ਚੰਡੀਗੜ੍ਹ, 20 ਫਰਵਰੀ (ਪੋਸਟ ਬਿਊਰੋ)- ਪੋਸਟ ਗ੍ਰੈਜੂਏਟ ਇੰਸਟੀਚਿਊਟ ਫਾਰ ਮੈਡੀਕਲ ਐਜੂਕੇਸ਼ਨ ਐਂਡ ਰਿਸਰਚ (ਪੀ ਜੀ ਆਈ) ਚੰਡੀਗੜ੍ਹ ਨੇ ਸਿਹਤ ਦੇ ਖੇਤਰ ਵਿੱਚ ਵੱਡੀ ਪ੍ਰਾਪਤੀ ਕੀਤੀ ਹੈ। ਏਥੇ ਦੋ ਸਾਲ ਦੇ ਬੱਚੇ ਦਾ ਰੋਬੋਟਿਕ ਸਰਜਰੀ ਦੇ ਜ਼ਰੀਏ ਇਲਾਜ ਕਰ ਕੇ ਉਸ ਨੂੰ ਨਵੀਂ ਜ਼ਿੰਦਗੀ ਦਿੱਤੀ ਗਈ ਹੈ।
ਪਤਾ ਲੱਗਾ ਹੈ ਕਿ ਦੋ ਦਿਨ ਦੇ ਇਸ ਬੱਚੇ ਦੀ ਫੂਡ ਪਾਈਪ ਨਹੀਂ ਸੀ ਅਤੇ ਉਹ ਫੀਡ ਨਹੀਂ ਲੈ ਸਕਦਾ ਸੀ। ਇਸ ਕਾਰਨ ਪੀ ਜੀ ਆਈ ਦੇ ਪੀਡੀਓਟਿ੍ਰਕਸ ਸਰਜਨ ਨੇ ਉਸ ਬੱਚੇ ਦਾ ਰੋਬੋਟਿਕ ਸਰਜਰੀ ਨਾਲ ਇਲਾਜ ਕੀਤਾ। ਏਦਾਂ ਕਰਨ ਵਾਲਾ ਪੀ ਜੀ ਆਈ ਏਸ਼ੀਆ ਦਾ ਪਹਿਲਾ ਹਸਪਤਾਲ ਬਣ ਗਿਆ ਹੈ। ਦੋ ਦਿਨ ਪਹਿਲਾਂ ਸੈਕਟਰ-16 ਦੇ ਗੌਰਮਿੰਟ ਮਲਟੀ ਸਪੈਸ਼ਲਿਟੀ ਹਸਪਤਾਲ ਵਿੱਚ ਇਸ ਬੱਚੇ ਦਾ ਜਨਮ ਹੋਇਆ ਸੀ, ਪਰ ਜਨਮ ਸਮੇਂ ਤੋਂ ਉਸ ਦੀ ਫੂਡ ਪਾਈਪ ਨਹੀਂ ਸੀ ਤੇ ਉਸ ਦਾ ਵਜ਼ਨ ਸਿਰਫ ਢਾਈ ਕਿਲੋ ਸੀ। ਸਰਜਰੀ ਪਿੱਛੋਂ ਬੱਚਾ ਬਿਲਕੁਲ ਤੰਦਰੁਸਤ ਹੈ ਅਤੇ ਉਸ ਨੂੰ ਘਰ ਭੇਜ ਦਿੱਤਾ ਗਿਆ ਹੈ। ਪੀ ਜੀ ਆਈ ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਇਸ ਤਰ੍ਹਾਂ ਦੀ ਐਡਵਾਂਸ ਸਹੂਲਤ ਗਰੀਬ ਲੋਕਾਂ ਨੂ ਵੀ ਦਿੱਤੀ ਜਾ ਰਹੀ ਹੈ। ਇਸ ਬੱਚੇ ਦੇ ਪਿਤਾ ਸਕਿਓਰਿਟੀ ਗਾਰਡ ਹਨ ਅਤੇ ਉਨ੍ਹਾਂ ਦੇ ਬੱਚੇ ਨੂੰ ਫ੍ਰੀ ਟ੍ਰੀਟਮੈਂਟ ਦਿੱਤਾ ਗਿਆ ਹੈ।