ਲੰਡਨ, 18 ਮਾਰਚ (ਪੋਸਟ ਬਿਊਰੋ)- ਬ੍ਰਿਟੇਨ ਦੇ ਓਦੋਨ ਦੇ ਪ੍ਰਧਾਨ ਮੰਤਰੀ ਕਲੇਮੈਂਟ ਏਟਲੀ, ਸਕਰਾਰ ਦੀ ਵਿਦੇਸ਼ੀ ਖੁਫੀਆ ਸੇਵਾ ਐੱਮ ਆਈ-6 ਦੇ ਪ੍ਰਮੁੱਖਾਂ ਅਤੇ ਬਕਿੰਘਮ ਪੈਲੇਸ ਦੇ ਸਹਾਇਕਾਂ ਨੇ ਮਿਲ ਕੇ ਭਾਰਤ ਵਿੱਚ ਤੈਨਾਤ ਉਸ ਦੇ ਇੱਕ ਗਵਰਨਰ ਵੱਲੋਂ ਚੈਰਿਟੀ ਫੰਡ ਦੀ ਚੋਰੀ ਨਾਲ ਜੁੜੇ ਬ੍ਰਿਟਿਸ਼ ਸਾਮਰਾਜ ਦੇ ਆਖਰੀ ਘੋਟਾਲੇ ਉਤੇ ਪਰਦਾ ਪਾਉਣ ਦੀ ਕੋਸ਼ਿਸ਼ ਕੀਤੀ ਸੀ, ਜਿਸ ਦਾ ਭੇਦ ਬਾਅਦ ਵਿੱਚ ਖੁੱਲ੍ਹਾ ਹੈ।
ਬ੍ਰਿਟੇਨ ਦੇ ਰਾਸ਼ਟਰੀ ਖਜ਼ਾਨਚੀ ਨੇ ਖੁਲਾਸਾ ਕੀਤਾ ਕਿ ਸਾਲ 1940 ਅਤੇ 1946 ਵਿਚਾਲੇ ਮਦਰਾਸ ਪ੍ਰੈਜੀਡੈਂਸੀ ਦੇ ਗਵਰਨਰ ਸਰ ਆਰਥਰ ਹੋਪ ਨੂੰ ਇੰਡੀਅਨ ਰੈੱਡ ਕਰਾਸ ਨੂੰ ਦਾਨ ਦੇਣ ਦਾ ਕੰਮ ਸੌਂਪਿਆ ਗਿਆ ਸੀ। ‘ਦਿ ਟਾਈਮਜ਼’ ਦੀ ਇੱਕ ਖਬਰ ਮੁਤਾਬਕ ਸਾਲ 1944 ਵਿੱਚ ਬ੍ਰਿਟਿਸ਼ ਦਫਤਰ ਨੂੰ ਉਨ੍ਹਾਂ ਦੇ ਵਧਦੇ ਕਰਜ਼ੇ ਦੇ ਬਾਰੇ ਵਿੱਚ ਭਣਕ ਲੱਗ ਗਈ। ਜਾਣਕਾਰੀ ਮਿਲੀ ਕਿ ਉਨ੍ਹਾਂ ਨੇ ਚੈਰਿਟੀ ਲਈ ਦਿੱਤੇ ਫੰਡ ਦੀ ਦੁਰਵਰਤੋਂ ਵੀ ਕੀਤੀ। ਦੱਸਿਆ ਜਾਂਦਾ ਹੈ ਕਿ ਹੋਪ ਨੂੰ ਘੋੜ ਦੌੜ ਦਾ ਸ਼ੌਕ ਸੀ ਅਤੇ ਇਸ ਕਾਰਨ ਉਨ੍ਹਾਂ 'ਤੇ ਕਰਜ਼ਾ ਵਧ ਜਾਣ ਕਾਰਨ ਉਨ੍ਹਾਂ ਨੇ ਫੰਡ ਦਾ ਗਬਨ ਸ਼ੁਰੂ ਕਰ ਦਿੱਤਾ। ਮੰਨਿਆ ਜਾਂਦਾ ਹੈ ਕਿ ਉਸ ਵਕਤ ਉਨ੍ਹਾਂ ਨੇ ਆਪਣਾ ਕਰਜ਼ਾ ਮੋੜਨ ਦੇ ਲਈ 40000 ਪੌਂਡ ਦੇ ਫੰਡ ਦਾ ਗਬਨ ਕੀਤਾ।
ਖਜ਼ਾਨਚੀ ਦੇ ਦਸਤਾਵੇਜ਼ਾਂ ਅਨੁਸਾਰ ਜਦਂ ਭਾਰਤ ਦੇ ਵਾਇਸਰਾਏ ਲਾਰਡ ਵਾਵੇਲ ਨੂੰ ਪਤਾ ਲੱਗਾ ਤਾਂ ਭਾਰਤ ਵਿੱਚ ਹੋਪ ਦੇ ਕੁੱਝ ਲੈਣਦਾਰ ਆਪਣਾ ਪੈਸਾ ਵਾਪਸ ਮੰਗਦੇ ਹਨ ਤਾਂ ਉਨ੍ਹਾਂ ਫੈਸਲਾ ਕੀਤਾ ਕਿ ਗਵਰਨਰ ਨੂੰ ਚੁੱਪਚਾਪ ਅਹੁਦੇ ਤੋਂ ਹਟਾ ਦਿੱਤਾ ਜਾਏ। ਉਸ ਵਕਤ ਇਸ ਦੇ ਲਈ ਹੋਪ ਦੀ ਸਿਹਤ ਨੂੰ ਆਧਾਰ ਬਣਾਇਆ ਗਿਆ। ਜਦ 1947 ਵਿੱਚ ਭਾਰਤ ਨੂੰ ਆਜ਼ਾਦੀ ਮਿਲੀ ਤਾਂ ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਐਟਲੀ ਨੇ ਬ੍ਰਿਟੇਨ ਦੇ ਲੋਕਾਂ ਦੇ ਪੈਸਿਆਂ ਦੀ ਵਰਤੋਂ ਕਰ ਕੇ ਇੰਡੀਅਨ ਰੈੱਡ ਕਰਾਸ ਨੂੰ ਦਾਨ ਦੇਣ ਦੀ ਮਨਜ਼ੂਰੀ ਇਸ ਤਰ੍ਹਾਂ ਦਿੱਤੀ ਕਿ ਲੋਕਾਂ ਨੂੰ ਕਦੇ ਇਸ ਦੇ ਬਾਰੇ ਪਤਾ ਹੀ ਨਾ ਲੱਗੇ।