ਜਲੰਧਰ, 9 ਮਾਰਚ (ਪੋਸਟ ਬਿਊਰੋ)- ਪੰਜਾਬ ਵਿਚ ਵਿਆਹ ਕਰਵਾ ਕੇ ਆਪਣੀਆਂ ਪਤਨੀਆਂ ਨੂੰ ਛੱਡ ਕੇ ਵਿਦੇਸ਼ ਜਾ ਵੱਸੇ ਐੱਨ ਆਰ ਆਈ ਲਾੜਿਆਂ ਤੋਂ ਸਤਾਈਆਂ ਔਰਤਾਂ ਨੇ ਕੱਲ੍ਹ ਖੇਤਰੀ ਪਾਸਪੋਰਟ ਦਫਤਰ ਅੱਗੇ ਧਰਨਾ ਦਿੱਤਾ ਅਤੇ ਧੋਖਾ ਕਰ ਗਏ ਪਤੀਆਂ ਦੇ ਪਾਸਪੋਰਟ ਜ਼ਬਤ ਨਾ ਕਰਨ ਵਿਰੁੱਧ ਪਿੱਟ ਸਿਆਪਾ ਕਰ ਕੇ ਚਿਤਾਵਨੀ ਦਿੱਤੀ ਕਿ ਖੇਤਰੀ ਪਾਸਪੋਰਟ ਅਫਸਰ ਨੇ ਆਪਣੇ ਵਤੀਰੇ 'ਚ ਤਬਦੀਲੀ ਨਾ ਕੀਤੀ ਤੇ ਦੋਸ਼ੀਆਂ ਦੇ ਪਾਸਪੋਰਟ ਜ਼ਬਤ ਕਰਨ ਦੀ ਕਾਰਵਾਈ ਨਾ ਕੀਤੀ ਤਾਂ ਪੀੜਤ ਔਰਤਾਂ ਪਾਸਪੋਰਟ ਦਫਤਰ ਵਿਖੇ ਲੰਮਾ ਧਰਨਾ ਦੇਣ ਲਈ ਮਜ਼ਬੂਰ ਹੋਣਗੀਆਂ।
ਪਰਵਾਸੀ ਲਾੜਿਆਂ ਦੀਆਂ ਸਤਾਈਆਂ ਲੜਕੀਆਂ ਦੀ ਸਮਾਜੀ ਸੰਸਥਾ ‘ਅਬ ਨਹੀਂ’ ਦੀ ਪ੍ਰਧਾਨ ਸਤਵਿੰਦਰ ਕੌਰ ਸੱਤੀ ਦੀ ਅਗਵਾਈ ਵਿੱਚ ਸੈਂਕੜੇ ਪੀੜਤ ਔਰਤਾਂ ਨੇ ਕੌਮਾਂਤਰੀ ਇਸਤਰੀ ਦਿਵਸ ਮੌਕੇ ਪਹਿਲਾਂ ਦੇਸ਼ ਭਗਤ ਯਾਦਗਾਰ ਹਾਲ ਵਿਖੇ ਰੈਲੀ ਕੀਤੀ ਤੇ ਫੇਰ ਰੋਸ ਮਾਰਚ ਕਰ ਕੇ ਖੇਤਰੀ ਪਾਸਪੋਰਟ ਦਫਤਰ ਪੁੱਜੀਆਂ, ਪਰ ਖੇਤਰੀ ਪਾਸਪੋਰਟ ਅਧਿਕਾਰੀ ਉਨ੍ਹਾਂ ਦੇ ਉਥੇ ਪੁੱਜਣ ਤੋਂ ਪਹਿਲਾਂ ਹੀ ਚਲੇ ਗਏ ਤੇ ਉਨ੍ਹਾਂ ਦੀ ਗੈਰਹਾਜ਼ਰੀ ਵਿੱਚ ਪੀ ਏ ਮੰਗ ਪੱਤਰ ਲੈਣ ਆ ਗਿਆ। ਸਤਵਿੰਦਰ ਕੌਰ ਸੱਤੀ ਨੇ ਕਿਹਾ ਕਿ ਚੰਡੀਗੜ੍ਹ ਪਾਸਪੋਰਟ ਦਫਤਰ ਨੇ ਇਸ ਤੋਂ ਵੱਧ ਧੋਖਾਧੜੀ ਵਾਲੇ ਪਤੀਆਂ ਦੇ ਪਾਸਪੋਰਟ ਜ਼ਬਤ ਕੀਤੇ ਤੇ ਅੰਮ੍ਰਿਤਸਰ ਦਫਤਰ ਵੀ ਕਾਰਵਾਈ ਕਰ ਰਿਹਾ ਹੈ, ਪਰ ਜਲੰਧਰ ਦਫਤਰ ਦੇ ਅਧਿਕਾਰੀ ਕਿਸੇ ਵੀ ਧੋਖਾਧੜੀ ਵਾਲੇ ਐਨ ਆਰ ਆਈ ਪਤੀ ਖਿਲਾਫ ਕਾਰਵਾਈ ਕਰਨ ਦੀ ਥਾਂ ਉਨ੍ਹਾਂ ਨੂੰ ਬਾਹਰਲੇ ਦੇਸ਼ਾਂ ਵਿੱਚ ਜਾ ਕੇ ਕਾਰਵਾਈ ਕਰਨ ਲਈ ਆਖਦੇ ਹਨ ਤੇ ਝਿੜਕਾਂ ਮਾਰਦੇ ਹਨ।