ਨਵੀਂ ਦਿੱਲੀ, 19 ਫਰਵਰੀ (ਪੋਸਟ ਬਿਊਰੋ)- ਅੱਜ ਬੈਂਗਲੁਰੂ ਵਿਚ ਏਅਰ ਸ਼ੋਅ ਤੋਂ ਪਹਿਲਾਂ ਹਾਦਸਾ ਹੋਣ ਦੀ ਖ਼ਬਰ ਆ ਗਈ ਹੈ। ਦੱਸਿਆ ਗਿਆ ਹੈ ਕਿ ਹਵਾਈ ਫ਼ੌਜ ਦੇ ਦੋ ਸੂਰੀਆ ਕਿਰਨ ਏਅਰਕ੍ਰਾਫਟ ਆਪੋ ਵਿਚ ਟਕਰਾ ਗਏ। ਇਸ ਟੱਕਰ ਤੋਂ ਬਾਅਦ ਦੋਵਾਂ ਜਹਾਜ਼ਾਂ ਵਿਚ ਅੱਗ ਲੱਗ ਗਈ ਸੀ।
ਮਿਲ ਸਕੀ ਜਾਣਕਾਰੀ ਮੁਤਾਬਕ ਭਾਰਤੀ ਹਵਾਈ ਫ਼ੌਜ ਦੀ ਸੂਰੀਆ ਕਿਰਨ ਏਅਰੋਬੈਟਿਕਸ ਟੀਮ ਦੇ ਦੋ ਜਹਾਜ਼ ਬੈਂਗਲੁਰੂ ਦੇ ਯੇਲਾਹਾਂਕਾ ਏਅਰਬੇਸ ਉੱਤੇ ਕ੍ਰੈਸ਼ ਹੋ ਗਏ ਹਨ। ਏਅਰੋ ਇੰਡੀਆ ਸ਼ੋਅ ਲਈ ਚੱਲ ਰਹੀ ਐਕਸਰਸਾਈਜ਼ ਦੇ ਦੌਰਾਨ ਦੋ ਜਹਾਜ਼ਾਂ ਦੀ ਆਪੋ ਵਿਚ ਟੱਕਰ ਹੋ ਗਈ। ਇਸ ਮੌਕੇ ਇਕ ਪਾਇਲਟ ਦੀ ਮੌਤ ਹੋ ਗਈ, ਪਰ ਦੂਸਰਾ ਪਾਇਲਟ ਸੁਰੱਖਿਅਤ ਬਚ ਨਿਕਲਿਆ। ਪੁਲਿਸ ਨੇ ਦੱਸਿਆ ਕਿ ਬੁੱਧਵਾਰ ਤੋਂ ਏਅਰ-ਸ਼ੋਅ ਸ਼ੁਰੂ ਹੋਣਾ ਸੀ। ਦੋਵੇਂ ਜਹਾਜ਼ ਉਸੇ ਲਈ ਪ੍ਰੈਕਟਿਸ ਕਰ ਰਹੇ ਸਨ ਕਿ ਉਨ੍ਹਾਂ ਦੀ ਟੱਕਰ ਹੋ ਗਈ। ਹਾਦਸੇ ਵਿਚ ਇਕ ਆਮ ਨਾਗਰਿਕ ਨੂੰ ਵੀ ਸੱਟ ਲੱਗੀ ਹੈ।
27 ਮਈ 1996 ਨੂੰ ਸੂਰਿਆ ਕਿਰਨ ਟੀਮ ਬਣਾਈ ਗਈ ਸੀ, ਜਿਸ ਦੇ ਪਾਇਲਟ ਹਵਾਈ ਕਰਤਬ ਦਿਖਾਉਂਦੇ ਹਨ। ਇਕ ਟੀਮ ਦੇ 9 ਜਹਾਜ਼ ਸ਼ਾਮਲ ਹੁੰਦੇ ਹਨ। ਸੂਰੀਆ ਕਿਰਨ ਨੇ ਸ੍ਰੀਲੰਕਾ ਤੋਂ ਸਿੰਗਾਪੁਰ ਤਕ 400 ਸ਼ੋਅ ਕੀਤੇ ਹਨ। ਸਾਲ 2011 ਵਿਚ ਸੂਰੀਆ ਕਿਰਨ ਏਅਰਕ੍ਰਾਫਟ ਨੂੰ ਏਅਰ-ਸ਼ੋਅ ਤੋਂ ਹਟਾ ਦਿੱਤਾ ਗਿਆ ਸੀ, ਜਿਸ ਪਿੱਛੋਂ ਸਾਲ 2015 ਵਿਚ ਇਸ ਨੂੰ ਫਿਰ ਸ਼ਾਮਲ ਕਰ ਲਿਆ ਗਿਆ ਸੀ।