ਇਸਲਾਮਾਬਾਦ, 21 ਫਰਵਰੀ (ਪੋਸਟ ਬਿਊਰੋ)- ਜੰਮੂ-ਕਸ਼ਮੀਰ ਦੇ ਪੁਲਵਾਮਾ ਵਿੱਚ ਪਿਛਲੀ 14 ਫਰਵਰੀ ਨੂੰ ਸੀ ਆਰ ਪੀ ਐੱਫ ਦੇ ਕਾਫ਼ਿਲੇ ਉਤੇ ਹੋਏ ਅੱਤਵਾਦੀ ਹਮਲੇ ਤੋਂ ਇਕ ਹਫ਼ਤਾ ਬਾਅਦ ਜੈਸ਼-ਏ-ਮੁਹੰਮਦ ਦੇ ਮੁਖੀ ਮੌਲਾਨਾ ਮਸੂਦ ਅਜ਼ਹਰ ਨੇ ਆਡੀਓ ਜਾਰੀ ਕਰ ਕੇ ਕਿਹਾ ਹੈ ਕਿ ਪੁਲਵਾਮਾ ਹਮਲੇ `ਚ ਉਸ ਦਾ ਕਿਸੇ ਤਰ੍ਹਾਂ ਦਾ ਹੱਥ ਨਹੀਂ ਸੀ। ਹਮਲੇ ਤੋਂ ਬਾਅਦ ਇਸ ਦੀ ਜ਼ਿੰਮੇਵਾਰੀ ਜੈਸ਼-ਇ-ਮੁਹੰਮਦ ਨੇ ਲਈ ਸੀ, ਜਿਸ ਦਾ ਮੁਖੀ ਮਸੂਦ ਅਜ਼ਹਰ ਹੈ।
ਇਸ ਆਡੀਓ ਵਿੱਚ ਮਸੂਦ ਨੇ ਕਿਹਾ ਕਿ ਨਰਿੰਦਰ ਮੋਦੀ ਕਸ਼ਮੀਰ ਵਿੱਚ ਪੂਰੀ ਤਰ੍ਹਾਂ ਫੇਲ੍ਹ ਹੋ ਗਿਆ ਹੈ। ਪੁਲਵਾਮਾ ਹਮਲੇ ਨਾਲ ਹਿੰਦੁਸਤਾਨ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ 2019 ਦੀਆਂ ਲੋਕ ਸਭਾ ਦੀਆਂ ਚੋਣਾਂ ਦੇ ਦੌਰਾਨ ਘਾਟਾ ਹੋਵੇਗਾ। ਮਸੂਦ ਅਜ਼ਹਰ ਨੇ ਕਿਹਾ, ‘ਜਿੰਨੀਆਂ ਗਾਲ੍ਹਾਂ ਮੈਨੂੰ ਦੇਣੀਆਂ ਹਨ, ਦੇ ਲਉ, ਪਰ ਆਦਿਲ ਅਹਿਮਦ ਖ਼ਿਲਾਫ਼ ਕੁਝ ਨਾ ਕਹਿਣਾ। ਕਸ਼ਮੀਰ ਵਿੱਚ ਆਜ਼ਾਦੀ ਦੀ ਲੜਾਈ ਆਪਣੇ ਪੈਰਾਂ ਉੱਤੇ ਖੜ੍ਹੀ ਹੋ ਚੁੱਕੀ ਹੈ। ਓਥੇ ਕਿਸੇ ਵਿਦੇਸ਼ੀ ਤਾਕਤ ਦੀ ਲੋੜ ਨਹੀਂ। ਮੈਂ ਕਦੇ ਅੱਤਵਾਦੀ ਆਦਿਲ ਅਹਿਮਦ ਡਾਰ ਨੂੰ ਨਹੀਂ ਮਿਲਿਆ। ਉਸ ਨੇ ਕਿਹਾ, ਆਦਿਲ ਨੂੰ ਪੂਰੀ ਦੁਨੀਆ ਮੇਰੇ ਨਾਲ ਜੋੜ ਰਹੀ ਹੈ, ਪਰ ਮੇਰੀ ਹਸਰਤ ਹੈ ਕਿ ਕਾਸ਼ ਮੈਂ ਉਸ ਨੂੰ ਕਦੀ ਮਿਲਿਆ ਹੁੰਦਾ। ਜੇ ਆਦਿਲ ਦੇ ਕਾਰਨ ਮੈਨੂੰ ਮਾਰ ਦਿੱਤਾ ਜਾਵੇ ਤਾਂ ਕੋਈ ਦੁੱਖ ਨਹੀਂ ਹੋਵੇਗਾ, ਇਹ ਮੇਰੇ ਲਈ ਸ਼ਹਾਦਤ ਹੋਵੇਗੀ।
ਆਡੀਓ ਵਿੱਚ ਮਸੂਦ ਨੇ ਪਾਕਿਸਤਾਨੀ ਸਰਕਾਰ ਤੇ ਮੀਡੀਆ ਨੂੰ ਡਰਪੋਕ ਦੱਸਿਆ। ਉਸ ਨੇ ਕਿਹਾ ਕਿ ਪੁਲਵਾਮਾ ਹਮਲੇ ਤੋਂ ਬਾਅਦ ਇੱਥੋਂ ਦੀ ਮੀਡੀਆ ਅਤੇ ਸਰਕਾਰ ਦੋਵੇਂ ਡਰੇ ਹੋਏ ਹਨ। ਉਸ ਨੇ ਕਿਹਾ ਕਿ ਉਹ ਪਾਕਿਸਤਾਨ ਨੂੰ ਕਿਸੇ ਤਰ੍ਹਾਂ ਦੀ ਜੰਗ `ਚ ਨਹੀਂ ਝੋਕਣਾ ਚਹੁੰਦੇ। ਚੀਨ ਹਮੇਸ਼ਾ ਪਾਕਿਸਤਾਨ ਦਾ ਸਮਰਥਨ ਕਰੇਗਾ, ਇਸ ਲਈ ਭਾਰਤ ਤੋਂ ਡਰਨ ਦੀ ਪਾਕਿਸਤਾਨ ਦੇ ਲੋਕਾਂ ਨੂੰ ਜ਼ਰੂਰਤ ਨਹੀਂ ਹੈ।