ਰੂਪਨਗਰ, 6 ਮਾਰਚ (ਪੋਸਟ ਬਿਊਰੋ)- ਵਿਜੀਲੈਂਸ ਬਿਊਰੋ ਮੋਹਾਲੀ ਦੀ ਟੀਮ ਨੇ ਥਾਣਾ ਸਿਟੀ ਰੂਪਨਗਰ ਦੇ ਏ ਐੱਸ ਆਈ ਇੰਦਰਪਾਲ ਸਿੰਘ ਨੂੰ ਰੰਗੇ ਹੱਥੀਂ ਛੇ ਹਜ਼ਾਰ ਰੂਪੈ ਰਿਸ਼ਵਤ ਲੈਂਦੇ ਹੋਏ ਫੜਿਆ ਹੈ। ਇਸ ਦੇ ਬਾਅਦ ਰੂਪਨਗਰ ਦੇ ਐੱਸ ਐੱਸ ਪੀ ਸਵਪਨ ਸ਼ਰਮਾ ਨੇ ਇਸ ਏ ਐੱਸ ਆਈ ਨੂੰ ਸਸਪੈਂਡ ਕਰ ਦਿੱਤਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਡੀ ਐੱਸ ਪੀ ਵਿਜੀਲੈਂਸ ਹਰਵਿੰਦਰ ਸਿੰਘ ਦੀ ਅਗਵਾਈ ਹੇਠ ਵਿਜੀਲੈਂਸ ਟੀਮ, ਜਿਸ ਵਿੱਚ ਇੰਸਪੈਕਟਰ ਇੰਦਪਾਲ ਸਿੰਘ, ਮੌਕੇ ਦਾ ਗਵਾਹ ਬਲਵਿੰਦਰ ਸਿੰਘ ਪੁੱਤਰ ਜੱਗਾ ਸਿੰਘ ਵਾਸੀ ਕੋਟਲਾ ਨਿਹੰਗ ਸ਼ਾਮਲ ਸੀ, ਨੇ ਇਹ ਕਾਰਵਾਈ ਕੀਤੀ ਹੈ। ਇਸ ਬਾਰੇ ਵਿਜੀਲੈਂਸ ਬਿਊਰੋ ਮੋਹਾਲੀ ਦੇ ਪ੍ਰੈਸ ਬਿਆਨ ਅਨੁਸਾਰ ਸਿ਼ਕਾਇਤ ਕਰਤਾ ਸੁੱਚਾ ਸਿੰਘ ਵਾਸੀ ਕਠਿਆਣਾ ਹਿਮਾਚਲ ਪ੍ਰਦੇਸ ਨੇ ਵਿਜੀਲੈਂਸ ਨੂੰ ਸਿ਼ਕਾਇਤ ਕੀਤੀ ਸੀ ਕਿ ਵਿਨੋਦ ਕੁਮਾਰ ਵਾਸੀ ਪਾਵਰ ਕਲੌਨੀ ਰੂਪਨਗਰ ਨਾਲ ਉਸ ਦਾ ਪੈਸਿਆਂ ਦੇ ਲੈਣ ਦੇਣ ਦਾ ਝਗੜਾ ਸੀ, ਜਿਸ ਕਰ ਕੇ 26 ਫਰਵਰੀ ਨੂੰ ਵਿਨੋਦ ਕੁਮਾਰ ਨੇ ਆਪਣੇ ਸਾਥੀਆਂ ਨਾਲ ਮਿਲ ਕੇ ਸੁੱਚਾ ਸਿੰਘ ਉੱਤੇ ਹਮਲਾ ਕਰਕੇ ਜਖਮੀ ਕਰ ਦਿੱਤਾ। ਇਸ ਮਗਰੋਂ ਜਖਮੀ ਸੁੱਚਾ ਸਿੰਘ ਨੂੰ ਇਲਾਜ ਲਈ ਸਿਵਲ ਹਸਪਤਾਲ ਰੂਪਨਗਰ ਦਾਖਲ ਕਰਾਇਆ ਗਿਆ ਅਤੇ ਹਸਪਤਾਲ ਨੇ ਪਰਚਾ ਕੱਟ ਕੇ ਥਾਣਾ ਸਿਟੀ ਰੂਪਨਗਰ ਨੂੰ ਭੇਜ ਦਿੱਤਾ। ਇਸ ਕੇਸ ਦੀ ਜਾਂਚ ਏ ਐੱਸ ਆਈ ਇੰਦਰਪਾਲ ਸਿੰਘ ਨੂੰ ਸੌਂਪੀ ਗਈ ਤਾਂ ਇੰਦਰਪਾਲ ਸਿੰਘ ਨੇ ਦੋਸ਼ੀਆਂ ਖਿਲਾਫ ਕਾਰਵਾਈ ਕਰਨ ਦੀ ਬਜਾਏ ਉਸ ਨੂੰ ਧਮਕਾਇਆ ਕਿ ਸਮਝੌਤਾ ਕਰ ਲਵੇ, ਜੇ ਨਾ ਕੀਤਾ ਤਾਂ ਉਲਟਾ ਉਸ ਦੇ ਖਿਲਾਫ ਵਿਨੋਦ ਕੁਮਾਰ ਦੀ ਪਤਨੀ ਨਾਲ ਛੇੜ ਛਾੜ ਅਤੇ ਅਗਵਾ ਕਰਨ ਦਾ ਕੇਸ ਦਰਜ ਕਰ ਦੇਵੇਗਾ, ਪਰ ਜੇ ਬਚਣਾ ਹੈ ਤਾਂ 10 ਹਜ਼ਾਰ ਰੁਪੈ ਦੇਣੇ ਪੈਣਗੇ। ਸਿ਼ਕਾਇਤ ਕਰਤਾ ਅਨੁਸਾਰ ਏ ਐੱਸ ਆਈ ਨੇ ਉਸ ਨਾਲ 9 ਹਜ਼ਾਰ ਰੁਪੈ ਦੀ ਸੈਟਿੰਗ ਕਰ ਲਈ, ਜਿਸ ਦੇ 3 ਹਜ਼ਾਰ ਰੁਪੈ ਥਾਣੇਦਾਰ ਨੇ ਪਹਿਲਾਂ ਲੈ ਲਏ ਅਤੇ ਬਾਕੀ 6 ਹਜ਼ਾਰ ਲੈਣ ਸਮੇਂ ਵਿਜੀਲੈਂਸ ਟੀਮ ਨੇ ਉਸ ਨੂੰ ਰੰੰਗੇ ਹੱਥੀਂ ਕਾਬੂ ਕਰ ਲਿਆ ਅਤੇ ਅਦਾਲਤ ਵਿੱਚ ਪੇਸ਼ ਕੀਤਾ ਹੈ।