ਵਿਚ ਪੂਰੀ ਤਰ੍ਹਾਂ ਆਜ਼ਾਦ ਹੈ ਕਿ ਇੱਥੇ 80 ਸੀਟਾਂ `ਤੇ ਆਪਣੇ ਉਮੀਦਵਾਰ ਖੜ੍ਹੇ ਕਰ ਕੇ ਇਕੱਲੀ ਚੋਣ ਲੜੇ। ਸਾਡਾ ਗਠਜੋੜ ਭਾਜਪਾ ਨੂੰ ਹਰਾਉਣ ਦੇ ਪੂਰੀ ਤਰ੍ਹਾਂ ਨਾਲ ਸਮਰੱਥ ਹੈ।