ਸੋਨਮ ਕਪੂਰ ਦੇ ਅੱਜ ਤੱਕ ਦੇ ਕਰੀਅਰ ਬਾਰੇ ਇਹ ਖਾਸ ਗੱਲ ਹੈ ਕਿ ਉਸ ਨੇ ਲਗਾਤਾਰ ਵੱਖ ਵੱਖ ਤਰ੍ਹਾਂ ਦੀਆਂ ਫਿਲਮਾਂ ਦੀ ਚੋਣ ਕੀਤੀ ਹੈ। ਉਸ ਦੀਆਂ ਫਿਲਮਾਂ ਦੀ ਸੂਚੀ ਉੱਤੇ ਨਜ਼ਰ ਮਾਰੀ ਜਾਵੇ ਤਾਂ ਸਾਫ ਹੋ ਜਾਂਦਾ ਹੈ ਕਿ ਪਹਿਲੀ ਹੀ ਫਿਲਮ ਤੋਂ ਲੈ ਕੇ ਅੱਜ ਤੱਕ ਉਹ ਕਈ ਤਰ੍ਹਾਂ ਦੀਆਂ ਕਹਾਣੀਆਂ ਬਾਰੇ ਐਕਸਪੈਰੀਮੈਂਟ ਕਰਨ ਤੋਂ ਝਿਜਕਦੀ ਹੈ। ਉਸ ਦੇ ਖਾਤੇ ਵਿੱਚ ਦਰਜ ਹਨ ‘ਨੀਰਜਾ', ‘ਪੈਡਮੈਨ’ ਅਤੇ ਪਿੱਛੇ ਜਿਹੇ ਰਿਲੀਜ਼ ‘ਏਕ ਲੜਕੀ ਕੋ ਦੇਖਾ ਤੋ ਐਸਾ ਲਗਾ'। ਇਹ ਵੀ ਇਸੇ ਤੱਥ ਨੂੰ ਜ਼ਾਹਰ ਕਰਦੀਆਂ ਹਨ ਕਿ ਉਸ ਨੇ ਗੈਰ ਰਵਾਇਤੀ ਕਹਾਣੀਆਂ ਤੋਂ ਕਦੇ ਜੀਅ ਨਹੀਂ ਚੁਰਾਇਆ। ਸੋਨਮ ਦਾ ਮੰਨਣਾ ਹੈ ਕਿ ਫਿਲਮ ਇੰਡਸਟਰੀ ਵਿੱਚ ਔਰਤਾਂ ਨੂੰ ਹੋਰ ਹਿੱਸੇਦਾਰੀ ਮਿਲਣੀ ਚਾਹੀਦੀ ਹੈ। ਫਿਲਹਾਲ ਇੰਡਸਟਰੀ ਵਿੱਚ ਅਜਿਹਾ ਨਹੀਂ। ਉਨ੍ਹਾਂ ਨੂੰ ਫਿਲਮ ਵਿੱਚ ਲੀਡ ਰੋਲ ਵਿੱਚ ਹੀ ਨਹੀਂ, ਫਿਲਮ ਬਣਾਉਣ ਦੇ ਹਰ ਹਿੱਸੇ ਵਿੱਚ ਹਿੱਸੇਦਾਰੀ ਦੇ ਮੌਕੇ ਮਿਲਣੇ ਚਾਹੀਦੇ ਹਨ। ਉਸ ਨੇ ਕਿਹਾ, ‘‘ਇੰਡਸਟਰੀ ਵਿੱਚ ਟੈਲੇਂਟਿਡ ਔਰਤਾਂ ਦੀ ਘਾਟ ਨਹੀਂ, ਜਿਨ੍ਹਾਂ ਨੇ ਸਟਾਰਡਮ ਹਾਸਲ ਕੀਤਾ ਹੈ ਤੇ ਇਸ ਨੂੰ ਸਹੀ ਦਿਸ਼ਾ ਵਿੱਚ ਵਧਣ ਲਈ ਹੀ ਵਰਤਿਆ ਜਾਣਾ ਚਾਹੀਦਾ ਹੈ।”
ਬੀਤੇ ਦਿਨੀਂ ਕਰੀਨਾ ਕਪੂਰ ਦੇ ਚੈਟ ਸ਼ੋਅ ‘ਵ੍ਹਾਟ ਵੂਮੈਨ ਵਾਂਟ’ ਵਿੱਚ ਹਿੱਸਾ ਲੈਂਦੇ ਸਮੇਂ ਦੋਵਾਂ ਨੇ ਕਈ ਮੁੱਦਿਆਂ 'ਤੇ ਖੁੱਲ੍ਹ ਕੇ ਗੱਲ ਕੀਤੀ, ਜਿਸ ਵਿੱਚ ਔਰਤਾਂ ਦੀਆਂ ਕਾਮਨਾਵਾਂ ਵਰਗੇ ਵਰਜਿਤ ਸਮਝੇ ਜਾਣ ਵਾਲੇ ਵਿਸ਼ੇ ਸ਼ਾਮਲ ਸਨ। ਸੋਨਮ ਤੇ ਕਰੀਨਾ ਦੀ ਪਿਛਲੇ ਹਿੱਟ ਫਿਲਮ ‘ਵੀਰੇ ਦੀ ਵੈਡਿੰਗ’ ਵੀ ਇੱਕ ਬੋਲਡ ਫਿਲਮ ਮੰਨੀ ਜਾਂਦੀ ਹੈ। ਇਸ ਸ਼ੋਅ ਦੇ ਅਖੀਰ ਵਿੱਚ ਕਿਹਾ, ‘‘ਬੇਬੋ, ਮੈਂ ਤੈਨੂੰ ‘ਵੀਰੇ ਦੀ ਵੈਡਿੰਗ 2’ ਦੇ ਸੈੱਟ 'ਤੇ ਮਿਲਾਂਗੀ ਅਤੇ ਕੁਝ ਲੋਕਾਂ ਨੂੰ ਲੱਗਦਾ ਹੈ ਕਿ ਸੋਨਮ ਦੀ ਇਸ ਗੱਲ ਤੋਂ ਸਾਫ ਹੈ ਕਿ ਫਿਲਮ ਦੇ ਸੀਕਵਲ 'ਤੇ ਕੰਮ ਸ਼ੁਰੂ ਹੋ ਚੁੱਕਾ ਹੈ। ਇਸ ਬਾਰੇ ਕੋਈ ਐਲਾਨ ਨਹੀਂ ਹੋਇਆ।''