ਵਾਸ਼ਿੰਗਟਨ, 11 ਮਾਰਚ, (ਪੋਸਟ ਬਿਊਰੋ)- ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਆਪਣੇ ਦੇਸ਼ ਦੇ ਅਗਲੇ ਬਜਟ ਵਿੱਚ ਮੈਕਸੀਕੋ ਸਰਹੱਦ ਉੱਤੇ ਕੰਧ ਬਣਾਉਣ ਲਈ 8.6 ਅਰਬ ਡਾਲਰ ਦੀ ਮੰਗ ਕਰ ਸਕਦੇ ਹਨ।
ਅਮਰੀਕੀ ਮੀਡੀਆ ਨੇ ਅਣਪਛਾਤੇ ਸਰਕਾਰੀ ਸੂਤਰਾਂ ਦੇ ਹਵਾਲੇ ਨਾਲ ਦਿੱਤੀਆਂ ਵੱਖ-ਵੱਖ ਰਿਪੋਰਟਾਂ ਵਿੱਚ ਕਿਹਾ ਹੈ ਕਿ ਵ੍ਹਾਈਟ ਹਾਊਸ ਅਗਲੇ ਸਾਲ 2020 ਦੇ ਬੱਜਟ ਵਿੱਚ ਇਸ ਕੰਧ ਦੀ ਯੋਜਨਾ ਪੇਸ਼ ਕਰ ਸਕਦਾ ਹੈ। ਇਨ੍ਹਾਂ ਮੀਡੀਆ ਰਿਪੋਰਟਾਂ ਮੁਤਾਬਕ ਰਾਸ਼ਟਰਪਤੀ ਡੋਨਾਲਡ ਟਰੰਪ ਮੈਕਸੀਕੋ ਨਾਲ ਲੱਗਦੀ ਅਮਰੀਕੀ ਸਰਹੱਦ ਉੱਤੇ ਇਹ ਕੰਧ ਬਣਾਉਣ ਲਈ ਪਿਛਲੇ ਸਾਲ ਦੀ ਆਪਣੀ ਮੰਗ ਤੋਂ ਦੁੱਗਣੀ ਰਕਮ ਮੰਗ ਸਕਦੇ ਹਨ। ਪਿਛਲੇ ਸਾਲ ਉਨ੍ਹਾਂ ਨੇ ਕੰਧ ਲਈ 5.7 ਅਰਬ ਡਾਲਰ ਦੀ ਮੰਗ ਕੀਤੀ ਸੀ। ਇਕ ਰਿਪੋਰਟ ਮੁਤਾਬਕ ਇਸ ਰਕਮ ਦੀ ਵਰਤੋਂ ਕਰੀਬ 700 ਮੀਲ (1127 ਕਿਲੋਮੀਟਰ) ਲੰਬੀ ਸਰਹੱਦ ਉੱਤੇ ਕੰਧ ਬਣਾਉਣ ਲਈ ਕੀਤੀ ਜਾਵੇਗੀ। ਅਗਲਾ ਵਿੱਤ ਸਾਲ 2020 ਇਕ ਅਕਤੂਬਰ ਨੂੰ ਸ਼ੁਰੂ ਹੋਵੇਗਾ। ਅਮਰੀਕੀ ਕਾਂਗਰਸ ਨੇ ਇਸ ਤੋਂ ਪਹਿਲਾਂ ਬਜਟ ਪਾਸ ਕਰਨਾ ਹੈ, ਤਾਂ ਕਿ ਫੈਡਰਲ ਸਰਕਾਰ ਵਿੱਤ ਸਾਲ 2020 ਦੇ ਸ਼ੁਰੂ ਹੋਣ ਪਿੱਛੋਂ ਆਪਣਾ ਕੰਮ ਸੁਚਾਰੂ ਰੂਪ ਨਾਲ ਚਲਾ ਸਕੇ। ਵ੍ਹਾਈਟ ਹਾਊਸ ਦੇ ਆਰਥਿਕ ਸਲਾਹਕਾਰ ਲੈਰੀ ਕੁਜਲੋ ਨੇ ਇਸ ਬਾਰੇ ਮੀਡੀਆ ਨਾਲ ਗੱਲਬਾਤ ਵਿੱਚ ਸਾਫਕਿਹਾ ਕਿ ਕੰਧ ਬਣਾਉਣਾ ਬਹੁਤ ਜ਼ਰੂਰੀ ਹੈ ਅਤੇ ਉਹ ਆਸ ਕਰਦੇ ਹਨ ਕਿ ਰਾਸ਼ਟਰਪਤੀ ਟਰੰਪ ਇਸ ਕੰਧ ਦੀ ਉਸਾਰੀ ਦੀ ਆਪਣੀ ਯੋਜਨਾ ਉੱਤੇ ਡਟੇ ਰਹਿਣਗੇ।