ਚੰਡੀਗੜ੍ਹ, 17 ਮਾਰਚ (ਪੋਸਟ ਬਿਊਰੋ)- ਹਰਿਆਣਾ ਦੇ ਰੋਹਤਕ ਪਿੱਛੋਂ ਸਭ ਤੋਂ ਮਹੱਤਵ ਵਾਲੀ ਸੀਟ ਕਰਨਾਲ ਦੇ ਲਈ ਟਿਕਟ ਦੀ ਦਾਅਵੇਦਾਰੀ ਬਾਰੇ ਭਾਜਪਾ ਵਿੱਚ ਲਗਾਤਾਰ ਅੜਿੱਕਾ ਪੈ ਰਿਹਾ ਹੈ। ਇਥੋਂ ਕੇਂਦਰੀ ਮੰਤਰੀ ਮੇਨਕਾ ਗਾਂਧੀ ਸਮੇਤ ਕਰੀਬ ਅੱਧਾ ਦਰਜਨ ਹੋਰ ਲੋਕਾਂ ਵੱਲੋਂ ਚੋਣ ਲੜਨ ਦੀ ਇੱਛਾ ਦੱਸਣ ਨਾਲ ਹੀ ਹਰਿਆਣਾ ਦੇ ਸਿਖਿਆ ਮੰਤਰੀ ਪ੍ਰੋਫੈਸਰ ਰਾਮਬਿਲਾਸ ਸ਼ਰਮਾ ਨੇ ਦਾਅਵਾ ਠੋਕ ਦਿੱਤੀ ਹੈ।
ਵਰਨਣ ਯੋਗ ਹੈ ਕਿ ਕਰਨਾਲ ਵਿੱਚ ਕੇਂਦਰੀ ਮੰਤਰੀ ਮੇਨਕਾ ਗਾਂਧੀ ਦੇ ਚੋਣ ਲੜਨ ਦੀ ਇੱਛਾ ਦੱਸਣ ਉੱਤੇ ਇਹ ਸੀਟ ਚਰਚਾ ਵਿੱਚ ਆ ਗਈ ਅਤੇ ਭਾਜਪਾ ਦਾ ਇੱਕ ਵੱਡਾ ਧੜਾ ਮੇਨਕਾ ਗਾਂਧੀ ਦੀ ਹਰਿਆਣਾ ਵਿੱਚ ਐਂਟਰੀ ਖਿਲਾਫ ਆ ਗਿਆ ਹੈ। ਪ੍ਰੋਫੈਸਰ ਰਾਮਬਿਲਾਸ ਸ਼ਰਮਾ ਦੇ ਕਰਨਾਲ ਸੀਟ ਉੱਤੇ ਦਾਅਵੇ ਨੂੰ ਇਸੇ ਰਣਨੀਤੀ ਦਾ ਇੱਕ ਹਿੱਸਾ ਮੰਨਿਆ ਜਾ ਰਿਹਾ ਹੈ। ਭਾਜਪਾ ਹਾਈ ਕਮਾਨ ਨੇ ਖੁਦ ਪ੍ਰੋਫੈਸਰ ਰਾਮਬਿਲਾਸ ਸ਼ਰਮਾ ਨੂੰ ਕਰਨਾਲ ਲੋਕ ਸਭਾ ਸੀਟ ਤੋਂ ਚੋਣ ਲੜਾਉਣ ਦੇ ਸੰਕੇਤ ਦਿੱਤੇ ਹਨ। ਆਪਣੇ ਇਸ ਦਾਅਵੇ ਨੂੰ ਮਜ਼ਬੂਤੀ ਨਾਲ ਪੇਸ਼ ਕਰਨ ਲਈ ਰਾਮਬਿਲਾਸ ਭਾਜਪਾ ਦੇ ਇੰਚਾਰਜ ਡਾਕਟਰ ਅਨਿਲ ਜੈਨ ਅਤੇ ਕੌਮੀ ਪ੍ਰਧਾਨ ਅਮਿਤ ਸ਼ਾਹ ਨਾਲ ਮਿਲਣ ਦਾ ਵਕਤ ਮੰਗ ਚੁੱਕੇ ਹਨ। ਰਾਮਬਿਲਾਸ ਸ਼ਰਮਾ ਨੇ ਕਰਨਾਲ ਤੋਂ ਚੋਣ ਲੜਨ ਲਈ ਓਦੋਂ ਦਾਅਵਾ ਪੇਸ਼ ਕੀਤਾ ਹੈ, ਜਦੋਂ ਤਿਨ ਵਾਰ ਪਾਰਲੀਮੈਂਟ ਮੈਂਬਰ ਰਹਿ ਚੁੱਕੇ ਅਰਵਿੰਦ ਸ਼ਰਮਾ ਦੀ ਭਾਜਪਾ ਵਿੱਚ ਫਿਰ ਐਂਟਰੀ ਹੋਈ ਹੈ। ਉਨ੍ਹਾਂ ਨੂੰ ਭਾਜਪਾ ਵਿੱਚ ਲਿਆਉਣ ਵਿੱਚ ਰਾਮਬਿਲਾਸ ਸ਼ਰਮਾ ਦਾ ਵੱਡਾ ਹੱਥ ਰਿਹਾ ਹੈ। ਉਨ੍ਹਾਂ ਨੇ ਇਸ ਤਰੀਕੇ ਨਾਲ ਇੱਕ ਬ੍ਰਹਮ-ਅਸਤਰ ਚੱਲਿਆ ਹੈ। ਅਰਵਿੰਦ ਸ਼ਰਮਾ ਇੱਕ ਵਾਰ ਸੋਨੀਪਤ ਤੋਂ ਆਜ਼ਾਦ ਤੇ ਦੋ ਵਾਰ ਕਰਨਾਲ ਤੋਂ ਕਾਂਗਰਸ ਟਿਕਟ 'ਤੇ ਪਾਰਲੀਮੈਂਟ ਮੈਂਬਰ ਰਹਿ ਚੁੱਕੇ ਹਨ। ਉਹ ਕਰਨਾਲ ਤੋਂ ਹੀ ਲੋਕ ਸਭਾ ਚੋਣਾਂ ਲੜਨਾ ਚਾਹੁੰਦੇ ਹਨ ਤੇ ਇਸੇ ਇੱਛਾ ਨਾਲ ਭਾਜਪਾ ਵਿੱਚ ਸ਼ਾਮਲ ਹੋਏ ਹਨ, ਪ੍ਰੰਤੂ ਪਾਰਟੀ ਹਾਈ ਕਮਾਨ ਉਨ੍ਹਾਂ ਨੂੰ ਰੋਹਤਕ ਲੋਕ ਸਭਾ ਸੀਟ 'ਤੇ ਖੜ੍ਹਾ ਕਰ ਸਕਦੀ ਹੈ।