ਬੀਤੇ ਦਿਨੀਂ ਸਲਮਾਨ ਖਾਨ ਦੀ ਖਾਸ ਦੋਤ ਯੂਲੀਆ ਵੰਤੂਰ ਦੇ ਫਿਲਮ ‘ਰਾਧਾ ਕਿਉਂ ਗੋਰੀ ਮੈਂ ਕਿਉਂ ਕਾਲਾ’ ਨਾਲ ਬਾਲੀਵੁੱਡ ਡੈਬਿਊ ਦੀ ਚਰਚਾ ਸੀ, ਪਰ ਤਾਜ਼ਾ ਖਬਰਾਂ ਅਨੁਸਾਰ ਇਸ ਫਿਲਮ 'ਤੇ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਬੰਦ ਹੋਣ ਦੀ ਤਲਵਾਰ ਲਟਕ ਗਈ ਹੈ। ਸਲਮਾਨ ਨੇ ਯੂਲੀਆ ਨੂੰ ਫਿਲਮਾਂ 'ਚ ਹਰ ਤਰ੍ਹਾਂ ਦੀ ਮਦਦ ਕਰਨ ਦਾ ਭਰੋਸਾ ਦਿੱਤਾ ਸੀ ਤੇ ਉਸ ਨੇ ਆਪਣੇ ਪੁਰਾਣੇ ਦੋਸਤ ਪ੍ਰੇਮ ਸੋਨੀ ਨਾਲ ਯੂਲੀਆ ਦੀ ਡੈਬਿਊ ਫਿਲਮ ਸ਼ੁਰੂ ਕਰਵਾਈ ਸੀ। ਕਿਹਾ ਗਿਆ ਹੈ ਕਿ ਇਸ ਦੀ ਪ੍ਰੋਡਿਊਸਰ ਪ੍ਰੇਰਣਾ ਅਰੋੜਾ ਹੋਵੇਗੀ ਅਤੇ ਸਲਮਾਨ ਦੀ ਯੋਜਨਾ ਸੀ ਕਿ ਹਿੰਦੀ ਸਿਨੇਮਾ ਵਿੱਚ ਪੈਸੇ ਲਾਉਂਦੇ ਰਹੇ ਕੁਝ ਵੱਡੇ ਫਾਈਨਾਂਸਰਾਂ ਨੂੰ ਇਸ ਫਿਲਮ ਵਿੱਚ ਪੈਸਾ ਲਾਉਣਾ ਸੀ।
ਫਿਲਮ ਨੂੰ ਕੋਈ ਕਾਰਪੋਰੇਟ ਹਾਊਸ ਖਰੀਦ ਲਏ, ਉਸ ਲਈ ਸਲਮਾਨ ਦੀ ਕੋਸ਼ਿਸ਼ ਸੀ, ਪਰ ਫਿਲਮ ਪ੍ਰੋਡਿਊਸਰ ਪ੍ਰੇਰਣਾ ਅਰੋੜਾ ਧੋਖਾਧੜੀ ਦੇ ਦੋਸ਼ ਵਿੱਚ ਗ੍ਰਿਫਤਾਰ ਹੋ ਗਈ ਜਿਸ ਕਰ ਕੇ ਕੋਈ ਵੀ ਯੂਲੀਆ ਦੀ ਇਸ ਫਿਲਮ ਦਾ ਪੈਸਾ ਲਗਾਉਣ ਨੂੰ ਤਿਆਰ ਨਹੀਂ ਹੈ। ਬੀਤੇ ਦਿਨੀਂ ਪ੍ਰੇਮ ਸੋਨੀ ਨੇ ਵੀ ਫਿਲਮ ਤੋਂ ਵੱਖ ਹੋਣ ਦਾ ਫੈਸਲਾ ਕੀਤਾ ਤੇ ਇਸ ਫੈਸਲੇ ਦੀ ਜਾਣਕਾਰੀ ਸਲਮਾਨ ਖਾਨ ਨੂੰ ਦੇ ਦਿੱਤੀ। ਇਸ ਤੋਂ ਬਾਅਦ ਫਿਲਮ ਨੂੰ ਠੰਢੇ ਬਸਤੇ ਵਿੱਚ ਪਾਉਣ ਦਾ ਫੈਸਲਾ ਹੋ ਗਿਆ ਤੇ ਇਹ ਫਿਲਮ ਕਿਸੇ ਦੂਜੇ ਫਾਈਨਾਂਸਰ ਨਾਲ ਵੀ ਨਹੀਂ ਬਣੇਗੀ। ਕਿਹਾ ਜਾ ਰਿਹਾ ਹੈ ਕਿ ਸਲਮਾਨ ਹੁਣ ਯੂਲੀਆ ਲਈ ‘ਦਬੰਗ' ਸੀਰੀਜ਼ ਦੀ ਤੀਜੀ ਫਿਲਮ ਵਿੱਚ ਕੋਈ ਰੋਲ ਕੱਢਣ ਦੀ ਕੋਸ਼ਿਸ਼ ਕਰ ਰਹੇ ਹਨ।