ਰਣਵੀਰ ਸਿੰਘ ਦੀ ਫਿਲਮ ‘ਗਲੀ ਬੁਆਏ’ ਕੱਲ੍ਹ ਰਿਲੀਜ਼ ਹੋ ਰਹੀ ਹੈ। ਇਸ ਵਿੱਚ ਉਹ ਰੈਪਰ ਦੀ ਭੂਮਿਕਾ ਵਿੱਚ ਹਨ। ਉਸ ਦੇ ਬਾਅਦ ਉਹ ਆਪਣੀ ਫਿਲਮ ‘83’ ਦੀਆਂ ਤਿਆਰੀਆਂ ਵਿੱਚ ਲੱਗ ਜਾਣਗੇ। ਇਹ ਫਿਲਮ ਸਾਲ 1983 ਵਿੱਚ ਭਾਰਤੀ ਕ੍ਰਿਕਟ ਟੀਮ ਦੇ ਲੰਡਨ ਵਿੱਚ ਵਿਸ਼ਵ ਕੱਪ ਜਿੱਤਣ 'ਤੇ ਆਧਾਰਤ ਹੋਵੇਗੀ।
ਕ੍ਰਿਕਟ ਦੇ ਇਤਿਹਾਸ ਵਿੱਚ ਓਦੋਂ ਭਾਰਤ ਨੇ ਪਹਿਲੀ ਵਾਰ ਵਿਸ਼ਵ ਕੱਪ ਜਿੱਤਿਆ ਸੀ। ਫਿਲਮ ਵਿੱਚ ਰਣਵੀਰ ਸਿੰਘ ਓਦੋਂ ਦੀ ਟੀਮ ਦੇ ਕਪਤਾਨ ਅਤੇ ਆਲਰਾਊਂਡਰ ਕਪਿਲ ਦੇਵ ਦੀ ਭੂਮਿਕਾ ਨਿਭਾ ਰਹੇ ਹਨ। ਇਨ੍ਹੀਂ ਦਿਨੀਂ ਚਰਚਿਤ ਅਤੇ ਨਾਮੀ-ਗਿਰਾਮੀ ਸ਼ਖਸੀਅਤਾਂ ਦੀ ਜ਼ਿੰਦਗੀ 'ਤੇ ਬਣ ਰਹੀਆਂ ਫਿਲਮਾਂ ਵਿੱਚ ਚਿਹਰੇ ਦੇ ਮਿਲਾਨ 'ਤੇ ਕੰਮ ਹੋ ਰਿਹਾ ਹੈ। ਇਸ ਦੇ ਲਈ ਪ੍ਰੋਸਥੈਟਿਕ ਮੇਕਅਪ ਦਾ ਸਹਾਰਾ ਲਿਆ ਜਾ ਰਿਹਾ ਹੈ।