ਵਾਸ਼ਿੰਗਟਨ, 20 ਫਰਵਰੀ (ਪੋਸਟ ਬਿਊਰੋ)- ਕਰੀਬ 73 ਸਾਲ ਪਹਿਲਾਂ ਵਾਸ਼ਿੰਗਟਨ ਡੀ ਸੀ ਦੀ ਜਨਤਕ ਲਾਇਬ੍ਰੇਰੀ 'ਚੋਂ ਲਈ ਗਈ ਬੱਚਿਆਂ ਦੀ ਇਕ ਕਿਤਾਬ ਕੱਲ੍ਹ ਉਸ ਲੈਣ ਵਾਲੇ ਵਿਅਕਤੀ ਨੇ ਵਾਪਸ ਕਰ ਦਿੱਤੀ ਹੈ ਤੇ ਇਸ 'ਚ ਇਕ ਪੱਤਰ ਲਿਖ ਕੇ ਇਹ ਕਿਤਾਬ ਏਨੇ ਲੰਬੇ ਸਮੇਂ ਤੱਕ ਵਾਪਸ ਨਾ ਕਰ ਸਕਣ ਦਾ ਕਾਰਨ ਵੀ ਦੱਸਿਆ ਹੈ।
ਇਸ ਕਿਤਾਬ ਦਾ ਨਾਂਅ ‘ਦਾ ਪੋਸਟਮੈਨ' ਹੈ ਅਤੇ ਇਸ ਨੂੰ ਮੋਰਾ ਗਰੇਗ ਨੇ 1946 'ਚ ਲਾਇਬ੍ਰੇਰੀ ਤੋਂ ਲਿਆ ਸੀ। ਬੀਤੇ ਹਫਤੇ ਇਕ ਫੇਸਬੁੱਕ ਪੋਸਟ ਰਾਹੀਂ ਮਾਊਂਟੋਮੇਰੀ ਕਾਉਂਟੀ 'ਚ ਸਿਲਵਰ ਸਪਰਿੰਗ ਲਾਇਬ੍ਰੇਰੀ ਨੇ ਇਸ ਕਿਤਾਬ ਦੀ ਵਿਸਥਾਰ ਨਾਲ ਜਾਣਕਾਰੀ ਸਾਂਝੀ ਕੀਤੀ ਸੀ, ਜਿਸ ਵਿੱਚ 1920 ਦੇ ਡਾਕੀਏ ਦੀ ਜੀਵਨੀ ਨੂੰ ਪੇਸ਼ ਕੀਤਾ ਗਿਆ ਹੈ। ਇਸ ਬਾਰੇ ਲਾਇਬ੍ਰੇਰੀ ਨੇ ਕਿਹਾ ਕਿ ਇਸ ਕਿਤਾਬ ਨੂੰ ਵਾਪਸ ਕਰਨ ਵਾਲੇ ਵਿਅਕਤੀ ਦੇ ਮਾਤਾ ਪਿਤਾ ਨੇ 1946 ਵਿੱਚ ਇਹ ਕਿਤਾਬ ਲਈ ਸੀ, ਜਦੋਂ ਉਹ ਤਿੰਨ ਸਾਲ ਦੀ ਬੱਚੀ ਸੀ। ਇਸ ਤੋਂ ਬਾਅਦ ਉਸ ਦੇ ਪਰਵਾਰ ਨੂੰ ਵਾਸ਼ਿੰਗਟਨ ਡੀ ਸੀ ਤੋਂ ਕੈਨੇਡਾ ਜਾਣਾ ਪਿਆ। ਗਰੇਗ ਨੇ ਦੱਸਿਆ ਕਿ ਉਸ ਨੂੰ ਕਿਤਾਬਾਂ ਨਾਲ ਪਿਆਰ ਹੈ ਅਤੇ ਉਹ ਤਸਵੀਰਾਂ ਨੂੰ ਬਹੁਤ ਪਸੰਦ ਕਰਦੀ ਸੀ। ਜਦੋਂ ਲਾਇਬ੍ਰੇਰੀ 'ਚ ਕੰਮ ਕਰਨ ਵਾਲਿਆਂ ਨੇ ਇਸ ਕਿਤਾਬ ਨੂੰ ਦੇਖਿਆ ਤਾਂ ਉਹ ਹੈਰਾਨ ਰਹਿ ਗਏ। ਕਿਤਾਬ ਮਿਆਦ ਮੁੱਕਣ 'ਤੇ ਜਮ੍ਹਾ ਨਾ ਕਰਵਾਉਣ ਬਦਲੇ ਲਾਇਬ੍ਰੇਰੀ ਨੇ ਗਰੇਗ ਦਾ ਜੁਰਮਾਨਾ ਮੁਆਫ ਕਰ ਦਿੱਤਾ ਹੈ। ਜੇ ਇਸ ਨੂੰ ਮੁਆਫ ਨਾ ਕੀਤਾ ਜਾਂਦਾ ਤਾਂ ਗਰੇਗ ਨੂੰ 9 ਹਜ਼ਾਰ ਡਾਲਰ ਤੋਂ ਜ਼ਿਆਦਾ ਜੁਰਮਾਨਾ ਦੇਣਾ ਪੈਂਦਾ।