ਓਲੰਪਿਕ ਸੋਨ ਤਮਗਾ ਜੇਤੂ ਨੀਰਜ ਚੋਪੜਾ ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਉਹ ਅਗਲੇ ਸਾਲ ਪੈਰਿਸ 'ਚ ਓਲੰਪਿਕ ਸੋਨ ਤਮਗਾ ਅਤੇ 2025 'ਚ ਆਪਣੇ ਵਿਸ਼ਵ ਚੈਂਪੀਅਨਸਿ਼ਪ ਖਿਤਾਬ ਨੂੰ ਬਰਕਰਾਰ ਰੱਖਣ ਦੀ ਪੂਰੀ ਕੋਸਿ਼ਸ਼ ਕਰੇਗਾ। ਜਦੋਂ ਚੋਪੜਾ ਨੂੰ ਪੁੱਛਿਆ ਗਿਆ ਕਿ ਕੀ ਉਹ ਚੈੱਕ ਗਣਰਾਜ ਦੇ ਐਥਲੀਟ ਜਾਨ ਜ਼ੇਲੇਜ਼ਨੀ ਦੀ ਉਪਲਬਧੀ ਹਾਸਲ ਕਰ ਸਕਦਾ ਹੈ, ਜਿਸ ਦੇ ਨਾਂ ਤਿੰਨ ਓਲੰਪਿਕ ਅਤੇ ਤਿੰਨ ਵਿਸ਼ਵ ਚੈਂਪੀਅਨਸਿ਼ਪ ਖਿਤਾਬ ਹਨ।ਇਸ 'ਤੇ ਚੋਪੜਾ ਨੇ ਕਿਹਾ, 'ਜੇਕਰ ਮੈਂ ਪ੍ਰੇਰਿਤ ਰਹਾਂਗਾ ਅਤੇ ਖੇਡ 'ਤੇ ਫੋਕਸ ਰਹੇਗਾ ਤਾਂ ਕੁਝ ਵੀ ਹੋ ਸਕਦਾ ਹੈ। ਮੈਂ ਆਪਣੇ ਖਿਤਾਬ ਦਾ ਬਚਾਅ ਕਰਨ ਲਈ ਜਿੰਨੀ ਮਿਹਨਤ ਕਰਨੀ ਪਵੇ, ਓਨੀ ਮਿਹਨਤ ਕਰਾਂਗਾ।' ਜ਼ੈਲੇਜ਼ਨੀ ਜੈਵਲਿਨ ਥ੍ਰੋਅਰ ਨੀਰਜ ਆਦਰਸ਼ ਵੀ ਹਨ। ਜ਼ੇਲੇਜ਼ਨੀ ਨੇ 1992, 1996 ਅਤੇ 2000 ਵਿੱਚ ਓਲੰਪਿਕ ਸੋਨ ਤਗਮੇ ਜਿੱਤੇ। ਇਸ ਦੇ ਨਾਲ ਹੀ 1993, 1995 ਅਤੇ 2001 ਵਿੱਚ ਵਿਸ਼ਵ ਚੈਂਪੀਅਨਸਿ਼ਪ ਦਾ ਖਿਤਾਬ ਜਿੱਤਿਆ।
25 ਸਾਲਾ ਨੀਰਜ ਨੇ ਕਿਹਾ, ''ਟੋਕੀਓ 'ਚ ਪਹਿਲਾ ਓਲੰਪਿਕ ਖਿਤਾਬ ਜਿੱਤਣਾ ਵੱਡੀ ਚੁਣੌਤੀ ਸੀ ਅਤੇ ਹੁਣ ਇਸ ਦਾ ਬਚਾਅ ਕਰਨਾ ਹੋਰ ਵੀ ਵੱਡੀ ਚੁਣੌਤੀ ਹੋਵੇਗੀ। ਹਰ ਐਥਲੀਟ ਆਪਣੀ ਵਧੀਆ ਤਿਆਰੀ ਨਾਲ ਆਵੇਗਾ ਅਤੇ ਕੋਈ ਕਸਰ ਬਾਕੀ ਨਹੀਂ ਛੱਡੇਗਾ।ਮੇਰੇ ਲਈ ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਹੋਵੇਗੀ ਕਿ ਮੈਂ ਖੁਦ ਨੂੰ ਸੱਟ ਤੋਂ ਬਚਾਵਾਂ।ਮੈਨੂੰ ਤੰਦਰੁਸਤ ਅਤੇ ਸੱਟਾਂ ਤੋਂ ਮੁਕਤ ਰਹਿਣਾ ਹੋਵੇਗਾ ਤਾਂ ਕਿ ਮੈਂ ਆਪਣੇ ਸਾਰੇ ਖਿਤਾਬਾਂ ਦਾ ਬਚਾਅ ਕਰ ਸਕਾਂ।