ਰੋਮ, 5 ਮਾਰਚ (ਪੋਸਟ ਬਿਊਰੋ)- ਇਟਲੀ ਸਿਰਫ ਬਿਨਾਂ ਪੇਪਰਾਂ ਦੇ ਵਿਦੇਸ਼ੀਆਂ ਨੂੰ ਪਨਾਹ ਦੇਣ ਵਿੱਚ ਹੀ ਅੱਗੇ ਨਹੀਂ, ਦੁਨੀਆ ਦਾ ਦੂਜਾ ਅਜਿਹਾ ਦੇਸ਼ ਹੈ, ਜਿਹੜਾ ਆਪਣੇ ਬਾਸ਼ਿੰਦਿਆਂ ਨੂੰ ਚੁਸਤ-ਦਰੁੱਸਤ ਰੱਖਦਾ ਹੈ।
ਬਲੂਮਬਰਗ ਹੈਲਥਿਸਟ ਕੰਟਰੀ ਇੰਡੈਕਸ ਨੇ ਸੰਨ 2019 ਦੇ ਸਰਵੇ ਅਨੁਸਾਰ ਦੁਨੀਆ ਦੇ ਸਭ ਤੋਂ ਤੰਦਰੁਸਤ ਦੇਸ਼ਾਂ ਵਿੱਚ ਪਹਿਲਾ ਨੰਬਰ ਸਪੇਨ ਨੂੰ ਦਿੱਤਾ ਹੈ, ਦੂਜਾ ਨੰਬਰ ਪੰਜਾਬੀਆਂ ਦੇ ਮਹਿਬੂਬ ਦੇਸ਼ ਇਟਲੀ ਨੂੰ ਦਿੱਤਾ ਗਿਆ ਹੈ। ਦੁਨੀਆ ਦੇ 169 ਦੇਸ਼ਾਂ ਦੇ ਸਰਵੇ ਅਨੁਸਾਰ ਸਪੇਨ ਨੂੰ 100 ਵਿੱਚੋਂ 92.8. ਨੰਬਰ ਮਿਲੇ ਹਨ, ਇਟਲੀ ਨੂੰ 91.59 ਨੰਬਰ ਮਿਲੇ ਹਨ। ਇਸ ਤੋਂ ਪਿੱਛੋਂ ਤੀਜੇ ਨੰਬਰ 'ਤੇ ਆਈਸਲੈਂਡ ਹੈ, ਜਿਸ ਨੂੰ 91.44 ਨੰਬਰ ਮਿਲੇ ਹਨ। ਚੌਥਾ ਸਥਾਨ ਜਾਪਾਨ, ਪੰਜਵਾਂ ਸਥਾਨ ਸਵਿੱਟਜ਼ਰਲੈਂਡ, ਛੇਵਾਂ ਸਥਾਨ ਸਵੀਡਨ, ਸੱਤਵਾਂ ਸਥਾਨ ਆਸਟਰੇਲੀਆ, ਅੱਠਵਾਂ ਸਥਾਨ ਸਿੰਗਾਪੁਰ, 9ਵਾਂ ਸਥਾਨ ਨਾਰਵੇ, 10ਵਾਂ ਇਸਰਾਈਲ, 11ਵਾਂ ਲਗਜ਼ਮਬਰਗ, 12ਵਾਂ ਫਰਾਂਸ, 13ਵਾਂ ਆਸਟਰੀਆ, 14ਵਾਂ ਇੰਗਲੈਂਡ, 15ਵਾਂ ਨੀਦਰਲੈਂਡ, 16ਵਾਂ ਕੈਨੇਡਾ, 17ਵਾਂ ਦੱਖਣੀ ਕੋਰੀਆ, 18ਵਾਂ ਨਿਊਜ਼ੀਲੈਂਡ ਆਦਿ ਹਨ। ਇਸ ਸਰਵੇ ਵਿੱਚ ਸਭ ਤੋਂ ਹੈਰਾਨੀ ਦੀ ਗੱਲ ਇਹ ਹੈ ਕਿ ਪੂਰੀ ਦੁਨੀਆ ਵਿੱਚ ਸਭ ਤੋਂ ਤਾਕਤਵਰ ਦੇਸ਼ ਕਹਾਉਣ ਵਾਲਾ ਅਮਰੀਕਾ ਤੰਦਰੁਸਤੀ ਵਿੱਚ ਪਛੜ ਗਿਆ ਹੈ ਤੇ ਉਸ ਨੂੰ ਇਸ ਸਰਵੇ ਵਿੱਚ 35ਵਾਂ ਥਾਂ ਮਿਲਿਆ ਹੈ। ਸਪੇਨ ਤੇ ਇਟਲੀ, ਜਿੱਥੋਂ ਦੇ ਫਲ, ਸਬਜ਼ੀਆਂ, ਪਨੀਰ ਤੇ ਜੈਤੁਨ ਦਾ ਤੇਲ ਲੋਕਾਂ ਦੀ ਖੁਰਾਕ ਦਾ ਮੁੱਖ ਹਿੱਸਾ ਹਨ, ਬਿਮਾਰੀਆਂ ਨੂੰ ਪਛਾੜ ਅੱਗੇ ਆਏ ਹਨ। ਸਰਵੇ ਅਨੁਸਾਰ ਇਥੋਂ ਦੇ ਲੋਕਾਂ ਵਿੱਚ ਦਿਲ ਅਤੇ ਹੋਰ ਗੰਭੀਰ ਰੋਗਾਂ ਦੀਆਂ ਬਿਮਾਰੀਆਂ ਹੋਰ ਦੇਸ਼ਾਂ ਨਾਲੋਂ ਕਾਫੀ ਘੱਟ ਹਨ।