ਨਵੀਂ ਦਿੱਲੀ, 10 ਮਾਰਚ (ਪੋਸਟ ਬਿਊਰੋ)- ਇਨਕਮ ਟੈਕਸ ਦਾ ਪੈਨ ਕਾਰਡ ਭਾਰਤੀ ਨਾਗਰਿਕਾਂ ਦੇ ਲਈ ਜ਼ਰੂਰੀ ਦਸਤਾਵੇਜ਼ਾਂ ਵਿਚੋਂ ਇਕ ਹੈ। ਜਦੋਂ ਇਨਕਮ ਟੈਕਸ ਰਿਟਰਨ ਭਰਨੀ ਜਾਂ ਬੈਂਕ ਦਾ ਖਾਤਾ ਖੁੱਲ੍ਹਵਾਉਣਾ ਹੋਵੇ, ਹਰ ਵਿੱਤੀ ਲੈਣ-ਦੇਣ ਲਈ ਪੈਨ ਕਾਰਡ ਦੀ ਲੋੜ ਪੈਂਦੀ ਹੈ। ਸਰਕਾਰ ਨੇ ਸ਼ਾਪਿੰਗ ਲਈ ਵੀ ਪੈਨ ਕਾਰਡ ਲਾਜ਼ਮੀ ਕਰ ਦਿੱਤਾ ਹੈ। ਇਹ ਅਜਿਹਾ ਦਸਤਾਵੇਜ਼ ਹੈ ਜੋ ਨਾਗਰਿਕਾਂ ਦਾ ਫਾਈਨੈਂਸ਼ੀਅਲ ਸਟੇਟਸ ਨੂੰ ਦੱਸਦਾ ਹੈ। ਇੰਨਾ ਜ਼ਰੂਰੀ ਕਾਰਡ ਸਿਰਫ਼ ਇਕ ਗ਼ਲਤੀ ਕਾਰਨ ਰੱਦੀ ਹੋ ਗਿਆ ਤਾਂ ਮੁਸ਼ਕਲ ਆਵੇਗੀ, ਇਸ ਲਈ 31 ਮਾਰਚ 2019 ਤਕ ਪੈਨ ਕਾਰਡ ਨੂੰ ਆਧਾਰ ਕਾਰਡ ਨਾਲ ਲਿੰਕ ਕਰਾਉਣਾ ਪਵੇਗਾ, ਵਰਨਾ ਇਹ ਕਾਰਡ ਹਮੇਸ਼ਾ ਲਈ ਬੇਕਾਰ ਹੋ ਜਾਵੇਗਾ।
ਵਰਨਣ ਯੋਗ ਹੈ ਕਿ ਬੀਤੇ ਸਾਲ ਸਰਕਾਰ ਨੇ ਲਗਪਗ 11.44 ਲੱਖ ਪੈਨ ਕਾਰਡ ਬੰਦ ਕਰ ਦਿੱਤੇ ਸਨ ਜਾਂ ਫਿਰ ਉਨ੍ਹਾਂ ਨੂੰ ਨਕਾਰਾ ਕੈਟਾਗਰੀ ਵਿਚ ਪਾ ਦਿੱਤਾ ਸੀ। 31 ਮਾਰਚ ਦੀ ਮਿਆਦ ਲੰਘਣ ਪਿੱਛੋਂ ਆਧਾਰ ਤੇ ਪੈਨ ਕਾਰਡ ਲਿੰਕ ਨਹੀਂ ਕੀਤਾ ਗਿਆ ਤਾਂ ਇਨਕਮ ਟੈਕਸ ਦਾ ਪੈਨ ਕਾਰਡ ਰੱਦ ਕਰਨ ਦਾ ਨਿਯਮ ਲਾਗੂ ਕੀਤਾ ਜਾ ਰਿਹਾ ਹੈ। ਜਿਨ੍ਹਾਂ ਲੋਕਾਂ ਨੇ ਅਜੇ ਤਕ ਆਪਣੇ ਪੈਨ ਕਾਰਡ ਨੂੰ ਆਧਾਰ ਨਾਲ ਲਿੰਕ ਨਹੀਂ ਕੀਤਾ, ਉਨ੍ਹਾਂ ਨੂੰ ਇਹ ਕਾਰਡ ਛੇਤੀ ਹੀ ਆਧਾਰ ਕਾਰਡ ਨਾਲ ਲਿੰਕ ਕਰਵਾ ਲੈਣਾ ਚਾਹੀਦਾ ਹੈ। ਸਰਕਾਰ ਨੇ ਇਸ ਦੀ 31 ਮਾਰਚ ਦੀ ਤਰੀਕ ਦਿੱਤੀ ਹੈ।