ਆਬੂ ਧਾਬੀ, 13 ਮਾਰਚ (ਪੋਸਟ ਬਿਊਰੋ)- ਯੂ ਏ ਈ ਨੇ ਯੂਰਪੀ ਯੂਨੀਅਨ ਦੇ ਉਸ ਫੈਸਲੇ ਦੀ ਨਿੰਦਾ ਕੀਤੀ ਹੈ, ਜਿਸ ਦੇ ਵਿੱਚ ਉਸ ਨੇ ਯੂ ਏ ਈ ਨੂੰ ਟੈਕਸ ਚੋਰਾਂ ਨੂੰ ਸ਼ਰਣ ਦੇਣ ਵਾਲੇ ਦੇਸ਼ਾਂ ਦੀ ਬਲੈਕ ਲਿਸਟ ਵਿਚ ਪਾ ਦਿਤਾ ਸੀ। ਇਸ ਲਿਸਟ ਵਿਚ ਆਪਣਾ ਨਾਮ ਪਾਉਣ ਉੱਤੇ ਯੂ ਏ ਈ ਨੇ ਯੂਰਪੀ ਪਾਰਲੀਮੈਂਟ ਦੀ ਆਲੋਚਨਾ ਕੀਤੀ ਹੈ।
ਇਸ ਕੇਸ ਵਿੱਚ ਯੂ ਏ ਈ ਨੇ ਅਫਸੋਸ ਜ਼ਾਹਰ ਕਰਦਿਆਂ ਕਿਹਾ ਕਿ ਖਾੜੀ ਦੇ ਦੇਸ਼ ਵੱਲੋਂ ਯੂਰਪੀ ਯੂਨੀਅਨ ਦੀਆਂ ਸ਼ਰਤਾਂ ਪੂਰੀਆਂ ਕਰਨ ਦੇ ਬਾਵਜੂਦ ਇਹ ਫੈਸਲਾ ਲਿਆ ਗਿਆ ਹੈ। ਯੂਰਪੀ ਯੂਨੀਅਨ ਨੇ ਪਿਛਲੇ ਮੰਗਲਵਾਰ ਇਸ ਸੂਚੀ ਵਿਚ 10 ਦੇਸ਼ਾਂ ਦੇ ਨਾਮ ਸ਼ਾਮਲ ਕੀਤੇ ਸਨ। ਇਹ ਸੂਚੀ 2017 ਵਿਚ ਬਣਾਈ ਗਈ ਸੀ ਅਤੇ ਇਹ ਅਮੀਰਾਂ ਵੱਲੋਂ ਟੈਕਸ ਚੋਰੀ ਉੱਤੇ ਲਗਾਮ ਲਾਉਣ ਦੀ ਕਾਰਵਾਈ ਦਾ ਹਿੱਸਾ ਹੈ। ਜਿਹੜੇ ਨਵੇਂ ਦੇਸ਼ਾਂ ਦੇ ਨਾਮ ਸੂਚੀ ਵਿਚ ਪਾਏ ਗਏ, ਉਨ੍ਹਾਂ ਵਿਚ ਯੂ ਏ ਈ ਸ਼ਾਮਲ ਹੈ। ਦੁਬਈ ਦੀ ਸਰਕਾਰੀ ਸਮਾਚਾਰ ਏਜੰਸੀ ਨੇ ਮੰਗਲਵਾਰ ਸ਼ਾਮ ਨੂੰ ਦੱਸਿਆ, ‘ਯੂ ਏ ਈ ਇਸ ਮੁੱਦੇ ਉੱਤੇ ਯੂਰਪੀ ਯੂਨੀਅਨ ਨਾਲ ਪੂਰਾ ਸਹਿਯੋਗ ਕਰ ਰਿਹਾ ਹੈ ਤੇ ਉਸ ਦੀਆਂ ਸ਼ਰਤਾਂ ਪੂਰੀਆਂ ਕਰਨ ਦੀ ਕੋਸ਼ਿਸ਼ ਜਾਰੀ ਹੈ। ਇਸ ਦੇ ਬਾਵਜੂਦ ਉਸ ਨੂੰ ਬਲੈਕ ਲਿਸਟ ਵਿਚ ਪਾ ਦਿੱਤਾ ਹੈ।` ਏਜੰਸੀ ਦੇ ਮੁਤਾਬਕ ਯੂ ਏ ਈ ਕਾਲਾ ਧਨ ਕੇਸ ਵਿਚ ਅੰਤਰ ਰਾਸ਼ਟਰੀ ਸਟੈਂਡਰਡ ਨੰ ਪੂਰਾ ਕਰਨ ਦੀ ਲੰਬੇ ਸਮੇਂ ਦੀ ਨੀਤੀ ਨੂੰ ਪੂਰੀ ਤਰ੍ਹਾਂ ਵਚਨਬੱਧ ਹੈ।` ਯੂਰਪੀ ਯੂਨੀਅਨ ਨੇ ਸਾਲ 2017 ਦੀ ਸ਼ੁਰੂਆਤੀ ਸੂਚੀ ਵਿਚ ਯੂ ਏ ਈ ਦਾ ਨਾਂਅ ਪਾਇਆ ਸੀ, ਪਰ ਬਾਅਦ ਵਿਚ ਯੂ ਏ ਈ ਅਧਿਕਾਰੀਆਂ ਵੱਲੋਂ ਸਖਤ ਕਦਮ ਚੁੱਕਣ ਦੇ ਭਰੋਸੇ ਦੇ ਬਾਅਦ ਉਸ ਦਾ ਨਾਮ ਹਟਾ ਦਿੱਤਾ ਗਿਆ ਸੀ।